ນ້ຳຖືເປັນປົດໄຈສຳຄັນສຳລັບຊາວກະສິກອນ ບໍ່ວ່າຈະລ້ຽງຫຼືປູກຫຍັງນ້ຳຍ່ອມເປັນບັນຫາທີ່ຂາດບໍ່ໄດ້ ຍິ່ງຖ້າເປັນທົ່ງນາຍິ່ງຕ້ອງການນ້ຳຫຼາຍ ຄອຍຖ້ານ້ຳຝົນຄົງຍາກທີ່ຈະໄດ້ລົງກ້າຕາມລະດູການ ດັ່ງນັ້ນ, ຊົນລະປະທານຈິ່ງຕ້ອງມີ ເພື່ອສາມາດນຳເອົານ້ຳເຂົ້ານາໄດ້ທຸກລະດູການ.
ໃນວັນທີ 4 ເມສາ 2023 ນີ້ ການນຳເມືອງຈຳພອນ ແຂວງສະຫວັນນະເຂດນຳໂດຍ ທ່ານ ພູລຳພອນ ສີຫາວົງ ເຈົ້າເມືອງໆຈຳພອນ,ທ່ານ ສູນທາລາ ຕົ້ນພານິດ ຮອງຫົວໜ້າ ພະແນກກະສິກຳ ແລະ ປ່າໄມ້ແຂວງ, ທ່ານ ຄອນສະຫວັນ ດວງມາ ຮອງຫົວໜ້າ ຫ້ອງການ ກະສິກຳ ແລະ ປ່າໄມ້ເມືອງຈຳພອນ ພ້ອມດ້ວຍ ນາຍບ້ານແລະວິຊາການ ຂອງໂຄງການ ຊົນລະປະທານ ຫ້ວຍພະແລງ,ໄດ້ລົງສົມທົບ ແລະຕິດຕາມການກໍ່ສ້າງຄອງເໝືອງຂອງຊົນລະປະທານຫ້ວຍພະແລງເມືອງຈຳພອນແຂວງສະຫວັນນະເຂດ.
ໃນການລົງຕິດຕາມໃນຄັ້ງນີ້ ທາງການນຳຂອງເມືອງ ແລະ ໜ່ວຍງານທີ່ກ່ຽວຂ້ອງ ກໍໄດ້ລົງກວດກາ ໃນການ ສືບຕໍ່ການສ້າງຄອງເໝືອງໃຫ້ສຳເລັດ, ການກໍ່ສ້າງຄອງເໝືອງຊົນລະປະທານຫ້ວຍພະແລງແມ່ນ ປະຊາຊົນ ສາມາດຮັບຜົນປະໂຫຍດໄດ້ 05 ບ້ານມີບ້ານ ໜອງລຳຈັນ,ບ້ານ ດົງໝາກຕຸມ,ບ້ານ ເຊວັງເກດ,ບ້ານ ໜອງກະໂດກ,ບ້ານ ລຳເທນ,ເຊິ່ງໃນປັດຈຸບັນມີເນື້ອທີ່ທັງໜົດ ໃນການເຮັດນາແຊງແມ່ນ 437 ເຮັກຕາ ພາຍໃນ 05ບ້ານ.
ສະນັ້ນທາງການນຳຂອງເມືອງຈຶ່ງໄດ້ມີການຕິດຕາມແລະກວດກາເພື່ອຈະສ້າງຄອງເໝືອງໃຫ້ສຳເລັດ,ຖ້າກໍ່ສ້າງຄອງເໝືອງສຳເລັດ ແມ່ນສາມາດຜະລິດລະດູແລ້ງໄດ້ທັງໜົດ 2.000 ເຮັກຕາ ແລະ ປະຊາຊົນສາມາດເຮັດນາແຊງໄດ້ 1.000 ເຮັກຕາ ແລະ ປູກພືດສຳຮອງໄດ້ 1.000 ເຮັກຕາ ພາຍໃນ 05 ບ້ານ ຂອງເມືອງຈຳພອນ.