ເປັນເລື່ອງລາວທີ່ໜ້າຍິນດີ ແລະຊື່ນຊົມສຳລັບ ການອອກແຮງງານລວມຂອງຊາວເມືອງກາສີ ແຂວງວຽງຈັນທີ່ຕ້ອງໃຊ້ເວລາໃນການລວມພົນມາເຮັດແນວທີ່ເປັນປະໂຫຍດແກ່ຊຸມຊົນ.
ໃນຕອນເຊົ້າຂອງວັນທີ 2 ກຸມພາ 2023 ນີ້, ເມືອງກາສີ ແຂວງວຽງຈັນ ໄດ້ສ້າງຂະບວນການອອກແຮງງານລວມ ຂຶ້ນຢູ່ທີ່ຂົວຂ້າມລະຫວ່າງບ້ານວຽງແກ້ວຫາບ້ານນາໂພ.
ການອອກແຮງງານຄັ້ງນີ້ ນຳພາໂດຍ ທ່ານ ຄຳອ້ວນ ສຸວັນທອງ ຮອງເຈົ້າເມືອງໆກາສີ, ມີບັນດາທ່ານຄະນະປະຈໍາ-ກຳມະການພັກເມືອງ, ມີຫົວໜ້າ-ຮອງຫົວໜ້າຫ້ອງການ, ພະນັກງານ-ລັດຖະກອນຫ້ອງການອ້ອມຂ້າງເມືອງ, ມີທະຫານ, ຕໍາຫຼວດ ແລະ ພໍ່ແມ່ປະຊາຊົນເຂົ້າຮ່ວມຢ່າງຫຼວງຫຼາຍ.
ການສ້າງຂະບວນອອກແຮງງານລວມໃນຄັ້ງນີ້ແມ່ນໄດ້ພ້ອມກັນນຳເອົາໄມ້ມາສ້ອມແປງຂົວດັ່ງກ່າວທີ່ເປ່ເພບໍ່ສາມາດທຽວໄປມາໄດ້ ໃຫ້ກັບຄືນມາໃຊ້ໄດ້ຄືເກົ່າ ແລະດີກວ່າເກົ່າ ເພື່ອຄວາມສະດວກສະບາຍຂອງຊຸມຊົນທ້ອງຖິ່ນ.
ອັນສຳຄັນກວ່ານັ້ນແມ່ນ ເພື່ອເປັນການສ້າງຄວາມສາມັກຄີລະຫວ່າງອຳນາດການປົກຄອງເມືອງ, ພະນັກງານ-ລັດຖະກອນຕະຫຼອດຮອດປະຊາຊົນບັນດາເຜົ່າໃຫ້ມີຄວາມໃກ້ຊິດລຶ້ງເຄີຍກັນຫຼາຍຂຶ້ນ.
