ເປີດສັບປະດາ ຊັບສິນທາງປັນຍາ ປະຈໍາປີ 2022 ພາຍໃຕ້ຄໍາຂວັນ “ໜຶ່ງຜະລິດຕະພັນ ເປັນໜຶ່ງຊັບສິນທາງປັນຍາ through IP “

47

ກົມຊັບສິນທາງປັນຍາ ກະຊວງອຸດສາຫະກຳ ແລະ ການຄ້າ (ອຄ) ເປີດງານສັບປະດາ ຊັບສິນທາງປັນຍາ ປະຈຳປີ 2022 ຂຶ້ນ ໃນວັນທີ 19 ມັງກອນ 2023 ທີ່ສູນການຄ້າວຽງຈັນເຊັນເຕີ ໂດຍການເຂົ້າຮ່ວມຂອງທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ມີບັນດາທ່ານຫົວໜ້າກົມ-ຮອງຫົວໜ້າກົມ, ຫົວຫ້ອງການ, ພະແນກອຸດສາຫະກໍາ ແລະ ການຄ້າ ແຂວງ ແລະ ນະຄອນຫຼວງ ແລະ ແຂກທີ່ຖືກເຊີນເຂົ້າຮ່ວມ.


ທ່ານ ນາງ ສີດາ ຢູຕຼີຈັນທະຈັກ ຮັກສາການແທນຫົວໜ້າກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ ກ່າວວ່າ: ງານສັບປະດາຊັບສິນທາງປັນຍາ ປະຈໍາປີ 2022 ໃນຄັ້ງນີ້ ຈະໄດ້ຈັດຂຶ້ນເປັນ ເວລາ 4 ວັນ ໃນລະຫວ່າງວັນທີ 19-22 ມັງກອນ 2023 ໃນງານດັ່ງກ່າວ ແມ່ນຈະໄດ້ມີພິທີເປີດການນໍາໃຊ້ລະບົບການຢື່ນຄໍາຮ້ອງຂໍຈົດທະບຽນຊັບສິນອຸດສາຫະກໍາຜ່ານທາງອອນລາຍ (E-filling) ຢ່າງເປັນທາງການ ເຊິ່ງໂຄງການ E-filling ແມ່ນໄດ້ລິເລີ່ມແຕ່ປີ 2018 ເປັນຕົ້ນມາໂດຍການສະໜັບສະໜູນຂອງອົງການຊັບສິນທາງປັນຍາໂລກ ແລະ ທຶນຮອນຈໍານວນໜຶ່ງຈາກໂຄງການ (USAID) LBE ໂດຍມີທະນາຄານການຄ້າຕ່າງປະເທດລາວ ມະຫາຊົນ (BCEL) ເປັນຄູ່ຮ່ວມພັດທະນາໃນການສ້າງລະບົບໂອນເງິນຜ່ານ I-Banking, ລະບົບດັ່ງກ່າວ ເປັນລະບົບທີ່ທັນສະໄໝ ທີ່ຈະຊ່ວຍອໍານວຍຄວາມສະດວກໃຫ້ແກ່ສັງຄົມ ໃນການຈົດທະບຽນຊັບສິນອຸດສາຫະກໍາ ຜ່ານທາງອອນລາຍ, ມີຂໍ້ມູນທີ່ຖືກຕ້ອງຊັດເຈັນ ກ່ຽວກັບຊັບສິນທາງປັນຍາ, ມີຄວາມສະດວກວ່ອງໄວ ແລະ ປະຢັດເວລາ.


ພາຍໃນງານ ມີການວາງສະແດງຜົນງານທາງດ້ານຊັບສິນທາງປັນຍາ ແລະ ໂຄສະນາເຜີຍແຜ່ ຄວາມຮູ້ທາງດ້ານຊັບສິນທາງປັນຍາ ໃຫ້ແກ່ສາລະນະຊົນ ໂດຍສະເພາະໄວໜຸ່ມ ແລະ ຜູ້ປະກອບການ ໄດ້ຮັບຮູ້ ແລະ ເຫັນໄດ້ຄວາມສໍາຄັນຂອງວຽກງານຊັບສິນທາງປັນຍາ ຕໍ່ການພັດທະນາເສດຖະກິດ-ສັງຄົມ ແລະ ວັດທະນະທໍາ ເພື່ອເຮັດໃຫ້ມວນຊົນ ໂດຍສະເພາະ ແມ່ນນັກຄົ້ນຄວ້າ, ນັກວິທະຍາສາດ, ນັກປະດິດສ້າງ, ນັກປະດິດຄິດແຕ່ງ, ນັກຮຽນຮູ້ນັກສຶກສາ ໄດ້ຮັບຮູ້ຂໍ້ມູນຂ່າວສານ ກ່ຽວກັບວຽກງານຄຸ້ມຄອງ ແລະ ການປົກປ້ອງຊັບສິນທາງປັນຍາ ເຊັ່ນ: ສິດທິບັດ, ອະນຸສິດທິບັດ, ແບບອຸດສາຫະກຳ, ແບບຜັງວົງຈອນລວມ, ເຄື່ອງໝາຍການຄ້າ, ຖິ່ນກໍາເນີດ, ພັນພືດໃໝ່, ລິຂະສິດ ແລະ ສິດກ່ຽວຂ້ອງກັບລິຂະສິດ ແລະ ພູມປັນຍາພື້ນບ້ານອັນເປັນມູນເຊື້ອ ໃນການພັດທະນາເສດຖະກິດ-ສັງຄົມ ແລະ ວັດທະນະທຳ.


ພ້ອມກັນນີ້ ຍັງເປັນການສະແດງເຖິງ ການເຄົາລົບສິດ ແລະ ການປົກປ້ອງຜົນປະໂຫຍດ ຂອງນັກຄົ້ນຄວ້າ, ນັກປະດິດສ້າງ ແລະ ນັກປະດິດຄິດແຕ່ງ ເພື່ອຊຸກຍູ້ສົ່ງເສີມຄວາມຄິດສ້າງສັນ ຂອງປະຊາຊົນບັນດາເຜົ່າ ຊື່ງປີນີ້ຄໍາຂວັນຂອງງານສັບປະດາຊັບສິນທາງປັນຍາແມ່ນ “ ໜຶ່ງຜະລິດຕະພັນ ເປັນໜຶ່ງຊັບສິນທາງປັນຍາ through IP ” ທັງນີ້ກໍເປັນການສົ່ງເສີມທຸລະກິດ SMEs ນໍາໃຊ້ຊັບສິນທາງປັນຍາເຂົ້າໃນການສ້າງມູນຄ່າທາງດ້ານທຸລະກິດຢ່າງມີປະສິດທິພາບ. ດັ່ງນັ້ນ, ທາງກົມກໍໄດ້ຄັດເລືອກເອົາບາງບໍລິສັດ SMEs ທີ່ໄດ້ນໍາໃຊ້ຊັບສິນທາງປັນຍາເຂົ້າໃນການຂະຫຍາຍຕະຫຼາດອອກສູ່ຕ່າງປະເທດເປັນກຸ່ມທໍາອິດ ໂດຍສະເພາະແມ່ນການນໍາໃຊ້ລະບົບການທະບຽນສາກົນກ່ຽວກັບເຄື່ອງໝາຍ ( Madrid Protocol) ເພື່ອສົ່ງເສີມການສົ່ງອອກສິນຄ້າຂອງຕົນ ແລະ ຈະມີພິທີມອບໃບຍ້ອງຍໍ ໃນວາລະພິທີ່ຄັ້ງນີ້.


ນອກນັ້ນ ພວກເຮົາຈະມີງານວາງສະແດງ 6 ສິນຄ້າຖິ່ນກໍາເນີດ ຂອງ ສປປ ລາວ ທີ່ໄດ້ຮັບການຈົດທະບຽນເປັນຖິ່ນກໍາເນີດ, ສິນຄ້າໂອດ໋ອບ, ສິນຄ້າຜູ້ປະກອບການ SMEs, ຜົນງານຮູບແຕ້ມ ຂອງສະມາຄົມວິຈິດສິນ ແລະ ອື່ນໆ ລວມທັງໝົດ 20 ຮ້ານວາງສະແດງ, ພ້ອມນັ້ນ ກໍມີງານສໍາມະນາບັນດາຫົວຂໍ້ຕ່າງໆ ທີ່ກ່ຽວຂ້ອງກັບຊັບສິນທາງປັນຍາ, ການປະກວດແຂ່ງຂັນແຕ່ງບົດຄວາມ, ການແຂງຂັນອອກແບບເຄື່ອງໝາຍການຄ້າ ທີ່ຈະນໍາໃຊ້ໃນຜະລິດຕະພັນ ຫຼື ການບໍລິການໃດໜຶ່ງ ແລະ ການນໍາສະເໜີບັນດາສິນຄ້າຖິ່ນກໍາເນີດຂອງ ສປປ ລາວ ອີກດວ້ຍ.

ສຳລັບ 4 ບໍລິສັດທີ່ມີຜົນງານດີເດັ່ນໄດ້ຈົດທະບຽນສາກົນກ່ຽວກັບເຄື່ອງໝາຍໂດຍຜ່ານລະບົບ Madrid ເປັນບໍລິສັດທໍາອິດຂອງ ສປປລາວ ມີ: ບໍລິສັດດາວເຮືອງ ຂາເຂົ້າ-ຂາອອກ, ບໍລິສັດຈໍາປາລາວການກະເສດ ຂາເຂົ້າ-ຂາອອກ, ບໍລິສັດປູກມອນລ້ຽງມ້ອນ ແລະ ສາວໄໝ,ບໍລິສັດ Animal doctor`s international sole.


[ຂ່າວ;ພາບ: ຄຳນ້ອຍ+ມະນີວອນ]