ເອາະ ເຄື່ອງໃນ ແລະ ຮວຍໄຂ່ໄກ່

22

ເອາະຮວຍໄຂ່ ແລະ ເຄື່ອງໃນໄກ່ ເປັນເມນູທີ່ແຊບ ກິນກັບໄດ້ທັງເຂົ້າໜຽວ ແລະ ເຂົ້າຈ້າວ ເຊິ່ງມື້ນີ້ຄໍລຳອາຫານຈະພາທ່ານມາເຮັດເມນູ ເອາະຮວຍໄຂ່ ແລະ ເຄື່ອງໃນໄກ່ ກິນເອງແບບແຊບໆ.

▶ ວັດຖຸດິບ: ຮວຍໄຂ່ ແລະ ເຄື່ອງໃນໄກ່, ຫົວຜັກບົ່ວ, ຫົວຜັກທຽມ, ຫົວສີໃຄ, ໝາກເຜັດແຫ້ງ, ໃບຂີ້ຫູດ, ໝາກເຂືອ, ນໍ້າມັນພືດ, ຫອມຊີ, ຜັກຫອມບົ່ວ, ຜັກອີຕູ່, ເກືອ, ແປ້ງນົວ, ນໍ້າປາ, ຄະນໍ, ນໍ້າສະອາດ ແລະ ເຂົ້າເບືອບົດລະອຽດ.

▶ ຂັ້ນຕອນເຮັດ: ລ້າງຜັກຊະນິດຕ່າງໆມາຊອຍໄວ້ ລວມທັງໝາກເຂືອ, ຕັດຕ່ອນເຄື່ອງໃນໃຫ້ພໍດີຄຳ, ຕຳຫົວສີໃຄ, ຫົວຜັກບົ່ວ, ຫົວຜັກທຽມ, ໝາກເຜັດແຫ້ງໃຫ້ລະອຽດ, ຈາກນັ້ນກໍຄ້າງໝໍ້ຂຶ້ນແລ້ວຢອດນໍ້າມັນພືດລົງໄປເລັກໜ້ອຍ ປະມານ 1 ບ່ວງແກງ ແລ້ວຕັກເຄື່ອງທີ່ຕຳລົງໄປຂົ້ວໃຫ້ຫອມ ແລ້ວຈຶ່ງນຳເຄື່ອງໃນໄກ່ລົງໄປຂົ້ວໃຫ້ໝາດແລ້ວຕື່ມນໍ້າລົງໄປໃຫ້ພໍດີພຽງກັບເຄື່ອງໃນ ແລ້ວເຕີມເກືອ, ແປ້ງນົວ, ນໍ້າປາ, ຄະນໍ, ໃບຂີ້ຫູດ, ໝາກເຂືອຊອຍປ່ຽງບາງນ້ອຍລົງໄປຕົ້ມໃຫ້ສຸກແລ້ວ ຕື່ມເຂົ້າເບືອບົດລົງໄປຄົນໃຫ້ເຂົ້າເບືອສຸກຊີມລົດຊາດ ພ້ອມປຸງຕາມໃຈມັກ ຖ້າພໍດີແລ້ວໃຫ້ເອົາຜັກຫອມຊີ, ຜັກຫອມບົ່ວ ແລະ ຜັກອີຕູ່ ລົງໄປຄົນໃຫ້ເຂົ້າກັນອີກຮອບ ກໍສາມາດປິດໄຟພ້ອມຕັກໃສ່ຖ້ວຍພ້ອມເສີບໄດ້.
[ ໂດຍ: ນົກແຕນແວນ ]