ວັນທີ 19 ມີນາ 2023 ຜ່ານມານີ້ ຄະນະຮັບຜິດຊອບໂຄງການກໍ່ສ້າງຫໍພັກນັກຮຽນ ໂຮງຮຽນມັດທະຍົມສົມບູນເມືອງຊຶມ ເມືອງແອດ ແຂວງຫົວພັນ ໄດ້ລົງກວດກາເບິ່ງສະຖານທີ່ ເພື່ອກໍ່ສ້າງຫໍພັກນັກຮຽນ ຢູ່ເຂດດັ່ງກ່າວ ນຳໂດຍມີທ່ານ ມົນທອງ ລຽນຕິຄຸນ ຫົວໜ້າ ພະແນກສຶກສາທິການ ແລະ ກິລາແຂວງຫົວພັນ, ທ່ານ ວີເຕັ່ງ ຈື່ໄມເຕັ່ງ ຮອງປະທານແນວລາວສ້າງຊາດແຂວງ, ທ່ານ ວົງພັນ ຈັນງາຄຳ ຮອງເຈົ້າເມືອງ-ເມືອງແອດ ພ້ອມດ້ວຍຄະນະຮັບຜິດຊອບຂັ້ນແຂວງ, ຂັ້ນເມືອງ, ຄະນະອຳນວຍການໂຮງຮຽນ, ຄະນະກໍ່ສ້າງຮາກຖານການເມືອງ ແລະ ອຳນາດການປົກຄອງບ້ານເຂດເມືອງຊຶມ 10 ບ້ານເຂົ້າຮ່ວມ.
ໂຄງການກໍ່ສ້າງຫໍພັກນັກຮຽນ ໂຮງຮຽນມັດທະຍົມສົມບູນເມືອງຊຶມ ຕາມການອອກແບບ ແມ່ນເປັນອາຄານຊັ້ນດຽວ ມີລວງຍາວ 56 ແມັດ, ລວງກວ້າງ 6 ແມັດ ນອກນີ້ຍັງຈະກໍ່ສ້າງເຮືອນຄົວ, ອ່າງນໍ້າ, ຫ້ອງນໍ້າຍິງ-ຊາຍ ຊຶ່ງເປັນທຶນລະດົມຈາກຫຼາຍພາກສ່ວນ ນັບແຕ່ສູນກາງ ລົງຮອດທ້ອງຖິ່ນ ຄາດວ່າຈະລະດົມທຶນໃຫ້ໄດ້ 495 ລ້ານກວ່າກີບ ສໍາລັບຊື້ວັດສະດຸຕ່າງໆ ແລະ ຄ່າບໍລິສັດຜຮັບເໝົາກໍ່ລ້າງ ໂດຍແມ່ນຄະນະກຳມະການສູນກາງແນວລາວສ້າງຊາດ, ແນວລາວສ້າງຊາດແຂວງ, ພະແນກສຶກສາທິການ ແລະ ກິລາແຂວງ, ແນວລາວສ້າງຊາດເມືອງ ແລະ ຫ້ອງການສຶກສາທິການ ແລະ ກິລາເມືອງ ເປັນຄະນະຮັບຜິດຊອບ; ຕາມການຄົ້ນຄ້ວາປຶກສາກອງປະຊຸມໄດ້ເຫັນດີເປັນເອກະພາບຄື: ປະຊາຊົນ 10 ບ້ານ ເຂດເມືອງຊຶມຈະໄດ້ຊ່ວຍປະກອບສ່ວນຄື: ຫີນແຮ່ 100 ແມັດກ້ອນ, ຊາຍ 150 ແມັດກ້ອນ, ໄມ້ໂຄງຫຼັງຄາ-ໄມ້ຕີແບບ-ໄມ້ເພຕີດານ-ໄມ້ເຮັດຕຽງນອນ 28 ແມັດກ້ອນ ເຊິ່ງບໍລິສັດຜູ້ຮັບເໝົາກໍ່ສ້າງຈະນໍາເອົາກົນຈັກໃນການຈົກແຮ່-ຊາຍ ແລະ ຕັດໄມ້ເລື່ອຍໄມ້ໃຫ້ທັງໝົດ ສ່ວນປະຊາຊົນເປັນຈະໄດ້ຊ່ວຍເປັນແຮງງານ ນອກນີ້ຍັງມີປະຊາຊົນຈະໄດ້ພ້ອມກັນປະກອບສ່ວນເປັນໄມ້ຄໍ້າແບບເຊິ່ງໄລ່ເປັນມູນຄ່າ 100 ລ້ານກວ່າກີບ.
ໂຄງການກໍ່ສ້າງຫໍພັກນັກຮຽນ ໂຮງຮຽນມັດທະຍົມສົມບູນເມືອງຊຶມ ເມືອງແອດ ແຂວງຫົວພັນ ຕັ້ງຢູ່ບ້ານເມືອງຊຶມ ໂດຍຫ່າງຈາກເທດສະບານເມືອງແອດ ປະມານ 43 ກິໂລແມັດ ແຕ່ສະພາບເສັ້ນທາງໄປ-ມາແມ່ນພົບຄວາມຫຍຸ້ງຍາກຫຼາຍ ເຊິ່ງໃຊ້ເວລາເດີນທາງ ປະມານ 3 ຊົ່ວໂມງກວ່າຈິ່ງໄປຮອດ, ເຂດເມືອງຊຶມ ປະກອບມີ 10 ບ້ານ ແຕ່ລະບ້ານແມ່ນຫ່າງໄກໂຮງຮຽນ ໂດຍສະເພາະໂຮງຮຽນມັດທະຍົມສົມບູນ ໃນໄລຍະຜ່ານມາ ເພື່ອໃຫ້ລູກ-ຫຼານໄດ້ສຶກສາຮໍ່າຮຽນ ພໍ່ແມ່ຜູ້ປົກຄອງຂອງນ້ອງຫຼານນັກຮຽນຜູ້ມີເງື່ອນໄຂ ກໍໄດ້ພາກັນມາປຸກຕູບ (ເຮືອນນ້ອຍ) ພັກເຊົາຢູ່ໃກ້ໂຮງຮຽນທີ່ໂຮງຮຽນໄດ້ກຳນົດໃຫ້ນັ້ນເພື່ອໃຫ້ລູກຕົນເອງໄດ້ເຂົ້າຮຽນຕາມເກນອາຍຸ ຍ້ອນເຫັນໄດ້ເຖີງຄວາມຫຍຸ້ງຍາກລຳບາກຂອງໂຮງຮຽນເຂດນີ້ ໂດຍສະເພາະແມ່ນເຫັນໄດ້ເຖິງຄວາມສຳຄັນຂອງວຽກງານການສຶກສາ ແລະ ກິລາ ບວກກັບຄວາມເອົາໃຈໃສ່ຂອງ ພັກ-ລັດ ສະນັ້ນຫຼາຍພາກສ່ວນຈິ່ງໄດ້ລະດົມທຶນ ເພື່ອມາກໍ່ສ້າງຫໍພັກໃຫ້ນັກຮຽນ ແລະ ຄູສອນ ໃຫ້ມີບ່ອນພັກເຊົາຖາວອນ ໃຫ້ລູກ-ຫຼານນັກຮຽນໄດ້ສຸມສະຕິປັນຍາໃສ່ການຮຽນ-ການສອນ ໃຫ້ສະດວກ ແລະໄດ້ຮັບຄຸນນະພາບຂຶ້ນເລື້ອຍໆ.
