ສໍານັກຂ່າວຕ່າງປະເທດລາຍງານວ່າ ຊາອຸດີອາຣາມໂກ (Saudi Aramco) ບໍລິສັດນໍ້າມັນລາຍໃຫຍ່ຂອງ ຊາອຸດິ ອາຣາເບຍ ຈະຈັດສົ່ງນໍ້າມັນດິບໃຫ້ແກ່ຜູ້ຊື້ໃນອາຊີເໜືອຫຼາຍລາຍ ຄົບຖ້ວນເຕັມຈໍານວນຕາມສັນຍາ ງວດສົ່ງມອບໃນເດືອນພຶດສະພາ ທີ່ຈະມາເຖິງນີ້ ເຖິງວ່າຈະຫຼຸດກຳລັງການຜະລິດລົງ 500.000 ບາເຣລຕໍ່ວັນ ກໍຕາມ.
ນັກລົງທຶນກໍາລັງຕິດຕາມຍອດການສົ່ງນໍ້າມັນລາຍເດືອນຂອງ ຊາອຸດີ ອາຣາມໂກ ຢ່າງໃກ້ຊິດ ເພາະເປັນຕົວຊີ້ບອກວ່າ ການທີ່ກຸ່ມໂອເປັກພັສ (OPEC Plus) ເຊິ່ງປະກອບມີກຸ່ມປະເທດຜູ້ສົ່ງອອກນໍ້າມັນໂອເປັກ ແລະ ພັນທະມິດ ປະກາດເມື່ອຕົ້ນເດືອນເມສາວ່າ ຈະຫຼຸດກໍາລັງການຜະລິດນ້ຳມັນລົງ 1,16 ລ້ານບາຣ໌ເຣລຕໍ່ວັນ ນັບແຕ່ເດືອນພຶດສະພາ ໄປຈົນເຖິງໝົດປີນີ້ ເຊິ່ງຈະກະທົບຕໍ່ປະລິມານນໍ້າມັນໃນອາຊີ ທີ່ເປັນຕະຫຼາດນໍາເຂົ້ານໍ້າມັນດິບລາຍໃຫຍ່ທີ່ສຸດໃນໂລກ ຫຼືບໍ່?.
ຂະນະທີ່ ແຫຼ່ງຂ່າວຈາກໂຮງກັ່ນນໍ້າມັນໃນອາຊີແຫ່ງໜຶ່ງ ເຜີຍວ່າ: ຕະຫຼາດກຳລັງສົງໄສວ່າ ການຫຼຸດກໍາລັງການຜະລິດໂດຍສະໝັກໃຈດັ່ງກ່າວ ຕ້ອງການເຮັດໃຫ້ປະລິມານນໍ້າມັນໃນຕະຫຼາດໂລກຫຼຸດລົງ ຫຼື ຕ້ອງການເຮັດໃຫ້ລາຄານໍ້າມັນປັບໂຕສູງຂຶ້ນ ເພາະຫຼັງຈາກທີ່ໂອເປັກພັສ ປະກາດຫຼຸດກຳລັງການຜະລິດລົງ ສັນຍາການຊື້-ຂາຍລ່ວງໜ້າຂອງນໍ້າມັນດິບ ເວດເທກຊັສ (West Texas) ແລະ ນໍ້າມັນເບຣນທ໌ (Brent) ກໍປັບຂຶ້ນທັນທີ 6% ກ່ອນປັບລົງມາສູ່ລະດັບດຽວກັນກັບ ເມື່ອເດືອນພະຈິກ ປີ 2022.
ນອກຈາກນີ້, ຊາອຸດີອາຣາມໂກ ຍັງໄດ້ປັບຂຶ້ນລາຄານໍ້າມັນດິບອາຣັບ ໄລຣ໌ (Arab Lite) ທີ່ຈໍາໜ່າຍໃຫ້ແກ່ອາຊີ ໃນງວດເດືອນພຶດສະພາ ເປັນເດືອນທີ 3 ຕິດຕໍ່ກັນ ແລະ ປັບຂຶ້ນລາຄານໍ້າມັນອື່ນໆ ທີ່ຈໍາໜ່າຍໃຫ້ແກ່ລູກຄ້າໃນອາຊີ.
