ສຳນັກຂ່າວຕ່າງປະເທດລາຍງານວ່າ: ຊາອຸດິດ ອາຣັບບີ ຜູ້ຜະລິດ ແລະ ສົ່ງອອກນ້ຳມັນລາຍໃຫຍ່ທີ່ສຸດຂອງໂລກ ອາດຈະປັບຫຼຸດລາຄານ້ຳມັນດິບ ສຳລັບສົ່ງອອກໄປຍັງຕະຫຼາດອາຊີ ໂດຍຈະເລີ່ມນັບແຕ່ເດືອນມິຖຸນາຈະເຖິງນີ້ ເຖິງແມ່ນວ່າ ໂອເປັກພລັສ ຈະຫາກໍປະກາດປັບຫຼຸດກຳລັງການຜະລິດລົງອີກກໍຕາມ ເນື່ອງຈາກໂຮງກັ່ນນ້ຳມັນໄດ້ຮັບຜົນກະທົບຈາກລາຄາເຊື້ອເພີງທີ່ຫຼຸດລົງນັ້ນ ກຳລັງພິຈາລະນາປັບຫຼຸດການຜະລິດລົງ, ໃນຂະນະດຽວກັນ ຈີນ ແລະ ອິນເດຍ ກໍຫັນໄປຊື້ນ້ຳມັນດິບຈາກຣັດເຊຍ.
ຜົນການສຳຫຼວດຂອງສຳນັກຂ່າວຣອຍເຕີ ກັບໂຮງກັ່ນນ້ຳມັນ 5 ແຫ່ງໃນອາຊີ ລະບຸວ່າ: ບໍລິສັດຊາອຸດິ ອາຣາມໂຄ ( Saudi Aramco ) ຂອງຊາອຸດິດ ອາຣັບບີ ອາດຈະຫຼຸດລາຄາຂາຍນ້ຳມັນຢ່າງເປັນທາງການ ( OSP ) ສຳລັບນ້ຳມັນດິບປະເພດ Arab Light ລົງປະມານ 40 ເຊັນຕໍ່ບາເຣວ ໃນເດືອນມິຖຸນາຈະເຖິງນີ້, ຫຼັງຈາກທີ່ປັບຂຶ້ນມາເປັນເວລາ 3 ເດືອນ.
