ການແຂ່ງຂັນເຕະບານ ນັດພິເສດ ມິດຕະພາບລະຫວ່າງ ທີມສື່ມວນຊົນສາຍກີລາ ຫຼື ນັກຂ່າວກີລາ ພົບກັບ ທີມເອວ ເອັບ ເອັມ ເອວ (L.F.M.L) ຫຼື ທີມລວມນັກທຸລະກິດໜຸ່ມລາວ ຈັດຂຶ້ນ ເມື່ອວັນທີ 1 ກຸມພາ ຜ່ານມາ ທີ່ສະໜາມກີລາບານເຕະຫຍ້າທ່ຽມເຟີຣາຣີ ເມືອງໄຊເຊດຖາ ນະຄອນຫຼວງວຽງຈັນ ເພື່ອສ້າງຂະບວນການຊົມເຊີຍຜົນສຳເລັດໃນການສະເຫຼີມສະຫຼອງວັນສ້າງຕັ້ງກອງທັບ ປະຊາຊົນລາວ ຄບົຮອບ 74 ປີ ແລະ ວັນສ້າງຕັ້ງກຳມະບານລາວ ຄົບຮອບ 67 ປີ ໃຫ້ມີຄວາມໝາຍຢ່າງເລີກເຊິ່ງ ແລະ ເປັນຂະບວນການຢ່າງຟົດຟື້ນ.
ສຳລັບການພົບກັນລະຫວ່າງ ທີມສື່ມວນຊົນສາຍກີລາ ຫຼື ນັກຂ່າວກີລາ ກັບ ທີມລວມນັກທຸລະກິດໜຸ່ມລາວ ຊຶ່ງສ່ວນໃຫຍ່ແມ່ນເປັນໜຶ່ງໃນບັນດາຜູ້ທີ່ມັກຮັກໃນການກີລາ ແລະ ມີບົດບາດໃນການສົ່ງເສີມສະໜັບສະໜູນການພັດທະນາກີລາລາວ ໂດຍສະເພາະແມ່ນທ່ານ ບຸນມີ ຫຼ່ຽມໄຊຍະຈັກ ປະທານສະໂມສອນ ຟຸດຊໍ ເບປີ້ງແບ້ສະຫວັນ ທັງເປັນຜູ້ບໍລິຫານສະໜາມກີລາບານເຕະຫຍ້າທ່ຽມເຟີຣາຣີ ແລະ ທ່ານ ທິບພະເນດ ແກ້ວມະນິວົງ ປະທານສະໂມສອນ ມາສດາ ຈີບີ ເອັບຊີ ທັງເປັນເຈົ້າຂອງບໍລິສັດ ແກ້ວໂອໂຕກຣຸບ ຜູ້ຈຳໜ່າຍລົດ Mazda ພຽງຜູ້ດຽວໃນສປປ ລາວ ແລະ ຜູ້ປະກອບການອື່ນໆທີ່ເຮັດທຸລະກິດທາງດ້ານຮ້ານອາຫານ ແລະ ທຸລະກິດອື່ນໆ ພາຍໃນນະຄອນຫຼວງວຽງຈັນ ນອກຈາກ ເປັນການຮ່ວມກັນສ້າງຂະບວນການສະເຫຼີມສະຫຼອງສອງວັນປະຫວັດສາດແລ້ວ ກຍັງເປັນການສ້າງຄວາມຮັກແພງສາມັກຄີມິດຕະພາບ ທີ່ທັງສອງພາກສ່ວນດັ່ງພົບກັນເປັນຄັ້ງປະຖົມມະເລີກ ໃຫ້ນັບມື້ເຕີບໃຫຍ່ກວ້າງຂວາງຂຶ້ນເລື້ອຍໆ ຜ່ານການແຂ່ງຂັນຜົນປະກົດວ່າ ທີມສື່ມວນຊົນສາຍກີລາ ເປັນຝ່າຍເອົາຊະນະ L.F.M.L ໄປແບບຫວຸດຫວິດ 8-7 ປະຕູ.
