ຂ່າວ CRI ລາຍງານວ່າ: ຂ່າວສານເປມເປີຂອງອາເມຣິກາ ໄດ້ນຳເອົາຕົວເລກຂໍ້ມູນຈາກຄັງປັນຍາຫັນປ່ຽນຮູບແບບພະລັງງານອາໂກຣາຂອງເຢຍລະມັນ ມາລາຍງານວ່າ ເມື່ອຮອດປີ 2030 ລັດຖະບານເຢຍລະມັນ ຈະເສຍງົບປະມານຫຼາຍກວ່າ 1 ພັນຕື້ໂດລາ ເພື່ອຮັບມືກັບຄວາມສ່ຽງ ແລະ ສິ່ງທ້າທາຍດ້ານວິກິດການພະລັງງານ.
ນັບແຕ່ ຣັດເຊຍ ເປີດປະຕິບັດການທາງທະຫານພິເສດຕໍ່ ອູ ແກຣນ ຕັ້ງແຕ່ທ້າຍເດືອນກຸມພາ 2022 ເປັນຕົ້ນມາ, ຫຼາຍປະເທດໃນເອີຣົບ ໄດ້ຮ່ວມກັບ ອາເມຣິກາ ດຳເນີນການມາດຕະການລົງໂທດຕໍ່ ຣັດເຊຍ ເປັນຫຼາຍຮອບ, ຍ້ອນວ່າເຢຍລະມັນ ໄດ້ອາໄສພະລັງງານຂອງ ຣັດເຊຍ ໃນລະດັບສູງ. ສະນັ້ນ, ເສດຖະກິດເຢຍລະມັນ ຈຶ່ງໄດ້ຮັບຜົນກະທົບຢ່າງໜັກໜ່ວງຈາກເລື່ອງດັ່ງກ່າວນີ້.
ທ່ານ ມາເຊວ ຟຣາສເຊີ ຫົວໜ້າສະຖາບັນຄົ້ນຄວ້າເສດຖະກິດເຢຍລະມັນ ເຊິ່ງເປັນອົງການຄົ້ນຄວ້າເສດຖະກິດທີ່ມີອິດທິພົນຂອງເຢຍລະມັນ ກ່າວວ່າ: ລາຄາພະລັງງານຂອງເຢຍລະມັນ ໃນປີ 2022 ໄດ້ເພີ່ມຂຶ້ນ 34,7% ເມື່ອທຽບໃສ່ປີ 2021, ເຮັດໃຫ້ເຢຍລະມັນປະສົບກັບຄວາມເສຍຫາຍໂດຍກົງ ມູນຄ່າ 100 ຕື້ເອີໂຣ ໃນປີ 2022, ເກືອບເທົ່າກັບ 2,5% ຂອງລວມຍອດຜະລິດຕະພັນພາຍໃນ ຫຼື GDP ເຢຍລະມັນໃນປີ 2022.
