ແລງວັນທີ 29 ທັນວາຜ່ານມາ ເຊື່ອວ່າບັນດາແຟນນາງງາມທັງຫຼາຍຈະໄດ້ເຫັນແລ້ວຊຸດປະຈຳຊາດຂອງ ມິສຢູນີເວີດລາວປີ 2022 ເຊິ່ງພຣີເຊັນອອກມາມີສິລະປະການຟ້ອນລຳ ເຄື່ອງນຸ່ງຂອງ 3 ຊົນຊາດໃຫຍ່ໆຄື ມົ້ງ, ລາວ ແລະກືມມຸ ນັ້ນຄືທີ່ມາຂອງຊຸດປະຈຳໍຊາດໃນປິນີ້ ທີ່ອອກແບບໂດຍນັກອອກແບບໜຸ່ມນ້ອຍອາຍຸພຽງ 20 ປີເທົ່ານັ້ນ.
ນັກອອກແບບຊຸດປະຈຳຊາດຄົນນີ້ຄື ທ້າວ ຂັນໄຊ ໜຸ່ມນ້ອຍໄວ 20 ປີ ຜູ້ຢູ່ເບື້ອງຫຼັງຊຸດງາມໆຂອງ MISS UNIVERSE LAOS 2022, ນັກອອກແບບມີຊື່ເຕັມວ່າ ຂັນໄຊ ແຖມພູຄຳ ຫຼື ກ່ານ ໜຸ່ມນ້ອຍໄວ 20 ປີ ປັດຈຸບັນກຳລັງສຶກສາຢູ່ທີ່ຄະນະສະຖາປັດຕິຍະກຳສາດ, ມຊ ໃນປີ ທີ 3.
ຊຸດປະຈຳຊາດມິສຢູນິເວີສລາວປີ 2022 ມີຊື່ວ່າ “ເອກະລັກ 3 ເຜົ່າລາວ” ເປັນການໂຮມເອົາເອກະລັກສີສັນຂອງການແຕ່ງຄົນລາວ 3 ເຜົ່າໃຫຍ່ໆນັ້ນກໍຄື ກຶມມຸ , ລາວໄຕ ແລະ ເຜົ່າມົ້ງ ຜ່ານການນຳສະເຫນີຊຸດໃນຮູບແບບຊຸດເຜົ່າມົ້ງປະຍຸກຮ່ວມສະໄຫມ.
ດ້ານໂຕຊຸດໄດ້ມີການນຳໃຊ້ຜ້າທ້ອງຖິ່ນຂອງແຕ່ລະເຜົ່າມາອອກແບບໃຫ້ມີຄວາມກົມກຽວກັນປຽບດັ່ງຄວາມຮັກແພງ ແລະ ຄວາມສາມັກຄີຂອງຄົນລາວທັງຊາດ ດ້ວຍຕົກແຕ່ງດ້ວຍງານປັກ ແລະ ຫລຽນເງິນທີ່ເປັນເອກະລັກ ພ້ອມກັບມີເຄື່ອງດົນຕີພື້ນເມືອງມີເປັນລູກຫລິ້ນໃຫ້ມີສີສັນໂດດເດັ່ນ.
“ມີຄວາມຕັ້ງໃຈຢາກໃຫ້ຊຸດເອກະລັກ 3 ເຜົ່າລາວນີ້ ເປັນໂຕແທນຂອງຢູ່ຮ່ວມກັນຢ່າງຜາສຸກຂອງປະຊາຊົນລາວບັນດາເຜົ່າ ແລະມີການເຄົາລົບໃຫ້ກຽດເຊິ່ງກັນ ແລະກັນ, ຫລີກເວັ້ນການຢຽດຊົນເຜົ່າ ແລະຊາດພັນ ແລະຢາກໃຫ້ຄົນລາວຫັນມາໃຫ້ກຳລັງໃຈເຊິ່ງກັນ ແລະກັນຫລາຍຂຶ້ນ”.
ແຮງບັນດານໃຈທຳອິດທີ່ອອກແບບຊຸດນີ້ຂຶ້ນມາແມ່ນ ຂັນໄຊເອງກໍເປັນຜູ້ຫນຶ່ງໃນເຊຍໃຫ້ ປ່າເຢັ້ງຊ່າ ລໍ່ ໄດ້ເປັນຜູ້ຄອງມຸງກຸດ ແລະຄິດວ່າຫາກມີຊຸດປະຈຳຊາດທີ່ສະທ້ອນເຖິງໂຕຕົນຂອງນາງງາມເອງ ກໍຈະເປັນສ່ວນຫນຶ່ງໃນການເສີມສົ່ງນາງງາມໄປສູ່ຝັ່ງຝັນ.
ຊົມເຊີຍຜົນງານຂອງນ້ອງຂັນໄຊທີ່ຫຼອມລວມເຄື່ອງນຸ່ງຂອງສາມເຜົ່າໃຫຍ່ມາເປັນຊຸດເຄື່ອງນຸ່ງທີ່ມີຄວາມໝາຍເລີກເຊິ່ງ ແລະສວຍງາມບົ່ງບອກຕົວຕົນນາງງາມໄດ້ຢ່າງລົງໂຕ ຂໍໃຫ້ປີນີ້ລາວໄດ້ເປີດປະຕູສູ່ຈັກກະວານຕາມສຽງເຊຍຂອງແຟນຄັບທຸກຄົນ.
ຂ່າວໂດຍ: zaza ກິນທີ່ນີ້, ທ່ຽວທີ່ນີ້
ພາບໂດຍ: ຂັນໄຊ, Ae Maitee Make up
