ບໍລິສັດນິຍົມລາວຈະເລີນຊັບກໍ່ສ້າງອະສັງຫາລິມະຊັບ ຈໍາກັດ ພາຍຫຼັງໄດ້ດຳເນີນການສຶກສາຄວາມເປັນໄປໄດ້ມາໄລຍະໜຶ່ງ ຮອດມື້ນີ້ໄດ້ເລິກງາມຍາມດີໃນການລົງມືກໍ່ສ້າງສູນການຄ້າຕະຫຼາດນິຍົມລາວຈະເລີບຊັບແລ້ວ ແລະຄາດວ່າຈະໃຊ້ເວລາ 2 ປີປາຍໃຫ້ສຳເລັດພ້ອມເປີດນຳໃຊ້.
ວັນທີ 22 ມັງກອນຜ່ານມານີ້, ຢູ່ເດີ່ນຕະຫຼາດເກົ່າບ້ານຫຼັກ 20 ໄດ້ມີພິທີຕັ້ງເສົາເອກມຸງຄຸນ ສູນການຄ້າຕະຫຼາດນິຍົມລາວຈະເລີນຊັບ, ໃຫ້ກຽດເຂົ້າຮ່ວມໂດຍທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ, ທ່ານ ບົວພອນ ຄໍາທະວີ ປະທານບໍລິສັດນິຍົມລາວຈະເລີນຊັບກໍ່ສ້າງອະສັງຫາລິມະຊັບ ຈໍາກັດ, ມີຮອງເຈົ້າເມືອງຄໍາເກີດ, ພ້ອມດ້ວຍການນຳຂອງເມືອງ ແລະ ພະແນກການທີ່ກ່ຽວຂ້ອງເຂົ້າຮ່ວມ.
ທ່ານ ບົວພອນ ຄໍາທະວີ ໄດ້ໃຫ້ຮູ້ວ່າ: ໂຄງການກໍ່ສ້າງສູນການຄ້າຕະຫຼາດນິຍົມລາວຈະເລີນຊັບແມ່ນນອນຢູ່ໃນບູລິມະສິດຂອງເມືອງຄໍາເກີດ ແລະ ເປັນທ່າແຮງອັນໜຶ່ງທີ່ປະກອບສ່ວນເຂົ້າໃນການທໍາມາຄ້າຂາຍ ເປັນຈຸດລວມຂອງການແລກປ່ຽນຊື້-ຂາຍສິນຄ້າຂອງພໍ່ແມ່ປະ ຊາຊົນບັນດາເຜົ່າພາຍໃນ ແລະ ພາຍນອກ ເວົ້າລວມ, ເວົ້າສະເພາະ ກໍແມ່ນບ່ອນຊື້-ຂາຍສິນຄ້າຂອງພໍ່ແມ່ປະຊາຊົນຢູ່ໃນເມືອງຄໍາເກີດເປັນສ່ວນໃຫຍ່.
ໂຄງການກໍ່ສ້າງສູນການຄ້າຕະຫຼາດນິຍົມລາວ ປະກອບດ້ວຍອາຄານທີ່ທັນສະໄໝ ແລະ ມີຂະໜາດກວ້າງ 49X60 ແມັດ, ສູງ 9 ແມັດ, ມີຫ້ອງຂາຍ 158 ຫ້ອງ, ມີບ່ອນຈອດລົດໃຫຍ່ 200 ຄັນ ແລະ ມູນຄ່າການລົງທຶນປະມານ 46 ຕື້ກີບ ແລະ ຄາດຄະເນຈະໄດ້ທຶນຄືນໃນ 39 ປີ ແລະ ການກໍ່ສ້າງເລີ່ມລົງມແຕ່ເດືອນມັງກອນ 2023-ເດືອນກໍລະກົດ 2025 ລວມໄລຍະເວລາການກໍ່ສ້າງແມ່ນ 30 ເດືອນໃຫ້ສໍາເລັດ 100%.
ຂ່າວຈາກ: ໜັງສືພິມແຂວງບໍລິຄຳໄຊ