ໂຈະແຜນການ ເປີດບິນເສັ້ນທາງວຽງຈັນ-ຫົວພັນ(ໜອງຄ້າງ)

ຫຼາຍຄົນພວມດີໃຈຈະໄດ້ນັ່ງເຄື່ອງບິນໄປຫົວພັນບໍ່ຕ້ອງຂີ່ລົດຫຼາຍຊົ່ວໂມງ ຫຼັງຈາກຮູ້ຂ່າວວ່າ ການບິນລາວມີແຜນຈະເປີດເສັ້ນບິນນີ້ແຕ່ວັນທີ 12 ພຶດສະພານີ້.

ແນວໃດກໍ່ຕາມ ກົມການບິນພົນລະເຮືອນໄດ້ອອກແຈ້ງການໃນວັນທີ 5 ພຶດສະພາ 2023 ທີ່ຜ່ານມາ ໃຫ້ໂຈະການປະຕິບັດຖ້ຽວບິນ ວຽງຈັນ-ຊຳເໜືອ (ໜອງຄ້າງ) ໂດຍມີໃຈຄວາມວ່າ: ກົມການບິນພົນລະເຮືອນຂໍຖືເປັນກຽດແຈ້ງມາຍັງທ່ານ ຊາບວ່າ: ເພື່ອຮັບປະກັນຄວາມປອດໄພການບິນ ກໍ່ຄືປະຕິບັດຕາມຄໍາແນະນໍາ ຂອງອົງການການບິນພົນລະເຮືອນສາກົນ ICAO, ໂດຍສະເພາະ ກົດຫມາຍວ່າດ້ວຍ ການບິນພົນລະເຮືອນ ແລະ ລະບຽບການທີ່ກ່ຽວຂ້ອງ.

ສະນັ້ນ, ທາງກົມການບິນພົນລະເຮືອນ ຈຶ່ງແຈ້ງໃຫ້ໂຈະການປະຕິບັດຖ້ຽວບິນ ໂດຍອີງໃສ່ ໃບອະນຸຍາດແຜນບິນ ຂອງກົມການບິນ ພົນລະເຮືອນ ສະບັບເລກທີ 1307/ກບພຣ, ລົງວັນທີ 28 ເມສາ 2023, ວັນທີ 12 ພຶດສະພາ 2023 – 28 ຕຸລາ 2023 ຖ້ຽວບິນເລກທີ QV701/QV702 ເສັ້ນບິນ ວຽງຈັນ-ຊໍາເໜືອ (ໜອງຄ້າງ) ເນື່ອງຈາກວ່າ ສະຫນາມບິນ ໜອງຄ້າງ ຢູ່ໃນຂັ້ນຕອນການຢັ້ງຢືນຮອງຮັບຂຶ້ນທະບຽນສະຫນາມບິນ ແລະ ການປະເມີນຄວາມປອດໄພການບິນ.

ພາຍຫຼັງສໍາເລັດແລ້ວ ກົມການບິນພົນລະເຮືອນ ຈຶ່ງຈະໄດ້ອະນຸມັດແຜນບິນດັ່ງກ່າວຕາມລະບຽບການ.