ສຳນັກຂ່າວ CRI ລາຍງານວ່າ ທ່ານ ວະລາດີເມຍ ປູຕິນ ປະທານາທິບໍດີຣັດເຊຍ ກ່າວວ່າ: ຣັດເຊຍ ກຽມກັບຄືນສູ່ຂໍ້ຕົກລົງການຂົນສົ່ງຜະລິດຕະພັນກະສິກຳ ( ທັນຍາພືດ ) ຜ່ານທະເລດຳອອກສູ່ຕະຫຼາດໂລກ ຫຼັງຈາກຝ່າຍຕາເວັນຕົກປະຕິບັດພັນທະຕໍ່ຣັດເຊຍ.
ທ່ານ ເຣເຊັບ ຕາຢິບ ເອີໂດການ ປະທານາທິບໍດີຕວັກກີ ໄປສົນທະນາ ກັບ ປະທານາທິບໍດີຣັດເຊຍ ຜ່ານລະບົບທາງໄກ ເມື່ອບໍ່ດົນມານີ້ ໂດຍຜູ້ນຳ ຣັດເຊຍ ກ່າວວ່າ: ຣັດເຊຍກຽມກັບຄືນສູ່ສັນຍາການຂົນສົ່ງຜະລິດຕະພັນກະສິກຳຜ່ານທະເລດຳອອກສູ່ພາຍນອກ ຫຼັງຈາກຝ່າຍຕາເວັນຕົກປະຕິບັດພັນທະຕໍ່ຣັດເຊຍ.
ທັງນີ້, ເມື່ອວັນທີ 22 ກໍລະກົດ 2022, ຣັດເຊຍ ກັບ ອູແກຣນ ຕ່າງໄດ້ເຊັນສັນຍາກ່ຽວກັບການຂົນສົ່ງຜະລິດຕະພັນກະສິກຳຜ່ານທະເລດຳອອກສູ່ພາຍນອກ ກັບ ຕວັກກີ ແລະ ອົງການສະຫະປະຊາຊາດ ຢູ່ນະຄອນອິດສະຕັນບູນ ຂອງຕວັກກີ, ສັນຍາມີກຳນົດໃຊ້ເປັນເວລາ 120 ວັນ. ອາຍຸສັນຍາຖືກຂະຫຍາຍອອກໄປຫຼາຍຄັ້ງ ໂດຍສະເພາະຂະຫຍາຍເພີ່ມຕື່ມໃນເດືອນພະຈິກປີຜ່ານມາ, ເດືອນມີນາ ແລະ ເດືອນພຶດສະພາປີນີ້ ໂດຍໄດ້ໝົດອາຍຸລົງໃນວັນທີ 17 ກໍລະກົດຜ່ານມານີ້.
