ບົດລາຍງານການວິໄຈ “ ຄ່າຄອງຊີບ ” ສະບັບຫຼ້າສຸດ ລະບຸວ່າ: ຮົງກົງ ໄດ້ຫຼຸດຈາກອັນດັບ 1 ທີ່ເປັນເມືອງທີ່ມີຄ່າຄອງຊີບແພງທີ່ສຸດໃນໂລກ ສຳລັບຊາວຕ່າງຊາດ, ຫຼັງຈາກທີ່ຕິດອັນດັບ 1 ມາເປັນເວລາ 4 ປີຕິດຕໍ່ກັນ ໂດຍຖືກນະຄອນນິວຢອກຂອງສະຫະລັດອາເມຣິກາ ແຊງຂຶ້ນເປັນອັນດັບ 1 ແທນໃນປີ 2023.
ບົດວິໄຈສະບັບດັ່ງກ່າວ ໄດ້ຈັດອັນດັບເມືອງທີ່ມີຄ່າຄອງຊີບສູງທີ່ສຸດໃນໂລກ 207 ແຫ່ງ ໂດຍພິຈາລະນາຈາກລາຄາສິນຄ້າ ແລະ ບໍລິການຕ່າງໆທີ່ທີມງານວິໄຈໄດ້ຊື້ໃນແຕ່ລະວັນ ເຊັ່ນ: ອາຫານ, ສາທາລະນຸປະໂພກ, ການຂົນສົ່ງມວນຊົນ, ສິ່ງຂອງຈຳເປັນພື້ນຖານ ເຊັ່ນ: ເຄື່ອງໃຊ້ໃນຄົວເຮືອນ. ການວິໄຈຄັ້ງນີ້ ມີວັດຖຸປະສົງ ເພື່ອຊ່ວຍອົງກອນໃນການຄຳນວນຄ່າຄອງຊີບສຳລັບພະນັກງານ.
ຜົນວິໄຈພົບວ່າ: ຮົງກົງ ໄດ້ຫຼຸດຈາກອັນດັບ 1 ເນື່ອງຈາກລາຄາສິນຄ້າ ແລະ ບໍລິການປະຈຳວັນ ເພີ່ມຂຶ້ນໃນລະດັບທີ່ຊະລໍຕົວ ( ເພີ່ມຂຶ້ນບໍ່ຫຼາຍ ), ໃນຂະນະທີ່ຄ່າທີ່ພັກໃນຮົງກົງຫຼຸດລົງ. ແນວໃດກໍຕາມ, ຮົງກົງ ຍັງເປັນເມືອງທີ່ມີຄ່າຄອງຊີບສູງທີ່ສຸດໃນອາຊີ. ສ່ວນສິງກະໂປ ເປັນອັນດັບ 2 ໃນກຸ່ມປະເທດທີ່ມີຄ່າຄອງຊີບສູງທີ່ສຸດໃນອາຊີ ເຊິ່ງຍັບຂຶ້ນມາ 8 ອັນດັບ ຈາກປີຜ່ານມາ ແລະ ຍັງຕິດອັນດັບ 5 ເມືອງ ທີ່ມີຄ່າຄອງຊີບສູງທີ່ສຸດໃນໂລກອີກດ້ວຍ ເຊິ່ງເປັນຄັ້ງທຳອິດທີ່ສິງກະໂປຕິດ 1 ໃນ 5 ຂອງໂລກ.
ສຳລັບ 10 ອັນດັບເມືອງທີ່ມີຄ່າຄອງຊີບສູງທີ່ສຸດໃນອາຊີ ໄດ້ແກ່: 1). ຮົງກົງ; 2). ສິງກະໂປ; 3). ນະຄອນຫຼວງເຊອູນ; 4). ນະຄອນຫຼວງໂຕກຽວ; 5). ນະຄອນຊຽງໄຮ້; 6). ກວາງໂຈວ; 7). ເຊິນເຈິ້ນ; 8). ນະຄອນຫຼວງປັກກິ່ງ; 9). ໄທເປ ແລະ 10). ໂຢໂກຮາມ່າ.
