ໃນວັນທີ 15 ກຸມພາ 2023 ຜ່ານມາ ທີ່ໂຮງຮຽນເຕັກນິກ-ວິຊາຊີບແບບປະສົມ ແຂວງສາລະວັນ (ຮຕ.ສວ), ທີ່ເມືອງເລົ່າງາມ ແຂວງສາລະວັນ ໄດ້ມີພິທີເຊັນບົດບັນທຶກຄວາມເຂົ້າໃຈ MOU ລະຫວ່າງ ທ່ານ ສິດທິເດດ ຈັນທະບຸດດີ ຜູ້ອໍານວຍການໂຮງຮຽນເຕັກນິກ-ວິຊາຊີບ ແບບປະສົມແຂວງສາລະວັນ (ຮຕ.ສວ) ກັບ ທ່ານ ນາງ ວົງຈັນ ພັນທະວົງ ປະທານບໍລິສັດ ສຸກໃຈ ສາລະວັນ ຂາອອກ-ຂາເຂົ້າ ຈຳກັດຜູ້ດຽວ. ໂດຍການເຂົ້າຮ່ວມເປັນສັກຂີພິຍານໂດຍ ທ່ານ ສົມໃຈ ອຸ່ນຈິດ ຮອງເຈົ້າແຂວງໆສາລະວັນ, ພ້ອມມີທ່ານ ມະໄລວອນ ສີປະເສີດ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ທ່ານ ທອງສາ ຕຸ່ນມະນີສອນ ຮອງຫົວໜ້າພະແນກສຶກສາທິການ ແລະ ກິລາ ແຂວງສາລະວັນ ແລະ ພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງໃນການເຊັນສັນຍາຮ່ວມມືຄັ້ງນີ້ ເພື່ອເສີມຂະຫຍາຍການຮ່ວມມືທາງດ້ານກະສິກໍາ (ການປູກຝັງ ແລະ ລ້ຽງສັດ) ເປົ້າໝາຍແມ່ນເຮັດໃຫ້ຄູອາຈານ ແລະ ນັກຮຽນ ຂອງໂຮງຮຽນມີລາຍຮັບ ແລະ ນັກສຶກສາເວລາຮຽນຈົບມີວຽກເຮັດງານທຳ; ເພື່ອເພີ່ມທະວີການພົວພັນ ແລະ ການຮ່ວມມືໃນດ້ານທຸລະກິດໃຫ້ມີຄວາມໜັ້ນຄົງແບບຍືນຍົງ. ເຊິ່ງເນື້ອໃນການຮ່ວມມືທັງສອງຝ່າຍໄດ້ເປັນເອກະພາບແບ່ງໜ້າທີ່ຄວາມຮັບຜິດຊອບ ໂດຍທາງໂຮງຮຽນຕ້ອງຈັດຕັ້ງກອງປະຊຸມໃນໄລຍະ 6 ເດືອນ ຫາ 1 ປີ ເພື່ອຖອດຖອນ ແລະ ແລກປ່ຽນບົດຮຽນ, ກຳນົດ ແລະ ວາງແຜນການດໍາເນີນງານກັບຄູ່ຮ່ວມມື; ສ້າງສິ່ງອຳນວຍຄວາມສະດວກ ແລະ ຄວບຄຸມການເຄື່ອນໄຫວຂອງຄະນະຮັບຜິດຊອບ, ພະນັກງານປະສານງານ; ຕາມການຕົກລົງເຫັນດີກັນໃນການກ້າເບ້ຍໄມ້ທີ່ຈະເອົາມາສະໜອງໃຫ້ຄູ່ຮ່ວມມື 2 ຊະນິດຄື: ເບ້ຍໄມ້ປະດັບ ແລະ ເບ້ຍໄມ້ກິນໜາກ, ສ່ວນເບ້ຍໄມ້ກິນໜາກຕ້ອງໄດ້ລະບຸຈະແຈ້ງວ່າເບ້ຍເພາະພັນ ຫຼື ເບ້ຍຕອນຫງ່າ.
ການກ້າເບ້ຍໄມ້ທັງສອງປະເພດແມ່ນຈະກ້າເບ້ຍໄມ້ຕາມຄວາມຕ້ອງການຂອງຕະຫຼາດ, ສະໜອງຝຸ່ນຊີວະພາບແບບຊະນິດນໍ້າ ແລະ ຊະນິດແຫ້ງ ໃຫ້ກັບຄູ່ຮ່ວມມື; ເຂົ້າຮ່ວມຂະບວນການຕ່າງໆ ທີ່ຄູ່ຮ່ວມມືຈັດຂື້ນຕາມຄວາມເໝາະສົມ. ສ່ວນທາງບໍລິສັດ ສຸກໃຈສາລະວັນ ຂາອອກ-ຂາເຂົ້າ ຈຳກັດຜູ້ດຽວ ສະໜັບສະໜູນດ້ານວຽກງານວິຊາການ ແລະ ໃຫ້ການຮ່ວມມືໃນການປະສານພົວພັນ, ການທັດສະນະສຶກສາ, ການຝຶກງານ ແລະ ການປະກອບອາຊີບໃຫ້ແກ່ຜູ້ຮຽນຈົບ ຕາມຄວາມເໝາະສົມ; ເກັບກຳຂໍ້ມູນຄວາມຕ້ອງການຂອງລູກຄ້າວ່າລູກຄ້າຕ້ອງການເບ້ຍໄມ້ປະເພດໃດ, ຊະນິດໃດແລ້ວປະສານຫາຄູ່ຮ່ວມມື ເພື່ອສະໜອງໃຫ້ໄດ້ຕາມຄວາມຕ້ອງການຂອງຕະຫຼາດ; ເປັນເຈົ້າການໃນການເຂົ້າຮ່ວມປະຊຸມປຶກສາຫາລື, ແຜນການດຳເນີນງານຮ່ວມກັບໂຮງຮຽນເຕັກນິກວິຊາຊີບແບບປະສົມ ແຂວງສາລະວັນ; ຊອກຫາແຫຼ່ງຕະຫຼາດສົ່ງອອກຜະລິດຕະພັນ ແລະ ການບໍລິການຂອງຄູ່ຮ່ວມມື. ເຊິ່ງໄລຍະເວລາຈັດຕັ້ງປະຕິບັດ ເລີ່ມປະຕິບັດ ນັບແຕ່ມື້ລົງລາຍເຊັນເປັນຕົ້ນໄປ.
ທ່ານ ນາງ ວົງຈັນ ພັນທະວົງ ປະທານບໍລິສັດ ສຸກໃຈ ສາລະວັນ ຂາອອກ-ຂາເຂົ້າ ຈຳກັດຜູ້ດຽວ ກ່າວບາງຕອນວ່າ: ການເຊັນສັນຍາຮ່ວມມືກັນລະຫວ່າງບໍລິສັດພວກເຮົາ ກັບ ທີ່ໂຮງຮຽນເຕັກນິກ-ວິຊາຊີບແບບປະສົມ ແຂວງສາລະວັນຄັ້ງນີ້ ຖືວ່າເປັນນິມິດໝາຍທີ່ດີໃນການຮ່ວມມມືກັນທີ່ຈະຂັບເຄື່ອນການພັດທະນາຊັບພະຍາກອນມະນຸດ ເວົ້າລວມເວົ້າສະເພາະແມ່ນເພື່ອສ້າງວິຊາຊີບດ້ານກະສິກຳ ໃຫ້ນັກຮຽນ-ຄູ ສະໜອງເບ້ຍໄມ້ປະດັບຢູ່ພາຍໃນແຂວງສາລະວັນໃຫ້ຢູ່ໃນລາຄາຈັບຕ້ອງໄດ້, ພ້ອມນີ້ຍັງເປັນການຊ່ວຍໃຫ້ນັກສຶກສາໄດ້ມີວຽກເຮັດງານທຳ ແລະ ນຳໄປຕໍ່ຍອດເປັນເຈົ້າຂອງທຸລະກິດ ຫຼື ເປັນຜູ້ປະກອບການຈຸນລະວິສາຫະກິດໃນຕໍ່ໜ້າ.
ເຊິ່ງແຂວງສາລະວັນເປັນແຂວງທີ່ມີມູນເຊື້ອດ້ານກະສິກຳຢູ່ແລ້ວ ດັ່ງນັ້ນການສະໜອງເບ້ຍໄດ້ຕ່າງໆໃຫ້ແກ່ຜູ້ປູກ ຈຶ່ງມີຄວາມຈຳເປັນ ແລະ ມີຄວາມສຳຄັນ ບໍລິສັດຈຶ່ງຢາກພັກດັນໃຫ້ກາຍເປັນອາຊີບ ທີ່ຊ່ວຍສ້າງລາຍຮັບໃຫ້ແກ່ນັກຮຽນ ແລະ ຄູ ຢູ່ໂຮງຮຽນເຕັກນິກ-ວິຊາຊີບແບບປະສົມ ແຂວງສາລະວັນໃນອະນາຄົດ.
