ໃກ້ມາເຖິງທຸກຂະນະແລ້ວ ການສະເຫຼີມສະຫຼອງບຸນປີໃໝ່ລາວ ພສ 2566 ເປັນໄລຍະເວລາທີ່ມີຄວາມຕ້ອງການສິນຄ້າອຸປະໂພກ-ບໍລິໂພກສູງ ເພື່ອນຳໃຊ້ເຂົ້າໃນການສະເຫຼີມສະຫຼອງງານບຸນປີໃໝ່ ເມື່ອມີຄວາມຕ້ອງການຂອງຜູ້ບໍລິໂພກຫຼາຍຂຶ້ນກໍອາດເຮັດໃຫ້ເກີດມີການສວຍໃຊ້ໂອກາດໃນການປັບຂຶ້ນລາຄາຂາຍສິນຄ້າຂອງຜູ້ປະກອບການຕາມລຳພັງໃຈ.
ສະນັ້ນ, ເພື່ອເປັນເຮັດໃຫ້ລາຄາສິນຄ້າໃນທ້ອງຕະຫຼາດມີສະຖຽນລະພາບເວົ້າສະເພາະ ແມ່ນເພື່ອປົກປ້ອງສິດ ແລະ ຜົນປະໂຫຍດອັນຊອບທຳຂອງຜູ້ຊົມໃຊ້ ພ້ອມທັງຫຼີກເວັ້ນການສວຍໂອກາດຂຶ້ນລາຄາສິນຄ້າ ຕາມລຳພັງໃຈຂອງຜູ້ປະກອບການ ໃນວັນທີ 31 ມີນາຜ່ານມາ ພະແນກອຸດສາຫະກຳ ແລະ ການຄ້າ ແຂວງບໍ່ແກ້ວຈຶ່ງໄດ້ອອກແຈ້ງການສະບັບໜຶ່ງ ເພື່ອເປັນບ່ອງອີງໃນການຄຸ້ມຄອງລາຄາສິນຄ້າ ແລະ ຄ່າບໍລິການ ໃນໄລຍະບຸນປີໃໝ່ລາວ.
ໃຫ້ຜູ້ປະກອບການທຸລະກິດ, ຊາວຄ້າຂາຍ ນໍາສິນຄ້າຂອງຕົນອອກມາຈຳໜ່າຍໃຫ້ພຽງພໍ ພ້ອມຕິດປ້າຍລາຄາເປັນເງິນກີບ ຕາມລາຄາສິນຄ້າທີ່ລັດກຳນົດໃຫ້ ໂດຍສະເພາະແມ່ນໝວດສິນຄ້າຄວບຄຸມເຊັ່ນ: ເຂົ້າກິນ, ຊີ້ນສັດ, ປາ, ຫ້າມກັກຕຸນສິນຄ້າ, ສວຍໂອກາດຂຶ້ນລາຄາຕາມລຳພັງໃຈ ແລະ ອື່ນໆ ທີ່ເປັນການລະເມີດລະບຽບກົດໝາຍ.
ມອບໃຫ້ຂະແໜງການຄ້າພາຍໃນ, ຫ້ອງການອຸດສາຫະກຳ ແລະ ການຄ້າເມືອງ, ແຕ່ງຕັ້ງເຈົ້າໜ້າທີ່ ລົງຕິດຕາມກວດກາ ລາຄາສິນຄ້າ ແລະ ຄ່າບໍລິການ ໃນຕະຫຼອດເທດສະການດັ່ງກ່າວ. ຫາກພົບເຫັນການລະເມີດ ເຊັ່ນ: ການສວຍໂອກາດຂຶ້ນລາຄາສິນຄ້າ ແລະ ການກັກຕູນສິນຄ້າ ໂດຍບໍ່ມີເຫດຜົນ, ບໍ່ຕິດປ້າຍລາຄາສິນຄ້າຕາມທີ່ ລັດກໍານົດ, ການຕິດປະກາດ ຫຼື ໂຄສະນາ ລາຄາສິນຄ້າ ແລະ ຄ່າບໍລິການ ເປັນເງິນຕາຕ່າງປະເທດ, ການວັດແທກການຊັງຜ່ອງ (ຕາຊິງ) ບໍ່ໄດ້ມາດຕະຖານ, ການຈໍາໜ່າຍສິນຄ້າໝົດອາຍຸ, ການຈໍາໜ່າຍສິນຄ້າ ນອກລະບົບ (ສິນຄ້າເຖື່ອນ), ການຈຳໜ່າຍສິນຄ້າລອກຮຽນແບບ ແລະ ອື່ນໆ ແມ່ນໃຫ້ນຳໃຊ້ມາດຕະການກ່າວເຕືອນດ້ວຍການເຮັດບົດບັນທຶກ, ພ້ອມນໍາໃຊ້ມາດຕະການຕາມກົດໝາຍ ແລະ ລະບຽບການ ອື່ນໆ ທີ່ກ່ຽວຂ້ອງ ຢ່າງເຂັ້ມຢ່າງເຂັ້ມງວດ.
