ປະເທດເຮົາ ຈາກສະພາບເສດຖະກິດທີ່ອ່ອນນ້ອຍຢູ່ແລ້ວ ແລະບໍທັນເຂັ້ມແຂງພໍ ພັດມາພົບກັບມໍລະສຸມຈາກເຊື້ອພະຍາດລະບາດເຮັດໃຫ້ທົ່ວໂລກບໍໄດ້ທຳມາຫາກິນຄ້າຂາຍໃນໄລຍະ 2 ປີກວ່າມານີ້ ເຮັດໃຫ້ຍິ່ງໜັກເຂົ້າໄປຕື່ມ ເຊິ່ງບັນຫາທັງໝົດຈະບໍສາມາດແກ້ໄຂໄດ້ໃນເວລາດຽວກັນ ແຕ່ຂະແໜງແຜນການ ແລະການລົງທຶນເຫັນວ່າ ມີບາງໜ້າວຽກທີ່ຕ້ອງຮີບຮ້ອນແກ້ໃຫ້ດີຂຶ້ນໃນປີ 2023 ນີ.
ທ່ານ ຄຳເຈນ ວົງໂພສີ ລັດຖະມົນຕີ ກະຊວງແຜນການ ແລະ ການລົງທຶນ ໄດ້ກ່າວໃນ ກອງປະຊຸມສະຫຼຸບວຽກງານ ແຜນການ ແລະ ການລົງທຶນ ທົ່ວປະເທດ ປະຈຳປີ 2022 ແລະ ທິດທາງປີ 2023 ຄັ້ງວັນທີ 17-18 ມັງກອນ 2023 ນີ້ວ່າບາງຂໍ້ຄົງຄ້າງທີ່ຕ້ອງໄດ້ເອົາໃຈໃສ່ແກ້ໄຂຄື: ການຕອບສະຫນອງຂໍ້ມູນດ້ານການວາງແຜນ, ການລົງທຶນ, ທີ່ດິນ ແລະ ອື່ນໆ ຍັງບໍ່ທັນສົມຄູ່ກັບຄວາມຕ້ອງການໃນເງື່ອນໄຂໃຫມ່; ວິທີການເກັບກຳ, ເນື້ອໃນ, ເຄື່ອງມືການເກັບກຳ, ການລາຍງານຂໍ້ມູນຍັງບໍ່ທັນສາມາດລວມສູນ, ເປັນເອກະພາບ ແລະ ທັນເວລາ.
ການຄຸ້ມຄອງໂຄງການລົງທຶນຂອງລັດ ຂອງບາງຂະແໜງການ ແລະ ທ້ອງຖິ່ນ ຍັງປະຕິບັດບໍ່ໄດ້ດີເທົ່າທີ່ຄວນ ໂດຍສະເພາະການຕິດຕາມການຄຸ້ມຄອງໂຄງການລົງທຶນຂອງລັດ ຢູ່ຂັ້ນທ້ອງຖິ່ນ, ຍັງບໍ່ທັນສາມາດເກັບກໍາຂໍ້ມູນການປະມູນໂຄງການ, ການຢັ້ງຢືນການຈັດຕັ້ງປະຕິບັດໂຄງການ ແລະ ອື່ນໆ. ການຄົ້ນ ຄວ້ານະໂຍບາຍສໍາລັບການຕໍ່ສັນຍາ, ການດັດແກ້ມູນຄ່າໂຄງການທີ່ຕິດພັນກັບການເໜັງຕີງຂອງລາຄາວັດສະດຸກໍ່ສ້າງໃນທ້ອງຕະຫຼາດຍັງຢູ່ໃນຂັ້ນຕອນການຄົ້ນຄວ້າ ເນື່ອງຈາກບັນຫາດັ່ງກ່າວເປັນບັນຫາກວມລວມ ແລະ ຕິດພັນກັບຫຼາຍຂະແໜງການ ແລະ ທ້ອງຖິ່ນ ຕ້ອງໄດ້ປຶກສາາຫລືກັບພາກສ່ວນກ່ຽວຂ້ອງ ແລະ ລາຍງານຂໍທິດຊີ້ນໍາຈາກລັດຖະບານຕື່ມ.
ລະບົບການບໍລິການການລົງທຶນປະຕູດຽວຕ້ອງໃຫ້ໄດ້ນຳໃຊ້ຢ່າງມີປະສິດທິຜົນ ການພິຈາລະນາອະນຸມັດຕົວຈິງ ຍັງຜ່ານຫຼາຍຂັ້ນຕອນ ແລະ ໃຊ້ເວລາຫຼາຍ ໂດຍສະເພາະ ໃນຂອດການຂໍຄໍາເຫັນກັບຂະແໜງ ແລະ ທ້ອງຖິ່ນສ່ວນຫຼາຍ ຍັງບໍ່ສາມາດດຳເນີນໄດ້ຕາມກຳນົດເວລາ.
ການນຳໃຊ້ນະໂຍບາຍສົ່ງເສີມການລົງທຶນ ເພື່ອເປັນເຄື່ອງມືໃນການສົ່ງເສີມການພັດທະນາ ຍັງບໍ່ທັນມີປະສິດທິພາບ ແລະ ບໍ່ມີຈຸດສຸມ, ຍັງບໍ່ທັນໄດ້ກໍານົດຂະແໜງການຍ່ອຍ ແລະ ກິດຈະການທີ່ຕ້ອງການສົ່ງເສີມ ຕາມແຜນຍຸດທະສາດຂອງຂະແໜງການໃນແຕ່ລະໄລຍະອອກເປັນນິຕິກໍາ ແລະ ມີລະບຽບການໃນການປະຕິບັດ ລວມທັງບັນຫາການຊົດເຊີຍເນື້ອທີ່ດິນຍັງປະຕິບັດໄດ້ຊັກຊ້າ.
ນອກຈາກນີ້ ວຽກງານການຊ່ວຍເຫຼືອທາງການເພື່ອການພັດທະນາ: ການຈັດຕັ້ງປະຕິບັດບາງໂຄງການບໍ່ໄປ ຕາມຂອບເວລາທີ່ກຳນົດໄວ້, ມີການຕໍ່ອາຍຸການປະຕິບັດໂຄງການ ແລະ ການເບີກຈ່າຍເງິນໂຄງການບໍ່ໄດ້ຕາມແຜນ ການລາຍງານຊັກຊ້າ ແລະ ບາງຄັ້ງຂໍ້ມູນຍັງບໍ່ແທດຕົວຈິງ; ການສັງລວມຄວາມຕ້ອງການທຶນສົມທົບຂອງລັດຖະບານຍັງມີຄວາມຫຍຸ້ງຍາກໃນການປະສານເອົາຂໍ້ມູນນໍາບັນດາກະຊວງ ຂະແໜງການ ແລະ ທ້ອງຖິ່ນ; ການຫັນເປັນທັນສະໄຫມໂດຍຫັນມານຳໃຊ້ລະບົບຖານຂໍ້ມຸນ ໂອດາມິດ ຍັງມີຄວາມຊັກຊ້າ ແລະບໍ່ທົ່ວເຖິງ; ການເບີກຈ່າຍ ແລະ ການຄາດຄະເນແຜນເບີກຈ່າຍເງິນຕົວຈິງໃນແຕ່ລະໄລຍະຂອງໂຄງການ ຍັງບໍ່ທັນເຮັດໄດ້ ເປັນຕົ້ນ ໂຄງການທີ່ບໍ່ຜ່ານລະບົບການເບີກຈ່າຍຂອງຄັງເງິນແຫ່ງຊາດ.
ວຽກງານການກວດກາຍັງພົບຫຼາຍບັນຫາທີ່ເລັ່ງທວງໃຫ້ປັບປຸງແກ້ໄຂໂດຍສະເພາະ ສະພາບການລົງຕິດຕາມບັນດາໂຄງການແລະປະສານສົມທົບກັບທ້ອງຖິ່ນ ຍັງບໍ່ໄປຕາມແຜນ ແລະ ຊັກຊ້າ; ຍັງພົບຫຼາຍບັນຫາທີ່ຄ້າງຄາເຊັ່ນ: ໂຄງການໃໝ່ໃນປີ 2022 ຫຼາຍໂຄງການບໍ່ທັນໄດ້ເຊັນສັນຍາຮັບເໝົາກໍ່ສ້າງ ແລະຍັງບໍ່ທັນໄດ້ປະຕິບັດໜ້າວຽກເນື່ອງລາຄາວັດສະດຸກໍ່ສ້າງເໜັງຕິງເພີ່ມຂຶ້ນເຮັດໃຫ້ບໍລິສັດຍື່ນຊອງປະມູນເກີນມູນຄ່າສະພາຮັບຮອງ.