ການປະກວດສາວງາມເຜົ່າມົ້ງເປັນເວທີນ້ອຍໆສຳລັບເຜົ່າເນື່ອງໃນໂອກາດບຸນກິນຈຽງ ແຕ່ແຕ່ລະຄົນທີ່ມາປະກວດຢາກບອກວ່າຄວາມສາມາດຄວາມງາມມາເຕັມ ແລະເວທີນີ້ກໍ່ເປັນພື້ນຖານທີ່ດີໃຫ້ນາງສາວທຸກຄົນໄດ້ກ້າວຕໍ່ໄປສູ່ຈຸດໝາຍປາຍທາງທີ່ສູງສຸດໄດ້ ຄືກັບ Miss Universe Laos 2022 ກໍ່ແຈ້ງເກີດຕົນເອງຈາກເວທີນີ້ເຊັ່ນດຽວກັນ.
ມື້ນີ້ແອັດພາມາສ່ອງສາວມົ້ງຄົນງາມ ນ້ອງ ເບົ່າ ຄ້າງ HM12 ຈາກເວທີ Miss hmong Vientiane ເພື່ອບັນດາແຟນນາງງາມໄດ້ຮູ້ຈັກນ້ອງຫຼາຍຂຶ້ນ ແລະໄປຮ່ວມໃຫ້ກຳລັງໃຈນ້ອງໄດ້ເຂົ້າຮອບເລິກໆ.
ນ້ອງເບົ່າ ຈະມີຈຸດພິເສດຄືເປັນຄົນທີ່ຄິດບວກ ແລະ ສາມາດເອົາຊະນະຄວາມຢ້ານກົວຂອງຕົນເອງໄດ້, ມີຄວາມເຊື່ອຫມັ້ນໃນຕົນ ແລະ ສູ້ເພື່ອຄວາມຝັນຂອງຕົນໃຫ້ເປັນຈິງ.
ສຳລັບເວທີ ມີສມົ້ງນ້ອງເບົ້າຕອບວ່າ ນີ້ແມ່ນກ້າວທຳອິດທີ່ສຳຄັນຫຼາຍຂອງນ້ອງ ເພື່ອປູທາງໃຫ້ນ້ອງໄດ້ເຂົ້າເຖິງເວທີນາງງາມ ແລະ ເຮັດໃຫ້ນ້ອງສາມາດສະແດງຄວາມສາມາດ ແລະ ສັກກະຍາພາບຂອງນ້ອງອອກມາເພື່ອຈະເປັນແບບຢ່າງທີ່ດີໃຫ້ນ້ອງໆ ຫລື ແມ່ຍິງທຸກໆຄົນໂດຍສະເພາະແມ່ຍິງມົ້ງຄືນ້ອງເອງ.
ເຫດຜົນທີ່ນ້ອງເຂົ້າມາປະກວດໃນເວທີນີ້ ເບົ່າຄິດວ່າເຖິງເວລາແລ້ວ ທີ່ຈະມາຕາມຫາຝັນໃຫ້ກັບຕົນເອງ ຄືການເປັນນາງງາມ ຄວາມຝັນທີ່ແມ່ຍິງຫຼາຍຄົນຢາກໄປຢືນຢູ່ນະຈຸດນັ້ນ.
ຫາກໄດ້ເປັນ Miss Hmong Vientiane 2023 ແລ້ວນ້ອງຈະເອົາຕໍາແໜ່ງນີ້ໄປເຮັດຫຍັງແດ່? ເບົ່າຕອບວ່າ ຖ້ານ້ອງໄດ້ຕຳແຫນ່ງມີສມົ້ງນະຄອນຫລວງແລ້ວນ້ອງຈະເອົາໄປຊ່ວຍເຫລືອເດັກນ້ອຍທີ່ບໍ່ມີທຶນໃນການສຶກສາ, ເພາະນ້ອງຄິດວ່າເດັກທຸກໆຄົນຄວນທີ່ຈະໄດ້ຮັບການສຶກສາໃຫ້ທົ່ວເຖິງ ເພາະການສຶກສາເທົ່ານັ້ນຈຶ່ງຈະສາມາດຊ່ວຍໃຫ້ເດັກນ້ອຍທຸກຄົນໃຫ້ມີອະນາຄົດທີ່ດີໃນອະນາຄົດໄດ້.
