2022 ເປັນປີທຳອິດທີ່ຫຼາຍປະເທດລວມທັງ ສປປ ລາວເລີ່ມເປີດປະເທດກັບມາຟື້ນຟູສະພາບເສດຖະກິດຫຼັງການລະບາດຂອງພະຍາດໂຄວິດ-19 ຊຶ່ງແນ່ນອນ ເປັນປີທີ່ມີຄວາມຫຍຸ້ງຍາກ ແລະຟຶດເຄືອງພໍສົມຄວນຕໍ່ລະບົບເສດຖະກິດ ເພາະຖີ້ມຊ່ວງດົນບໍ່ມີການໄປມາຫາສູ່ຄ້າຂາຍລະຫວ່າງການລະບາດຂອງໂຄວິດ ແຕ່ມູນຄ່າການຄ້າຂາຍ, ການເປີດທຸລະກິດໃໝ່ກໍ່ມີທ່າອຽງດີຂຶ້ນຫຼາຍຖ້າທຽບໃສ່ປີ 2021.
ຕາມລາຍງານຂອງກະຊວງອຸດສາຫະກຳ ແລະການຄ້າຄ້າໃນວັນທີ 21 ເມສາ 2023 ນີ້ໃຫ້ຮູ້ວ່າ: ໃນປີ 2022 ມູນຄ່າການຜະລິດອຸດສາຫະກໍາປຸງແຕ່ງແມ່ນສາມາດປະຕິບັດ 13.210 ຕື້ກີບ, ເມື່ອທຽບໃສ່ໄລຍະດຽວກັນຂອງປີຜ່ານມາເຫັນວ່າມີອັດຕາເພີ່ມຂຶ້ນ 11,2%.
ດ້ານມູນຄ່າການຈໍລະຈອນສິນຄ້າພາຍໃນແມ່ນບັນລຸໄດ້ 72.622 ຕື້ກີບ, ເມື່ອທຽບໃສ່ໄລຍະດຽວກັນຂອງປີຜ່ານມາເຫັນວ່າມີອັດຕາເພີ່ມຂຶ້ນ 18,87%. ມູນຄ່າການຄ້າຕ່າງປະເທດປະຕິບັດໄດ້ 15.006 ລ້ານໂດລາ, ໃນນີ້ມູນຄ່າສົ່ງອອກກວມເອົາ 8.198 ລ້ານໂດລາສະຫະລັດ, ເມື່ອທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້້ນ 7,5%; ສໍາລັບມູນຄ່ານຳເຂົ້າແມ່ນ 6.808 ລ້ານໂດລາສະຫະລັດ ເມື່ອທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 15,6%.
ທີ່ພົ້ນເດັ່ນອີກອັນໜຶ່ງຄືການຂຶ້ນທະບຽນວິສາຫະກິດແມ່ນມີ 18.076 ຫົວໜ່ວຍ, ລວມທຶນຈົດທະບຽນທັງໝົດ 131,591 ຕື້ກີບ ທຽບໃສ່ໄລຍະດຽວກັນຂອງປີຜ່ານມາ ເຫັນວ່າມີຈຳນວນຫົວໜ່ວຍວິສາຫະກິດທີ່ມາແຈ້ງຂຶ້ນທະບຽນ ເພີ່ມຂຶ້ນ 42,94%, ຂະແໜງການທຸລະກິດທີ່ມີຈຳນວນຫົວໜ່ວຍວິສາຫະກິດ ມີມູນຄ່າການລົງທຶນເພີ່ມຂຶ້ນ ໃນນັ້ນແມ່ນ ວິສາຫະກິດທີ່ກ່ຽວກັບ ການຄ້າ ຂາຍຍົກ-ຂາຍຍ່ອຍ; ສ້ອມແປງລົດຍົນ ແລະ ລົດຈັກ, ການກໍ່ສ້າງ, ອຸດສາຫະກຳປຸງແຕ່ງ, ການເຄື່ອນໄຫວໃຫ້ທີ່ພັກເຊົາ ແລະ ບໍລິການ ອາຫານ, ການຂົນສົ່ງ ແລະ ສາງ…
