ໃນວັນທີ 2 ມີນາ 2023 ທີ່ສູນກາງຊາວໜຸ່ມປະຊາຊົນປະຕິວັດລາວ ສະມາຄົມນັກທຸລະກິດໜຸ່ມ ແຫ່ງຊາດ (ສທໜຊ) ໄດ້ຈັດກອງປະຊຸມ ຄົບຄະນະບໍລິຫານງານ ສະມາຄົມນັກທຸລະກິດໜຸ່ມ ທົ່ວປະເທດ ປີ 2022 ແລະ ທິດທາງ 2023 ຂຶ້ນ, ໂດຍການເປັນປະທານຂອງທ່ານ ມອນໄຊ ລາວມົວຊົ່ງ ເລຂາຄະນະບໍລິຫານງານພັກ, ຮອງເລຂາຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ (ສຊປລ), ທ່ານ ຄຳແສນ ສີສະວົງ ເລຂາທິການ ສຊປລ, ປະທານ ສະມາຄົມນັກທຸລະກິດໜຸ່ມ ແຫ່ງຊາດ, ທ່ານ ນາງ ສຸວາລີ ຄຳຜຸຍ ຮອງປະທານ ສທໜຊ, ພ້ອມມີບັນດານັກທຸລະກິດໜຸ່ມໃນຂອບເຂດທົ່ວປະເທດ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ສຸວາລີ ຄຳຜຸຍ ຮອງປະທານ ສທໜຊ ກ່າວບາງຕອນວ່າ: ກອງປະຊຸມ ຄົບຄະນະບໍລິຫານງານ ສະມາຄົມນັກທຸລະກິດໜຸ່ມ ທົ່ວປະເທດ ຄັ້ງນີ້ຈຸດປະສົງ ເພື່ອສະຫຼຸບການເຄື່ອນໄຫວວຽກງານ ປີ 2022 ຢ່າງຮອບດ້ານກ່ຽວກັບຜົນສຳເລັດຂອງການຈັດຕັ້ງປະຕິບັດທິດທາງ, ຄາດໝາຍ ແລະ ການຈັດຕັ້ງປະຕິບັດວຽກງານທີ່ຜ່ານມາ, ຍົກໃຫ້ເຫັນຜົນສຳເລັດ, ສິ່ງຄົງຄ້າງທີ່ທ້າທາຍ ແລະ ບົດຮຽນທີ່ຖອດຖອນໄດ້ ເພື່ອເອົາໄປປັບປຸງໃນຕໍ່ໜ້າ ພ້ອມກັນນັ້ນ, ກໍ່ກຳນົດທິດທາງແຜນພັດທະນາ ປະຈໍາປີ 2023; ຮັບຟັງການລາຍງານຫຍໍ້ ການເຄື່ອນໄຫວທີ່ຜ່ານມາ ແລະ ແຜນການຕໍ່ໜ້າຂອງ ຂອງປະທານ ສທໜ ແຂວງ; ການມີຄຳເຫັນເພີ່ມຂອງທ່ານ ປະທານສະມາຄົມ ຕໍ່ບົດສະຫຼຸບຂອງ ສທໜທົ່ວປະເທດ ແລະ ລົງເລິກເຖິງບັນຫາທ້າທາຍຂໍ້ຄົງຄ້າງຕ່າງໆ ແລະ ຊີ້ນຳໃຫ້ແກ່ ສະມາຄົມ; ມີບໍລິສັດທີ່ເປັນສະມາຊິກຂຶ້ນມານຳສະເໜີທຸລະກິດ ເພື່ອຊອກຫາຄູ່ຮ່ວມມື ໃນການຂະຫຍາຍທຸລະກິດໃຫ້ເຕີບໂຕທົ່ວປະເທດ. ພ້ອມນັ້ນຍັງມີເວທີສົນທະນາ ແລະ ແລກປ່ຽນຂອງນັກທຸລະກິດໃນຫົວຂໍ້ຜະລິດສິນຄ້າພາຍໃນແລະ ສົ່ງອອກ.
ທ່ານ ວິບູນ ສິດທິມໍລະດາ ຮອງປະທານ ສທໜຊ ກ່າວບາງຕອນວ່າ: ການເຄື່ອນໄຫວວຽກງານທີ່ພົ້ນເດັ່ນແຕ່ລະດ້ານໃນໄລຍະ 2022 ປີຜ່ານມາໄດ້ມີຜົນສຳເລັດວຽກງານອັນພົ້ນເດັ່ນ ຫຼາຍດ້ານທັງ ກິດຈະກຳດ້ານອົງການຈັດຕັ້ງມະຫາຊົນ, ດ້ານການສົ່ງເສີມ MSME ແລະ ສ້າງຄວາມເຂັ້ມແຂງໃຫ້ສະມາຊິກ ສທໜຊ ທົ່ວປະເທດ, ການຮ່ວມມືກັນຢູ່ພາຍໃນ ແລະ ຕ່າງປະເທດ, ການຮ່ວມມືກັບຕ່າງປະເທດ, ການວາງແຜນການລົງທຶນ, ດ້ານການເງິນ ແລະ ການຕະຫຼາດ, ດ້ານອຸດສາຫະກຳ ແລະ ການຄ້າ, ວຽກງານການກວດກາ.
ແຕ່ຄຽງຄູ່ກັບຜົນສຳເລັດຫຼາຍດ້ານທີ່ຍາດມາໄດ້ ຍັງເຫັນວ່າມີສິ່ງທ້າທາຍຄື: 1). ປີທີ່ຜ່ານມາ ເຖິງແມ່ນວ່າ ການລະບາດຂອງພະຍາດໂຄວິດ-19 ໄດ້ຮັບການຄວບຄຸມ ແລະ ຫຼຸດລົງແລ້ວ ແຕ່ສະພາບເສດຖະກິດ ໂດຍລວມຍັງມີຄວາມຫຍຸ້ງຍາກ, ໃນໄລຍະດຽວກັນກໍ່ມີສະພາບຄວາມຂັດແຍ່ງຂອງປະເທດມະຫາອໍານາດ ສົ່ງຜົນກະທົບຕໍ່ລາຄານໍ້າມັນ ແລະ ອັດຕາເງິນເຟີ້, ທັງໝົດນີ້ເຮັດໃຫ້ມີຄວາມທ້າທາຍຕໍ່ສະມາຄົມສະມາຊິກໃນການປະຕິບັດວຽກງານຕ່າງໆ ເຊິ່ງບາງທຸລະກິດໄດ້ຮັບຜົນກະທົບຈົນຢຸດໂຈະກິດຈະການ ແລະ ບາງກໍ່ຄືກິດທຸລະກິດກໍ່ຍັງຢູ່ໃນໄລຍະຄ່ອຍໆປັບໂຕ, ໃນໄລຍະການຟື້ນຟູຫຼັງການລະບາດ, ສທໜ ຕ້ອງສືບຕໍ່ຮັດແໜ້ນຄວາມສາມັກຄີ ບຸກບືນສ້າງຄວາມເຂັ້ມແຂງໃຫ້ສະມາຄົມ, ສະຫນັບສະຫນູນ ແລະ ຮ່ວມມືກັນໃຫ້ຫຼາຍຂຶ້ນ; 2) ວຽກງານຫ້ອງການ ແລະ ບຸກຄະລາກອນປະຈໍາ (ເລຂາທິການ) ຍັງຕ້ອງໄດ້ຮັບການປັບປຸງ ແລະ ມີການມອບຫມາຍຫນ້າທີຈາກຄະນະປະທານ ເພື່ອຮັບປະກັນການເຄື່ອນໄຫວ ແລະ ແຜນການຂອງສະມາຄົມໄດ້ຮັບການປະຕິບັດຢ່າງມີປະສິດທິຜົນ; 3) ຄວາມເຂົ້າໃຈຂອງສະມາຊິກຕໍ່ກັບພາລະບົດບາດຂອງ ສທໜ ທັງ ສທໜຊ ແລະ ສທໜຂ ກໍ່ເຊັ່ນດຽວກັນ; 4) ຄວາມເສຍສະຫຼະຍັງມີໜ້ອຍ ໃນການປະກອບສ່ວນງົບປະມານໃນການເຄື່ອນໄຫວຂອງສະມາຄົມ ເນື່ອງຈາກສະມາຄົມເປັນອົງກອນທີ່ບໍ່ມີຜົນກໍາໄລ; 5) ການປະຕິບັດຫນ້າທີ່ພາລະບົດບາດຂອງ ຄະນະປະທານ, ຄະນະບໍລິຫານງານ ບາງທ່ານຍັງບໍ່ສອດຄ່ອງ ແລະ ບໍ່ເປັນໄປຕາມການວາງແຜນທີ່ກໍານົດໄວ້ ເຮັດໃຫ້ການດຳເນີນງານບາງວຽກງານ ມີຄວາມລ່າຊ້າ.
ສ່ວນບັນຫາທີ 6) ເຖິງແມ່ນວ່າ ສະມາຊິກ ຈຳນວນ 1/3 ໄດ້ມີການປະກອບສ່ວນດ້ານວັດຖຸ ແລະ ງົບປະມານໃນກິດຈະກຳເປັນປະຈຳແຕ່ອີກ 1/3 ຂອງສະມາຊິກເມື່ອເຂົ້າມາແລ້ວກໍ່ບໍ່ເຄື່ອນໄຫວຕາມພາລະບົດບາດຂອງຕົນ; 7) ການປະສານງານລະຫວ່າງ ສທໜຂ ແລະ ສທໜຊ ມີລັກສະນະເອກະເທດ ໂດຍສະເພາະການມີສ່ວນຮ່ວມໃນກິດຈະກໍາວຽກງານອັນສໍາຄັນຕ່າງໆທີ່ ສທໜ ຈັດຂຶ້ນ; 8) ໂຄງປະກອບການຈັດຕັ້ງ ສທໜຊ ຍັງບໍ່ໄດ້ຮັບການເຜີຍແຜ່ ສູ່ສະມາຊິກ; 9) ການເຂົ້າເຖິງ ແລະ ປຸກລະດົມການມີສ່ວນຮ່ວມຂອງບັນດາສະມາຊິກຍັງບໍ່ກວ້າງ, ເຮັດໃຫ້ຫຼາຍກິດຈະກຳເປັນຜູ້ສະຫນັບສະໜຸນເດີມໆ; 10) ຍັງບໍ່ສາມາດສັງລວມແຜນການ-ແຜນງານ ຂອງບັນດາພະແນກການໄດ້; 11) ຍັງມີຄວາມທ້າທາຍໃນການຈັດເກັບຄ່າສະມາຊິກ; 12) ຕໍ່ບັນຫານີ້ ສທໜຊ ຍັງບໍ່ສາມາດເຕົ້າໂຮມກິດຈະກຳການຮ່ວມມືລົງທຶນພາຍໃນສະມາຊິກ ສທໜຊ ແລະ ສທໜຂ; 13) ຍັງບໍ່ໄດ້ຈັດງົບປະມານສໍາຮອງໃນການບໍລິຫານວຽກງານ ສທໜຊ ເຊິ່ງຢ່າງຫນ້ອຍ 3 ເດືອນ; 14) ບາງກິດຈະກຳ ເປັນວຽກງານດ່ວນ ຈິ່ງເຮັດໃຫ້ມີການເຄື່ອນໄຫວວຽກງານໄປກ່ອນ ໂດຍບໍ່ມີແຜນເຮັດໃຫ້ວຽກຂອງຄະນະກວດກາ ໄດ້ມີການທົບທວນຄືນຫລາຍຂັ້ນຕອນ.
ທ່ານ ຄຳແສນ ສີສະວົງ ປະທານ ສທໜຊ ກ່າວບາງຕອນວ່າ: ສະມາຊິກຂອງ ສະມາຄົມນັກທຸລະກິດໜຸ່ມ ແຫ່ງຊາດ (ສທໜຊ) ເຮົາຜ່ານມາເຖິງວ່າຈະມີການເຕີບໃຫຍ່ຂະຫຍາຍຕົວຢ່າງຕັ້ງໜ້າ, ແຕ່ຄຽງຄູ່ກັບການເຕີບໂຕຂອງສະມາຄົມທັງ ສທໜຊ ແລະ ສທໜຂ ຍັງເຫັນວ່າ ສະມາຊິກນັກທຸລະກິດໜຸ່ມຈຳນວນໜຶ່ງຍັງບໍ່ມີຄວາມຫ້າວຫັນ, ບໍ່ມີຄວາມກະຕືລືລົ້ນ, ຍັງບໍ່ມີການພັດທະນາຄວາມຮູ້ຄວາມສາມາດເທົ່າທີ່ຄວນ, ຍັງບໍ່ມີຄວາມກ້າໃນການຕັດສິນໃຈ ເພື່ອເຮັດແນວໃດໃຫ້ນັກທຸລະກິດລາວໄປລົງທຶນຢູ່ຕ່າງປະເທດ ຄືກັບ ນັກທຸລະກິດຕ່າງປະເທດທີ່ກ້າຕັດສິນໃຈມາລົງທຶນ ຫຼື ຮ່ວມທຶນຢູ່ລາວ.
ທ່ານກ່າວຕື່ມວ່າ: ການເຮັດທຸລະກິດຂອງສະມາຊິກນັກທຸລະກິດໜຸ່ມພວກເຮົາແມ່ນເຮັດເປັນແບບຄອບຄົວ, ຍັງມີລັກສະນະການແຂ່ງຂັນກັນຫຼາຍກວ່າເປັນຄູ່ຮ່ວມ, ຍັງຖືເບົາໃນການສົ່ງເສີມ ແລະ ໃຊ້ບໍລິການເຊິ່ງກັນ ແລະ ກັນ, ຍັງບໍ່ມີຄວາມສາມັກຄີກັນແບບປຶກແຜ່ນ ຖ້າເຮົາມີຄວາມສາມັກຄີກັນ ຮ່ວມແຮງຮ່ວມໃຈກັນບາງໂຄງການໃຫຍ່ໆໃນປະເທດລາວເຮົາກໍເຮັດໄດ້ ແລະ ອີກອັນໜຶ່ງການຄັດເລືອກເອົານັກທຸລະກິດໜຸ່ມເຂົ້າມາເປັນສະມາຊິກໃໝ່ ຢູ່ບັນດາແຂວງ ຫຼື ນະຄອນຫຼວງ ອັນນີ້ຢາກໃຫ້ຄັດເລືອກຄົນເກັ່ງ, ຄົນຫ້າວຫັນໃນການພັດທະນາຕົນເອງ ແລະ ມີຄວາມກ້າຕັດສິນໃຈອັນຈະເປັນແບບຢ່າງໃຫ້ນັກທຸລະກິດໜຸ່ມລຸ້ນຕໍ່ໆໄປ.
ພ້ອມນີ້ພາຍໃນກອງປະຊຸມຍັງໄດ້ມີຂຶ້ນສະເໜີໂດນຫຍໍ້ ການເຄື່ອນໄຫວປີຜ່ານມາ ແລະ ທິດທາງຕໍ່ໜ້າຂອງ ສທໜຂ 10 ແຂວງ, ການນຳສະເໜີໂຄງການ ເພື່ອຊອກຫາຟອກາດໃນການລົງທຶນເພື່ອພັດທະນາທຸລະກິດນຳເຂົ້າ ແລະ ສົ່ງອອກ, ການສົນທະນາ ການສົ່ງເສີມການຜະລິດພາຍໃນ ແລະ ການສົ່ງອອກ, ມອບ-ຮັບ ຫຼຽນກາ 65 ປີສູນກາງຊາວໜຸ່ມປະຊາຊົນປະຕິວັດລາວອີກດ້ວຍ.
