ໃນວາລະເປີດກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ຄັ້ງວັນທີ 5 ທັນວາ 2022 ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ລາຍງານກ່ຽວກັບວຽກງານພົ້ນເດັ່ນຂອງລັດຖະບານໃນປີ 2022 ແລະ ທິດທາງແຜນວຽກຈຸດສົມໃນປີ 2023 ເຊິ່ງລວມມີ 10 ໝາກຜົນສຳເລັດພົ້ນເດັ່ນ ແລະ 6 ຂໍ້ຄົງຄ້າງທີ່ຕ້ອງສືບຕໍ່ແກ້ໄຂ.
ທ່ານ ພັນຄຳ ວິພາວັນ ນາຍົກລັດຖະມົນຕີ ກ່າວບາງຕອນວ່າ: ເຖິງແມ່ນວ່າສະພາບພາກພື້ນ, ສາກົນ ແລະ ພາຍໃນ ຈະມີຄວາມຫຍຸ້ງຍາກ ແລະ ສິ່ງທ້າທາຍຫຼາຍປະການ ແບບບໍ່ເຄີຍມີໃນຮອບຫລາຍປີຜ່ານມາກໍ່ຕາມ, ແຕ່ພາຍໃຕ້ການນຳພາ-ຊີ້ນຳ ຢ່າງໃກ້ສິດຂອງ ຄະນະບໍລິຫານງານສູນກາງພັກ, ກົມການເມືອງ ແລະ ຄະນະເລຂາທິການສູນກາງພັກ ກໍຄືການຕິດຕາມກວດກາເປັນປົກກະຕິຂອງ ສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ການຮ່ວມມືຊ່ວຍເຫຼືອຂອງບັນດາປະເທດເພື່ອນມິດ ບວກໃສ່ກັບຄວາມພະຍາຍາມຢ່າງຕັ້ງໜ້າຂອງລັດຖະບານ ໃນການແກ້ບັນຫາລວມຂອງຊາດ ຈຶ່ງເຮັດໃຫ້ພວກເຮົາສາມາດປະຄັບປະຄອງເສດຖະກິດຂອງຊາດ ບໍ່ໃຫ້ຕົກເຂົ້າສູ່ວິກິດທີ່ໜັກໜ່ວງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍໄດ້ໂດຍພື້ນຖານ ແລະ ໄດ້ມີໝາກຜົນສຳເລັດຈຳນວນໜຶ່ງ ດັ່ງນີ້:
1). ການຂະຫຍາຍຕົວດ້ານເສດຖະກິດ; 2). ການເກັບລາຍຮັບງົບປະມານ; 3) ການປະຕິບັດລາຍຈ່າຍງົບປະມານ; 4). ການແກ້ໄຂໜີ້ສິນ; 5). ການຮັກສາສະຖຽນລະພາບດ້ານເງິນຕາ; 6). ການປະຕິຮູບລັດວິສາຫະກິດ; 7). ການສົ່ງເສີມການລົງທຶນຂອງພາກເອກະຊົນ; 8). ດ້ານປ້ອງກັນຊາດ-ປ້ອງກັນຄວາມສະຫງົບ ແລະ ການພົວພັນສາກົນ; 9). ການແກ້ໄຂບັນຫາການລະບາດພະຍາດໂຄວິດ-19 ແລະ 10). ການສ້າງວຽກເຮັດງານທຳ ແລະ ຈັດສັນແຮງງານ.
ໃນ 10 ໝາກຜົນຄວາມສຳເລັດທີ່ປະຕິບັດໄດ້ ໃນນັ້ນພົ້ນເດັ່ນແມ່ນ: ການຂະຫຍາຍຕົວດ້ານເສດຖະກິດ ໄດ້ຊຸກຍູ້ໃຫ້ບັນດາຫົວໜ່ວຍການຜະລິດກະສິກໍາ, ອຸດສາຫະກຳ ແລະ ບໍລິການທີ່ເປັນທ່າແຮງ ຂັບເຄື່ອນການຂະຫຍາຍຕົວຂອງເສດຖະກິດ ໃຫ້ດີຂຶ້ນ. ອີງໃສ່ການຄິດໄລ່ GDP ໃນ ໄລຍະ 9 ເດືອນຜ່ານມາ ເຫັນວ່າເສດຖະກິດແຫ່ງຊາດຂະຫຍາຍຕົວຢູ່ໃນລະດັບ 4,2% ແລະ ຄາດວ່າໝົດປີຈະສູ້ຊົນໃຫ້ຂະ ຫຍາຍຕົວໄດ້ໃນລະດັບ 4,4% (ແຜນການ 4,5%) ເຖິງແມ່ນວ່າຈະບໍ່ບັນລຸຕາມແຜນ ແຕ່ກໍມີທ່າອ່ຽງຂະຫຍາຍຕົວທີ່ດີຂຶ້ນ (ປີ 2021ແມ່ນ 3,5%) ໃນສະພາບແວດລ້ອມທີ່ຫຍຸ້ງຍາກ ແລະ ທ້າທາຍໃນປັດຈຸບັນ.
ສຳລັບການແກ້ໄຂໜີ້ສິນ: ລັດຖະບານ ໄດ້ສືບຕໍ່ຄຸ້ມຄອງ ແລະ ແກ້ໄຂບັນຫາໜີ້ສິນ ໄປຕາມຂອບແຜນທີ່ໄດ້ກຳນົດໄວ້ ແລະ ສາມາດປະຄັບປະຄອງໃນການຊຳລະໜີ້ສິນໄດ້ ໂດຍສາມາດເຮັດໃຫ້ປະເທດເຮົາ ບໍ່ໃຫ້ຕົກເປັນປະເທດທີ່ຊຳລະໜີ້ສິນບໍ່ໄດ້.
ກ່ຽວກັບການຮັກສາສະຖຽນລະພາບດ້ານເງິນຕາ: ລັດຖະບານ ໄດ້ສຸມໃສ່ແກ້ໄຂບັນຫາການເໜັງຕິງຂອງ ອັດຕາແລກປ່ຽນເງິນຕາຕ່າງປະເທດ ແລະ ອັດຕາເງິນເຟີ້ ເພື່ອປະຄັບປະຄອງການເໜັງຕີງດັ່ງກ່າວໃຫ້ສະລໍຕົວໃນຈັງຫວະທີ່ຊ້າລົງ. ໃນນີ້: ໄດ້ສຸມໃສ່ຄຸ້ມຄອງບັນດາຮ້ານແລກປ່ຽນ ໃຫ້ເຂົ້າສູ່ການຄຸ້ມຄອງຂອງ ທະນາຄານທຸລະກິດ, ຊຶ່ງສາມາດດັດສົມຮ້ານແລກປ່ຽນຈາກໃນຕົ້ນປີ 2022 ມີທັງໝົດຈຳນວນ 419 ຮ້ານ ມາຮອດປັດຈຸບັນເຫຼືອ ຈຳນວນ 113 ຮ້ານ ແລະ ໃນຕໍ່ໜ້າ ຍັງຈະສືບຕໍ່ກວດກາຄຸນນະພາບ ແລະ ການປະຕິບັດລະບຽບການເຄື່ອນໄຫວແລກປ່ຽນເງິນຕາ, ຖ້າຫາກເຫັນວ່າຮ້ານໃດ ບໍ່ສາມາດປະຕິບັດໄດ້ ຫຼື ລະເມີດ ຈະສືບຕໍ່ຖອນໃບອະນຸຍາດໄປຕື່ມອີກ ກ້າວໄປສູ່ການຫັນການບໍລິການແລກປ່ຽນທັງໝົດ ເປັນປ່ອງບໍລິການຂອງທະນາຄານທຸລະກິດ ຄືກັບປະເທດອື່ນໆ.
ພ້ອມນັ້ນ ກໍໄດ້ຄຸມເຂັ້ມການໂອນເງິນຊື້-ຂາຍສິນຄ້າ ແລະ ເງິນທີ່ນຳເຂົ້າມາລົງທຶນ ຕ້ອງຜ່ານລະບົບທະນາຄານ; ໄດ້ແກ້ໄຂການສະໜອງເງິນຕາຕ່າງປະເທດໃຫ້ແກ່ບໍລິສັດທີ່ນຳເຂົ້ານ້ຳມັນເຊື້ອໄຟທີ່ເປັນຫຼັກແຫຼ່ງ, ຊຶ່ງສາມາດສະໜອງນໍ້າມັນເຊື້ອໄຟໃຫ້ສັງຄົມໄດ້ປົກກະຕິ (ເຖິງລາຄາແພງແດ່ ກໍ່ຂື້ນຢູ່ກັບຕະຫຼາດສາກົນ).