ເຊື່ອວ່າຫຼາຍຄົນທີ່ຕິດຕາມຂ່າວສານເປັນປະຈຳຈະໄດ້ຮູ້ແລ້ວວ່າ ໃນ ສປປ ລາວເຮົາໄດ້ກຳນົດເອົາ 10 ແຂວງເປັນແຂວງເປົ້າໝາຍການຜະລິດເຂົ້າ ໃຫ້ສາມາດຄ້ຳປະກັນສະບຽງອາຫານປະເພດເຂົ້າໄດ້ ມື້ນີ້ເຮົາມາເບິ່ງກັນມີແຂວງໃດແນ່.
ອີງໃສ່ແຜນພັດທະນາເສດຖະກິດ – ສັງຄົມ ມະຫາພາກ ຂອງກະຊວງແຜນການ ແລະ ການລົງທຶນ ໃຫ້ຮູ້ວ່າ: ໃນແຜນປີ 2023 ໃນຂົງເຂດວຽກງານກະສິກຳ ແມ່ນສຸມໃສ່ການຜະລິດເຂົ້າ ໃນ 10 ແຂວງ ເປົ້າໝາຍຂອງໂຄງການຄໍ້າປະກັນສະບຽງອາຫານຫຼາຍແຫ່ງ ໂດຍສະເພາະແມ່ນເລັ່ງໃສ່ ແຂວງຄຳມ່ວນ, ສະຫວັນນະເຂດ, ສາລະວັນ ແລະ ຈໍາປາສັກ ຜະລິດເພື່ອຄໍ້າປະກັນສະບຽງອາຫານໃຫ້ແກ່ບັນດາແຂວງພາກກາງ, ພາກໃຕ້ ແລະ ເປັນສິນຄ້າສົ່ງອອກ.
ສຳລັບແຂວງໄຊຍະບູລີ, ຫຼວງນໍ້າທາ ແລະ ບໍ່ແກ້ວ ແມ່ນເລັ່ງໃສ່ຜະລິດເຂົ້າເພື່ອສະໜອງໃຫ້ແກ່ບັນດາ ແຂວງພາກເໜືອ. ສ່ວນແຂວງວຽງຈັນ, ບໍລິຄຳໄຊ ແລະ ນະຄອນຫຼວງວຽງຈັນ ແມ່ນເລັ່ງໃສ່ຜະລິດເພື່ອສະໜອງໃຫ້ແກ່ນະຄອນຫຼວງວຽງຈັນ ແລະ ບັນດາແຂວງພາກເໜືອຈຳນວນໜຶ່ງ ລວມທັງເປັນສິນຄ້າສົ່ງອອກ.
ນອກນີ້ຕ້ອງສ້າງແຜນການ ແລະ ມາດຕະການດຸ່ນດ່ຽງການຜະລິດ ແລະ ການບໍລິໂພກ, ມີການຈັດຕັ້ງການຜະລິດເປັນກຸ່ມສະຫະກອນ, ເປັນຟາມແບບຫົວໜ່ວຍວິສາຫະກິດ; ມີນະໂຍບາຍສົ່ງເສີມການຜະລິດ, ການປຸງແຕ່ງເພີ່ມມູນຄ່າ ແລະ ຄຸນນະພາບຂອງຜະລິດຕະພັນ, ການເຂົ້າເຖິງສິນເຊື່ອ ແລະ ຕະຫຼາດ ລວມທັງການຂົນສົ່ງຈໍລະຈອນສິນຄ້າ ພ້ອມດຽວກັນນີ້ຕ້ອງມີມາດຕະການຊ່ວຍໜູນເພື່ອຫຼຸດຜ່ອນຜົນກະທົບຈາກໄພພິບັດທຳມະຊາດ.
ນອກນັ້ນ ກໍມີແຜນການ ແລະ ມາດຕະການຄຸ້ມຄອງພັດທະນາທີ່ດິນກະສິກຳ; ການພັດທະນາຊົນລະກະເສດ; ການຄົ້ນຄວ້າທົດລອງທາງວິທະຍາສາດດ້ານກະສິກຳ, ປ່າໄມ້ ແລະ ພັດທະນາຊົນນະບົດ ພ້ອມທັງມີກົນໄກປະສານສົມທົບກັບຂະແໜງການທີ່ກ່ຽວຂ້ອງຢ່າງສະໜິດແໜ້ນ ທັງໝົດນີ້ກໍ່ເພື່ອຮັບປະກັນການຜະລິດໃຫ້ພຽງພໍໂດຍພື້ນຖານກັບຄວາມຕ້ອງການບໍລິໂພກພາຍໃນ ເປັນການຫຼຸດຜ່ອນການນຳເຂົ້າ ແລະມີສ່ວນສົ່ງອອກອີກດ້ວຍ.
