ລັດຖະບານອະນຸຍາດໃຫ້ບໍລິສັດ ໄຊຊະນະ ພະລັງງານ ຈໍາກັດຜູ້ດຽວ ສໍາຫຼວດຄວາມເປັນໄປໄດ້ ໃນການພັດທະນາ ໂຄງການພະລັງງານແສງຕາເວັນ ມີກຳລັງຕິດຕັ້ງ 1.000 MW, ມີເນື້ອທີ່ປະມານ 1.152 ເຮັກຕາ ທີ່ແຂວງເຊກອງ ຄາດວ່າຈະມີການລົງທຶນທັງໝົດ ປະມານ 1.200 ລ້ານໂດລາ ເພື່ອສົ່ງອອກໄປຍັງປະເທດໃກ້ຄຽງ.
ພິທີເຊັນບົດບັນທຶກຄວາມເຂົ້າໃຈ ໂຄງການພະລັງງານແສງຕາເວັນ ມີກຳລັງຕິດຕັ້ງ 1.000 ເມກາວັດ(MW) ຢູ່ເຂດບ້ານນາຢອງ, ບ້ານປາກປູນ ເມືອງລະມາມ ແຂວງເຊກອງ ມີຂຶ້ນໃນວັນທີ 11 ເມສາ 2023 ທີ່ກະຊວງແຜນການ ແລະ ການລົງທຶນ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ປອ. ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ປອ. ສີນາວາ ສຸພານຸວົງ ຮອງ ລັດຖະມົນຕີ ກະຊວງ ພະລັງງານ ແລະ ບໍ່ແຮ່, ທ່ານ ສາກົນ ພອນປະເສີດ ຫົວຫນ້າພະແນກ ແຜນການ ແລະ ການລົງທຶນ ແຂວງ ເຊກອງ, ທ່ານ ໄຊພອນ ວິຊາເທບ ປະທານ ບໍລິສັດ ໄຊຊະນະ ພະລັງງານ ຈໍາກັດຜູ້ດຽວ, ທ່ານ ປະສົງ ລັດຕະນະ ປະທານບໍລິສັດ ໂກເທັກດີ ການຄ້າ, ມີບັນດາທ່ານຫົວໜ້າຫ້ອງການ, ຫົວໜ້າກົມ, ຫົວໜ້າພະແນກການກ່ຽວຂ້ອງ ແລະ ແຂວງເຊກອງ ເຂົ້າຮ່ວມ.
ທ່ານ ປະສົງ ລັດຕະນະ ປະທານບໍລິສັດ ໂກເທັກດີ ການຄ້າກ່າວວ່າ: ພວກຂ້າພະເຈົ້າ ຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງ ທີ່ໄດ້ເຂົ້າຮ່ວມພິທີເຊັນ MOU ຂອງໂຄງການໄຟຟ້າແສງຕາເວັນ ທີ່ຕັ້ງຢູ່ເຂດບ້ານນາຢອງ ແລະ ບ້ານປາກປູນ ເມືອງລະມາມ ແຂວງເຊກອງ.
ໂຄງການໄຟຟ້າແສງຕາເວັນ ທີ່ຈະພັດທະນາຂຶ້ນມາໃໝ່ນີ້ ມີກຳລັງຕິດຕັ້ງ 1.000 MW ມີເນື້ອທີ່ດິນທີ່ໄດ້ຮັບການອະນຸຍາດໃຫ້ສຶກສາສຳຫຼວດ ປະມານ 1.152 ເຮັກຕາ ຄາດວ່າຈະມີການລົງທຶນທັງໝົດ ປະມານ 1.200 ລ້ານໂດລາ.ໂດຍຈະພັດທະນາເປັນແຫຼ່ງພະລັງງານໄຟຟ້າຂະໜາດໃຫຍ່ ເພື່ອສົ່ງອອກໄປຍັງປະເທດໃກ້ຄຽງ ເຊັ່ນ: ສສຫວຽດນາມ, ກຳປູເຈຍ ແລະ ປະເທດໄທ ແລະ ຍັງຈະສຶກສາທ່າແຮງໃນການສົ່ງອອກໄປຍັງປະເທດສິງກະໂປເພາະວ່າ ຫວ່າງບໍ່ດົນມານີ້ ສປປ ລາວ ຂອງພວກເຮົາ ກໍໄດ້ມີການເຊັນ MOU ກັບປະເທດສິງກະໂປ ວ່າດ້ວຍການຮ່ວມມືດ້ານພະລັງງານ ລະຫວ່າງ ສອງປະເທດ.ເຫັນວ່າ ບັນດາປະເທດ ທີ່ພວກຂ້າພະເຈົ້າ ມີເປົ້າໝາຍສົ່ງອອກພະລັງງານໄປນັ້ນ ລ້ວນແລ້ວແຕ່ເປັນປະເທດມີຄວາມຕ້ອງການພະລັງງານໄຟຟ້າສູງ ເພື່ອພັດທະນາດ້ານອຸດສາຫະກຳພາຍໃນປະເທດ ທີ່ຈັງຫວະການຂະຫຍາຍຕົວໄວ.
ຂ້າພະເຈົ້າ ມີຄວາມຕັ້ງໃຈເປັນຢ່າງສູງ ແລະ ໃຫ້ຄຳໝັ້ນສັນຍາວ່າ ຈະພັດທະນາໂຄງການນີ້ ໃຫ້ປະສົບຜົນສຳເລັດຕາມແຜນການທີ່ວາງໄວ້ ຖ້າຫາກໂຄງການນີ້ ໄດ້ຮັບການພັດທະນາໃນອະນາຄົດ ຈະສ້າງໂອກາດ ແລະເງື່ອນໄຂອັນດີ ໃຫ້ແກ່ ລັດຖະບານ ແລະ ທ້ອງຖິ່ນ ບໍ່ວ່າຈະເປັນການສ້າງລາຍຮັບທີ່ເປັນເງິນຕາຕ່າງປະເທດ, ສ້າງລາຍຮັບຈາກຄ່າພາກຫຼວງ, ອາກອນກໍາໄລ ການສ້າງວຽກເຮັດງານທຳໃຫ້ແກ່ປະຊາຊົນທ້ອງຖິ່ນ, ການພັດທະນາໂຄງລ່າງພື້ນຖານ,ການພັດທະນາລະບົບສາທາລະນະສຸກ ແລະ ພັດທະນາສັງຄົມຊຸມຊົນ ແລະຮັບການຖ່າຍທອດເຕັກໂນໂລຊີ ແລະນະວັດຕະກຳ ທີ່ທັນສະໄໝຈາກການພັດທະນາໂຄງການດັ່ງກ່າວ ແລະ ສ້າງການໝູນວຽນເງິນຕາພາຍໃນລະບົບເສດຖະກິດແຫ່ງຊາດ ອັນເປັນການປະກອບສ່ວນອັນສຳຄັນ ໃນການພັດທະນາເສດຖະກິດສັງຄົມຂອງປະເທດພວກເຮົາ.
