ເລີ່ມຕົ້ນກັບບັນຍາກາດດີໆຂອງອ້າຍນ້ອງເຈົ້າໜ້າທີ່ຕຳຫຼວດຈະລາຈອນ ທີ່ບໍລິການປະຊາຊົນດ້ວຍໄມຕີຈິດໜ້າຊື່ນຊົມເປັນທີ່ສຸດ ມີແຈກນ້ຳໃຫ້ຜູ້ເດີນທາງ, ໃຫ້ໝວກກັນກະທົບຜູ້ໃຊ້ລົດໃຊ້ຖະໜົນກັບຮອຍຍີ້ມສົ່ງທາງໃຫ້ທຸກຄົນຮອດຈຸດໝາຍໂດຍສະຫວັດດີພາບ!
ຂ່າວຄວາມສະຫງົບລາຍງານວ່າ: ໃນວັນທີ 28 ທັນວາ 2022, ກົມຕຳຫຼວດຈະລາຈອນ ກະຊວງປ້ອງກັນ ຄວາມສະຫງົບ ແລະ ກົມຂົນສົ່ງ ກະຊວງໂຍທາທິການ ແລະ ຂົນສົ່ງ ໄດ້ລົງຊຸກຍູ້ວຽກງານໂຄສະນາ ແລະ ບັງຄັບໃຊ້ກົດໝາຍ ຢູ່ຈຸດກວດກາທ່າພະບາດ ເສັ້ນທາງເລກທີ 13 ໃຕ້ ໃນໄລຍະງານສະເຫຼີມສະຫຼອງປີ ໃໝ່ສາກົນ (ສົ່ງທ້າຍປີເກົ່າ-ຕ້ອນຮັບປີໃໝ່ 2023) ໂດຍສະເພາະໃນໄລຍະ 5 ວັນ ອັນຕະລາຍ; ເຊິ່ງເລີ່ມນັບແຕ່ວັນທີ 29 ທັນວາ 2022 ຫາ ວັນທີ 2 ມັງກອນ 2023, ເຊິ່ງຖືເປັນໄລຍະທີ່ມີຄວາມສ່ຽງເກີດອຸບັດຕິເຫດຕາມທ້ອງຖະໜົນຫຼາຍ ເນື່ອງຈາກຜູ້ຂັບຂີ່ໄດ້ເດີນທາງກັບຄືນໄປຢ້ຽມຢາມບ້ານເກີດເມືອງນອນ, ທ່ອງທ່ຽວ ແລະ ມີ ການດື່ມສິ່ງມືນເມົາໃນໄລຍະການສະເຫຼີມສະຫຼອງປີໃໝ່ສາກົນ.
ສຳລັບເສັ້ນທາງສາຍຫຼັກທີ່ຜູ້ຂັບຂີ່ ສັນຈອນຫຼາຍທີ່ສຸດແມ່ນເສັ້ນທາງເລກທີ 13 ໃຕ້ ແລະ ເສັ້ນທາງເລກທີ 13 ເໜືອ. ສະເພາະເສັ້ນທາງເລກທີ 13 ໃຕ້ ນັບແຕ່ເມືອງທ່າພະບາດ ແຂວງບໍລິຄຳໄຊ ຫາ ເມືອງເຊບັ້ງໄຟ ແຂວງຄຳມ່ວນ ໄລຍະທາງ 275 ກິໂລ ແມັດ ແລະ ກຳລັງຢູ່ໃນໄລຍະທີ່ກຳລັງກໍ່ສ້າງ ແລະ ປັບປຸງເສັ້ນທາງນີ້. ສະນັ້ນ, ຜູ້ຂັບຂີ່ຕ້ອງມີຄວາມລະມັດລະວັງເປັນພິເສດໃນການໃຊ້ລົດ-ໃຊ້ຖະໜົນ ແລະ ປະຕິບັດຕາມກົດຈະລາຈອນຢ່າງເຄັ່ງຄັດ. ນອກນີ້, ຂໍ້ປະຕິບັດພື້ນຖານທີ່ຜູ້ຂັບຂີ່ຄວນເອົາໃຈໃສ່ ປະກອບມີ: ການໃຊ້ຄວາມໄວຕາມປ້າຍກຳນົດຢ່າງເຄັ່ງຄັດ, ໃສ່ສາຍຮັດນິລະໄພ, ໃສ່ໝວກກັນກະທົບ ແລະ ບໍ່ດື່ມສິ່ງມືນເມົາແລ້ວຂັບລົດ.
ໃນໄລຍະທີ່ ກົມຕຳຫຼວດຈະລາຈອນ ກະຊວງປ້ອງກັນຄວາມສະຫງົບ ແລະ ກົມຂົນສົ່ງ ກະຊວງໂຍທາທິການ ແລະ ຂົນສົ່ງ ຍັງໄດ້ລົງຊຸກຍູ້ວຽກງານໂຄສະນາຢູ່ເສັ້ນທາງເລກທີ 13 ໃຕ້, ເຈົ້າໜ້າທີ່ຕຳຫຼວດຈະລາຈອນ ມີການກວດກາຄວາມໄວ ແລະ ກວດກາທາດເຫຼົ້າຢ່າງເຄັ່ງຄັດແລ້ວ, ຍັງມີການແຈກນ້ຳດື່ມ ແລະ ໝວກກັນກະທົບ ໃຫ້ບັນນັກຂັບຂີ່ນຳອີກ.
ສຳລັບກິດຈະກໍາ 5 ວັນອັນຕະລາຍ ໃນໄລຍະປີໃໝ່ສາກົນ 2023 ທີ່ພວມດໍາເນີນການຈັດຕັ້ງປະຕິບັດນີ້ ເປັນໜຶ່ງໃນກິດຈະກໍາຂອງວຽກງານໂຄສະນາ ເພື່ອເຜີຍແຜ່, ປູກຈິດສໍານຶກ ດ້ານຄວາມປອດໄພທາງຫຼວງ, ພາຍໃຕ້ໂຄງການຂະແໜງຂົວທາງໄລຍະ 2 (LRSP2+AF) ທີ່ໄດ້ຮັບການສະໜັບສະໜູນຈາກ ທະນາຄານໂລກ.
