ເວັບໄຊສຳນັກຂ່າວ Vtv.vn ລາຍງານວ່າ: ສະຫະພາບເອີຣົບ ( EU ) ໄດ້ເຜີຍແຜ່ການແກ້ໄຂກົດລະບຽບ ສະບັບ 2019/1973 ກ່ຽວກັບມາດຕະການເລັ່ງດ່ວນໃນການຄວບຄຸມອາຫານທີ່ສົ່ງອອກໄປຍັງ EU.
ຂ່າວໄດ້ລະບຸວ່າ: ຕັ້ງແຕ່ວັນທີ 27 ມິຖຸນາ 2023 ໝີ່ເຄິ່ງສຳເລັດຮູບທີ່ສົ່ງອອກຈາກຫວຽດນາມ ໄປຍັງຕະຫຼາດສະຫະພາບເອີຣົບ ບໍ່ຈໍາເປັນຕ້ອງແນບໃບຮັບຮອງການກວດສອບຄວາມປອດໄພຂອງອາຫານ ທີ່ອອກໂດຍໜ່ວຍງານຜູ້ມີອໍານາດກ່ຽວຂ້ອງຂອງຫວຽດນາມ.
ຖະແຫຼງການຂອງ EU ລະບຸວ່າ: ຕາມການປັບປຸງແກ້ໄຂກົດລະບຽບ 2019/1973 ໄດ້ລະບຸກ່ຽວກັບບັນດາໝີ່ເຄິ່ງສຳເລັດຮູບຂອງຫວຽດນາມ ຈາກພາກພະໜວກ ທີ II ທີ່ມີຄວາມຖີ່ການກວດສອບທີ່ລະດັບ 50% ມາພະໜວກທີ I ມີຄວາມຖີ່ການກວດສອບ 20% ຫຼັງຈາກທີ່ໄດ້ປະຕິບັດກົດລະບຽບດັ່ງກ່າວນີ້ ໃນພະໜວກທີ II ໃນໄລຍະເວລາ 18 ເດືອນ.
ທ່ານ ເຈິ້ນ ຫງ໊ອກ ກວນ ທີ່ປຶກສາທູດດ້ານການຄ້າຫວຽດນາມ ປະຈໍາເບວຢຽມ ແລະ EU ກ່າວວ່າ: ຄວາມເປັນຈິງແລ້ວ EU ຈະເຮັດທົດລອງການນໍາເຂົ້າໝີ່ເຄິ່ງສຳເລັດຮູບຂອງຫວຽດນາມ ໃນລະດັບ 20% ທີ່ຈໍາເປັນຕ້ອງມີໃບຮັບຮອງການກວດສອບ ຄວາມປອດໄພຂອງອາຫານຂອງຫວຽດນາມ ແຕ່ຫາກວ່າພາຍໃນ 6 ເດືອນທ້າຍປີນີ້ ຫວຽດນາມ ຫາກມີການລະເມີດຂໍ້ບັງຄັບດ້ານຄວາມປອດໄພຂອງອາຫານຫຼາຍຂໍ້ ກໍອາດຈະນໍາເອົາບັນດາໝີ່ເຄິ່ງສຳເລັດຮູບຫວຽດນາມ ເຂົ້າມາຢູ່ໃນພະໜວກ II ຂອງກົດລະບຽບດັ່ງກ່າວອີກຄັ້ງ.
ທັງນີ້, ເພື່ອເປັນການທົດສອບຂອງບັນດາໝີ່ເຄິ່ງສຳເລັດຮູບຂອງຫວຽດນາມ ທີ່ຕ້ອງຮັກສາຄຸນນະພາບໄວ້ໃຫ້ສະໝໍ່າສະເໝີ.
