ສຳນັກຂ່າວ CNBC ລາຍງານວ່າ: ທ່ານ ຫຼີ ສຽງ ນາຍົກລັດຖະມົນຕີ ສປ ຈີນ ກ່າວເປີດກອງປະຊຸມປະຈຳປີ ນິວແຊັມປຽນ ຄັ້ງທີ 14 ຂອງເວທີເສດຖະກິດໂລກ ( World Economic Forum ) ວ່າ: ນັບຈາກນີ້ເປັນຕົ້ນໄປ ການຟື້ນຕົວຂອງເສດຖະກິດຈີນ ຈະມີທ່າອ່ຽງດີຂຶ້ນ. ກ່ອນໜ້ານີ້ ຈີນ ຕັ້ງເປົ້າໝາຍໄວ້ວ່າ ເສດຖະກິດຈະຂະຫຍາຍຕົວ 5% ເຊິ່ງສະຖາບັນຕ່າງໆກໍອອກມາຄາດການວ່າ ເສດຖະກິດຈີນ ຈະຟື້ນຕົວດີຂຶ້ນ.
ໃນໄຕມາດ 1 ເສດຖະກິດຈີນຂະຫຍາຍຕົວ 4,5% ເຊິ່ງດີກວ່າທີ່ຄາດການໄວ້, ແນວໃດກໍຕາມ ນັກວິເຄາະລະບຸວ່າ ຂໍ້ມູນທີ່ຕາມມາຊີ້ໃຫ້ເຫັນວ່າ ເສດຖະກິດຈີນ ໃນໄຕມາດ 2 ອາດສະລໍຕົວລົງ ໂດຍສະເພາະເດືອນພຶດສະພາ ອາດຈະເຕີບໂຕຊ້າລົງ ໂດຍນັກເສດຖະສາດຫຼາຍສຳນັກຄາດການວ່າ ເສດຖະກິດຈີນປີນີ້ ຂ້ອນຂ້າງຜັນຜວນ ເຊິ່ງເມື່ອບໍ່ດົນມານີ້ ສະຖາບັນການເງິນຊັ້ນນຳຂອງໂລກຫຼາຍແຫ່ງ ເຊັ່ນ: ໂກແມນແຊັກ, ເຈພີ ມໍແກນ, UBS ຕ່າງກໍປັບຫຼຸດຄາດການເສດຖະກິດຈີນ ໃນປີ 2023 ລົງ, ທັງໆທີ່ກ່ອນໜ້ານີ້ຫຼາຍສະຖາບັນໄດ້ປັບເພີ່ມຄາດການເສດຖະກິດຈີນ ເຊັ່ນ: ໃນເດືອນມິຖຸນາ 2023 ທະນາຄານໂລກໄດ້ຄາດການຂະຫຍາຍຕົວເສດຖະກິດຈີນໃນປີ 2023 ຢູ່ທີ່ລະດັບ 5,6% ຈາກ 4,3% ທີ່ຄາດການໄວ້ເມື່ອເດືອນເມສາຜ່ານມາ, ໃນຂະນະທີ່ IMF ຄາດວ່າຈະຂະຫຍາຍຕົວ 5,2% ຈາກ 4,4% ທີ່ຄາດການໄວ້ຄັ້ງຜ່ານມາ.
ນາຍົກລັດຖະມົນຕີຈີນ ກ່າວຢ້ຳເຖິງຄວາມຈຳເປັນທີ່ໂລກຕ້ອງຮ່ວມມືກັນດ້ານການຄ້າ ເພື່ອການເຕີບໂຕດ້ານເສດຖະກິດ. “ ປະເທດຕາເວັນຕົກ ບາງປະເທດກຳລັງຫຼຸດການເພິ່ງພາ ແລະ ຫຼຸດ ຄວາມສ່ຽງ ເຊິ່ງແນວຄິດດັ່ງກ່າວຜິດພາດທີ່ສຸດ ເນື່ອງຈາກໂລກາພິວັດ ເຮັດໃຫ້ເສດຖະກິດໂລກຕ້ອງຫຼອມລວມເຂົ້າກັນທັງໝົດ, ຜົນປະໂຫຍດຂອງທຸກຝ່າຍກ່ຽວພັນກັນຢ່າງໃກ້ຊິດ, ເສດຖະກິດນານາປະເທດຕ່າງກໍເພິ່ງພາເຊື່ອມໂຍງກັນ, ພວກເຮົາສາມາດສ້າງຄວາມສຳເລັດຂອງກັນ ແລະ ກັນໄດ້.
