ບ້ານເຮົາມີໝາກໄມ້ຕາມລະດູການຫຼາຍ, ມີຜົນຜະລິດກະສິກຳທີ່ສາມາດນຳມາແປຮູບໄດ້ ແຕ່ພວກເຮົາຍັງຂາດເຕັກນິກການຜະລິດ ເປັນສິ່ງທີ່ຕ້ອງເສີມໃຫ້ຫຼາຍໆ ເພື່ອຜະລິດຂາຍໃຫ້ພາຍໃນຫຼຸດຜ່ອນການນຳເຂົ້າ.
ໃນວັນທີ 24 ເມສາ 2023 ທີ່ສູນພັດທະນາສີມືແຮງງານແຂວງສະຫວັນນະເຂດ ໄດ້ຈັດຊຸດຝຶກອົບຮົມ ແລະ ພັດທະນາສີມືແຮງງານ ໃຫ້ກຸ່ມເປົ້າໝາຍຜູ້ວ່າງງານ ກ່ຽວກັບການແປຮູບຜະລິດຕະພັນໝາກກ້ວຍນໍ້າ,ໂດຍການເປັນປະທານຂອງທ່ານ ແຖວຄໍາ ພົມມະວົງ ຮອງຫົວໜ້າພະແນກແຮງງານ-ສະຫວັດດີການສັງຄົມແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ເຊິ່ງການຝຶກອົບຮົມສີມືແຮງງານຄັ້ງນີ້ ມີຜູ້ເຂົ້າຮັບການອົບຮົມ 20 ຄົນ,ທີ່ມາຈາກນະຄອນໄກສອນ ພົມວິຫານ,ເມືອງໄຊບູລີ,ອຸທຸມພອນ,ຈໍາພອນ ແລະ ເມືອງທ່າປາງທອງ.
ການຈັດຊຸດຝຶກອົບຮົມຄັ້ງນີ້ ກໍ່ແມ່ນເພື່ອເຮັດໃຫ້ຜູ້ທີ່ວ່າງງານ ກໍ່ຄືຜູ້ທີ່ມັກໃນການແປຮູບຜະລິດຕະພັນກ້ວຍ ທີ່ຍັງບໍ່ທັນຊໍານິຊໍານານ ໄດ້ນໍາເອົາບົດຮຽນໄປຜັນຂະຫຍາຍໃຫ້ປະສົບຜົນສໍາເລັດ ສາມາດປະກອບອາຊີບໄດ້ໃນວັນຂ້າງໜ້າ.
ໂອກາດເຂົ້າຮ່ວມ ທ່ານ ແຖວຄໍາ ພົມມະວົງ ກໍ່ເນັ້ນວ່າ: ຜູ້ທີ່ມີໂອກາດເຂົ້າອົບຮົມ ກໍ່ຕ້ອງຕັ້ງໃຈ ເກັບກໍາເອົາບົດຮຽນອັນໃໝ່ໆ,ອັນໃດທີ່ບໍ່ເຂົ້າໃຈກ່ຽວກັບ ວິທີແປຮູບກ້ວຍນໍ້າ ຫຼືວ່າໂຕໃດ ທີ່ຕະຫຼາດກໍາລັງຕ້ອງການ ກໍ່ຂໍໃຫ້ຖາມ ເພື່ອແລກປ່ຽນບົດຮຽນ,ເຊິ່ງອັນນີ້ຖືວ່າເປັນອາຊີບ ທີ່ຕິດໂຕເຮົາໃນການຊອກຢູ່ຫາກິນ ແລະ ເປັນອາຊີບອິດສະຫຼະ,ທັງເຮັດໃຫ້ເຮົາມີວຽກເຮັດງານທໍາ ນໍາອີກ.
ໂດຍການຝຶກອົບຮົມແປຮູບຜະລິດຕະພັນກ້ວຍໃນຄັ້ງນີ້ ແມ່ນຈະເນັ້ນໃສ່ການເຮັດເຂົ້າໜົມກ້ວຍຕາກ, ເຂົ້າໜົມກ້ວຍອົບເນີຍ, ກ້ວຍມ້ວນ,ເຂົ້ໜົມກ້ວຍກວນ,ເຊິ່ງການອົບຮົມແມ່ນຈະໄດ້ດໍາເນີນໄປເປັນເວລາ 05 ວັນເຕັມ ຄືນັບແຕ່ວັນທີ 24-28 ເມສາ 2023 ຈິ່ງຈະສໍາເລັດ.
