ປະຕິບັດຕາມແນວທາງນະໂຍບາຍຂອງພັກ-ລັດ ເມື່ອເຮັດດີມີຜົນງານຕ້ອງຍ້ອງຍໍຊົມເຊີຍ ຍົກໃຫ້ເປັນແບບຢ່າງແກ່ສັງຄົມ ກົງກັນຂ້າມເມື່ອຜິດພາດກໍ່ຕ້ອງຍອມຮັບປັບປຸງ ແລະສ້າງສາເອົາກັນ.
ໃນຕອນບ່າຍຂອງວັນທີ 19 ມັງກອນ 2023 ພະແນກອຸດສາຫະກຳ ແລະການຄ້າ ແຂວງບໍລິຄຳໄຊ ໄດ້ຈັດພິທີມອບໃບຢັ້ງຢືນ ໂຮງງານນ້ຳດື່ມບໍລິສຸດ ແສງແກ້ວ SK ເປັນໂຮງງານອຸດສາຫະກຳຕົວແບບແຫ່ງທຳອິດຂອງແຂວງບໍລິຄຳໄຊຂື້ນ , ໂດຍການເປັນປະທານຂອງທ່ານ ບູນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ຜູ້ຊີ້ນຳວຽກງານເສດຖະກິດ.
ໂຮງງານ ນ້ຳດື່ມແສງແກ້ວ SK (ນໍ້າດື່ມວັນ) ຕັ້ງຢູ່ບ້ານ ທົ່ງນ້ອຍ ເມືອງປາກຊັນ ແຂວງ ບໍລິຄຳໄຊ ໃນພິທີ ທ່ານ ໄກສອນ ຈັນສີນາ ຫົວໜ້າພະແນກອຸດສາຫະກຳ ແລະ ການຄ້າແຂວງ ໄດ້ຂື້ນລາຍງານ ແລະ ຜ່ານຂໍ້ຕົກລົງ ວ່າດ້ວຍການຮັບຮອງເອົາໂຮງງານນ້ຳດື່ມ ແສງແກ້ວ SK (ນ້ຳດື່ມວັນ ) ເປັນໂຮງງານອຸດສາຫະກຳຕົວແບບແຫ່ງທຳອິດຂອງແຂວງ. ໃຫ້ກຽດເຂົ້າຮ່ວມ ແລະ ມອບໃບຢັ້ງຢືນໂດຍທ່ານ ບຸນເສັງ ປະທຳມະວົງ ຮອງເຈົ້າແຂວງ ແລະ ຮັບໂດຍທ່ານ ນາງ ວັນນາລີ ເຮືອນນະວົງສາ ປະທານບໍລິສັດວັນນະແສງການຄ້າ ຈຳກັດ, ມີຕາງໜ້າສະພາປະຊາຊົນແຂວງ ແລະ ພະແນກການທີ່ກ່ຽວຂ້ອງເຂົ້າຮ່ວມ.
ທ່ານ ນາງ ວຽງນະສອນ ອຸນາລົມ ອຳນວຍການບໍລິສັດວັນນະແສງ ການຄ້າຈຳກັດ ໄດ້ໃຫ້ຮູ້ວ່າ: ໂຮງງານນໍ້າດື່ມບໍລິສຸດແສງແກ້ວ ກໍຄືນ້ຳດື່ມວັນ ແມ່ນໜຶ່ງໃນກິດຈະການທຸລະກິດ ຂອງບໍລິສັດວັນນະແສງການຄ້າ ຈຳກັດ ຊຶ່ງໂຮງງານຕັ້ງຢູ່ ແຄມທາງເລກທີ 4B ບ້ານ ທົ່ງນ້ອຍ ເມືອງປາກຊັນ ສ້າງຕັ້ງຂຶ້ນໃນປີ 2017, ໄດ້ຮັບການຢັ້ງຢືນ ອາຫານ ແລະ ຢາ ແລະ ຜະລິດຈໍາໜ່າຍ ປີ 2018, ຜະລິດນໍ້າດື່ມບັນຈຸຕຸກປລາສຕິກໃນ 4 ຂະໜາດ ຄື: 230 ມລ, 350 ມລ, 600 ມລ ແລະ 1.500 ມລ. ຂະບວນການຜະລິດນໍ້າດື່ມ ແມ່ນນໍາໃຊ້ເຄື່ອງຈັກທັນສະໄໝ ໄດ້ມາດຖານສາກົນ ມີກໍາລັງການຜະລິດໄດ້ 12.000 ລິດ/ວັນ.
ປະຈຸບັນສາມາດຂະຫຍາຍ ຕະຫຼາດຈຳໜ່າຍຢູ່ 3 ແຂວງຄື: ແຂວງບໍລິຄຳໄຊ, ໄຊສົມບູນ ແລະ ແຂວງຊຽງຊວາງ ແລະ ບາງສໍານັກງານອົງການ ຢູ່ນະຄອນຫຼວງວຽງຈັນ ນອກນັ້ນທາງໂຮງງານຍັງໄດ້ຮັບຄວາມເຊື່ອໝັ້ນຈາກລູກຄ້າ ໃຫ້ຜະລິດນໍ້າດື່ມພາຍໃຕ້ສະຫຼາກທີ່ເປັນອັນສະເພາະຂອງລູກຄ້າ ເປັນຕົ້ນແມ່ນໂຮງແຮມດອກຈຳປາ, ໂຮງຮຽນແຕ່ງທອງ, ບັນດາຮ້ານອາຫານ ແລະ ບໍລິສັດເອກະຊົນ ທັງພາຍໃນແຂວງ ແລະ ຕ່າງແຂວງ.
ຜ່ານການຈັດຕັ້ງປະຕິບັດແຕ່ເລີ່ມຕົ້ນມາເຖິງປະຈຸບັນ ຜະລິດຕະພັນຂອງໂຮງງານໄດ້ພົບກັບບາງສິ່ງທ້າທາຍ ເປັນຕົ້ນ ຄູ່ແຂ່ງທາງດ້ານລາຄາ, ຄ່ານິຍົມຂອງຜູ້ບໍລິໂພກ, ການສົ່ງເສີມການຂາຍຂອງຜະລິດຕະພັນອື່ນໆທີ່ມີມາກ່ອນ, ຊ່ອງທາງການຈັດຈຳໜ່າຍ, ການຜະລິດ ແລະ ຍອດຂາຍເພີ່ມຂຶ້ນ 12%ຕໍ່ປີ, ສ້າງວຽກເຮັດງານທຳໃຫ້ປະຊາຊົນທ້ອງຖິ່ນ ໂດຍສະເພາະ ພາຍໃນແຂວງ ອັນທີ່ພົ້ນເດັ່ນທີ່ສຸດແມ່ນ ເຮັດໃຫ້ການຜະລິດດັ່ງກ່າວຍາດໄດ້ກາໝາຍ ສິນຄ້າໜຶ່ງເມືອງໜຶ່ງຜະລິດຕະພັນ ຫຼື ໂອດອບ ແຫ່ງຊາດໃນ ປີ 2019 ແລະ ໄດ້ກາໝາຍ Made in Laos ໃນປີ 2022, ຊຶ່ງເປັນຜະລິດຕະພັນອຸດສາຫະກໍາທໍາອິດຂອງແຂວງ ແລະ ໄດ້ຮັບລາງວັນນັກທຸລະກິດຊັ້ນນໍາດີເດັ່ນ ຈາກສະພາການຄ້າ ອຸດສາຫະກຳແຫ່ງຊາດ ປີ 2021.
ນອກຈາກນັ້ນ, ໂຮງງານຍັງແມ່ນໂຮງງານນ້ຳດື່ມແຫ່ງທຳອິດ ແລະ ແຫ່ງດຽວ ໃນແຂວງ ທີ່ໄດ້ຮັບການຢັ້ງຢືນມາດຕະຖານ GHP ສາກົນ (ມາດຕະຖານຄວາມປອດໄພ ດ້ານອາຫານ ແລະ ການຜະລິດທີ່ດີ) ເຊິ່ງການຢັ້ງຢືນມາດຕະຖານດັ່ງກ່າວ ແມ່ນຮັບຮູ້ໃນທົ່ວໂລກ ເຊິ່ງສາມາດສົ່ງອອກໄປຕະຫຼາດໃນພາກພື້ນ ແລະ ສາກົນໄດ້.
