ຕ້ອງຍອມຮັບວ່າການເປີດໃຫ້ບໍລິການຂອງເສັ້ນທາງລົດໄຟລາວ-ຈີນ ໄດ້ພິກໂສມໜ້າໃໝ່ໃຫ້ລະບົບເສດຖະກິດຂອງລາວຫຼາຍພໍສົມຄວນ ໂດຍສະເພາະລະບົບຄົມມະນາຄົມຂົນສົ່ງໄດ້ເຂົ້າມາມີບົດບາດສຳຄັນສຸດໃນການສ້າງລາຍຮັບເຂົ້າງົບປະມານແຫ່ງຊາດ, ການທ່ອງທ່ຽວຄຶກຄື້ນກວ່າ, ການຂົນສົ່ງສິນຄ້າ ແລະທາງຜ່ານສາມາດບັນລຸໄດ້ຈຸດປະສົງຄາດໝາຍໃນການຫັນ ສປປ ລາວ ຈາກປະເທດບໍ່ມີທາງອອກສູ່ທະເລໃຫ້ເປັນປະເທດທາງຜ່ານຢ່າງແທ້ຈີງ.
ບໍລິສັດທາງລົດໄຟ ລາວ-ຈີນ ໄດ້ຈັດຕັ້ງພິທີສະເຫລີມສະຫລອງ, ສະຫລຸບຜົນງານ ການເປີດໃຫ້ບໍລິ ການທາງລົດໄຟ ລາວ-ຈີນ ຄົບຮອບ 1 ປີ, ໃນວັນທີ 3 ທັນວາ 2022 ທ່ານ ຈູ່ ໂກຈ່ຽງ ປະທານສະພາຜູ້ບໍລິຫານ ບໍລິສັດທາງລົດໄຟ ລາວ-ຈີນ ຈຳກັດ ລາຍງານໃຫ້ຮູ້ວ່າ: ນັບແຕ່ເລີ່ມເປີດໃຫ້ບໍລິການທາງລົດໄຟ ລາວ-ຈີນ ໃນໄລຍະ 1 ປີຜ່ານມາ, ສາມາດຂົນສົ່ງຜູ້ໂດຍສານໄດ້ ທັງໝົດ 1.269.000 ເທື່ອຄົນ, ຂົນສົ່ງສິນຄ້າໄດ້ 1.995.500 ໂຕນ, ຂົນສົ່ງສິນຄ້າຂ້າມແດນເກີນ 1.570.000 ໂຕນ, ສ້າງ ວຽກເຮັດງານທຳ ໃຫ້ປະຊາຊົນໄດ້ 100.000 ກວ່າເທື່ອຄົນ, ຕະຫລອດ ໄລຍະ 1 ປີຜ່ານມາ, ບໍລິສັດທາງລົດໄຟ ລາວ-ຈີນ ໄດ້ຢຶດໝັ້ນຖືເອົາຄວາມປອດໄພໃນການເດີນທາງຂອງປະຊາຊົນເປັນຫລັກ, ເພີ່ມທະວີເນັ້ນໜັກການກວດ ກາບໍາລຸງຮັກສາພື້ນຖານໂຄງລ່າງ, ສ້າງລະບົບປ້ອງກັນຄວາມປອດໄພນອກເສັ້ນທາງ, ປັບປຸງກົນໄກເຮັດວຽກຮັບມື ສຸກເສີນ ເພື່ອຮັບປະກັນຄວາມປອດໄພໃນການຂົນສົ່ງທາງລົດໄຟ ຈີນ-ລາວ.
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ຮູ້ວ່າ: ທາງລົດໄຟ ລາວ-ຈີນ ແມ່ນໂຄງການເຊື່ອມຈອດ ແລະ ເຊື່ອມໂຍງ ຍຸດທະສາດ “ຫັນຈາກປະເທດທີ່ບໍ່ມີຊາຍແດນຕິດກັບທະເລ ເປັນປະເທດເຊື່ອມຕໍ່” ຂອງລາວ, ແມ່ນໂຄງການວິ ສະວະກໍາ “ໜຶ່ງແລວ ໜຶ່ງເສັ້ນທາງ” ແລະ ເປັນໂຄງການວິສະວະກໍາສັນຍາລັກມິດຕະພາບ ຈີນ-ລາວ. ປັດຈຸບັນ, ເສັ້ນທາງລົດໄຟ ລາວ-ຈີນ ໄດ້ກາຍເປັນຄວາມພາກພູມໃຈຂອງປະຊາຊົນລາວ ແລະ ປະເທດລາວ, ສປປ ລາວ ບໍ່ມີທາງອອກສູ່ທະເລ ແຕ່ເສັ້ນທາງລົດໄຟສາຍນີ້ ຈະຊ່ວຍໃຫ້ປະເທດລາວ ມີເສັ້ນທາງຄົມມະນາຄົມດ້ວຍຕາໜ່າງ ຈໍລະຈອນສິນຄ້າ ອອກສູ່ທະເລ ແລະ ບັນດາປະເທດຢູ່ໃນພາກພື້ນ ມີຄວາມສະດວກໃນການຂົນສົ່ງໂດຍສານ ແລະ ຂົນສົ່ງສິນຄ້າ, ທັງກະຕຸກຊຸກຍູ້ການລົງທຶນ ແລະ ການທ່ອງທ່ຽວ ໂດຍນັກທ່ອງທ່ຽວ ເຂົ້າມາທ່ຽວລາວ ຫລາຍຂຶ້ນ.
ການເປີດນໍາໃຊ້ ແລະ ດໍາເນີນທຸລະກິດບໍລິການຂອງທາງລົດໄຟລາວ-ຈີນ, ໄດ້ປ່ຽນໂສມໜ້າໃໝ່ຂອງການ ຄົມມະນາຄົມຂົນສົ່ງຂອງ ສປປ ລາວ, ສາມາດບັນລຸຄວາມມຸ່ງມາດປາຖະໜາ ໃນການ “ຫັນຈາກປະເທດທີ່ບໍ່ມີຊາຍ ແດນຕິດກັບທະເລ ເປັນປະເທດເຊື່ອມຕໍ່” ຂອງລາວ, ໄດ້ເປີດສັງກາດໃໝ່ແຫ່ງການຂົນສົ່ງທາງລົດໄຟ ລາວ-ຈີນ, ໄດ້ຍົກສູງຖານະຍຸດທະສາດຂອງ ສປປ ລາວ ໃນເວທີສາກົນ ໃຫ້ສູງເດັ່ນຂຶ້ນ.
ໃນໄລຍະຜ່ານມາປະເທດລາວມີເສັ້ນ ທາງລົດໄຟພຽງ 3,5 ກິໂລແມັດ, ຈາກອັນດັບສຸດທ້າຍໃນຈໍານວນ 149 ປະເທດ ໃນໂລກ ແລະ ໃນປັດຈຸບັນ ມີ ໄລຍະທາງລົດໄຟສະເລ່ຍຕໍ່ຄົນ ກາຍມາເປັນອັນດັບທີ 28 ແລະ ເປັນອັນດັບ 1 ຂອງອາຊຽນ, ສປປ ລາວ ໄດ້ກ້າວ ກະໂດດເປັນຈຸດເຊື່ອມໂຍງການຄົມມະນາຄົມຂົນສົ່ງ ທີ່ສໍາຄັນຂອງແຫລມອິນດູຈີນທັນທີ ກໍຄື ກຸ່ມປະເທດອາ ຊຽນ.
ໄລຍະ 1 ປີ ທີ່ເປີດນໍາໃຊ້ ແລະ ດໍາເນີນທຸລະກິດຂອງທາງລົດໄຟ ລາວ-ຈີນ ເປັນຕົ້ນມາ ໄດ້ສ້າງຄວາມ ສະດວກໃນການເດີນທາງໃ ຫ້ແກ່ປະຊາຊົນລາວຢ່າງຫລວງຫລາຍ, ເປັນການກະຕຸກຊຸກຍູ້ໃຫ້ການຄ້າ ມີຄວາມສະ ດວກໂລ່ງລ່ຽນ, ເສີມກໍາລັງທີ່ແຂງແຮງໃຫ້ແກ່ການພັດທະນາເສດຖະກິດ-ສັງຄົມ ຂອງລາວ. ລົດໄຟ EMU “ຂະບວນລ້ານຊ້າງ” ໄດ້ກາຍເປັນໃບໜ້າໃໝ່ ຂອງປະເທດລາວ, ການພັດທະນາຊັບພະຍາກອນທ່ອງທ່ຽວ, ກະສິກໍາ, ແຮ່ທາດ ແລະ ການກໍ່ສ້າງຕົວເມືອງ ໄດ້ຮັບການພັດທະນາຈະເລີນຂຶ້ນ ຕາມແລວທາງ, ຊາວໜຸ່ມທີ່ເກັ່ງ ແລະ ມີຄວາມສາມາດພົ້ນເດັ່ນ ໄດ້ມີຄວາມຕື່ນຕົວປະກອບສ່ວນເຂົ້າໃນການກໍ່ສ້າງ, ດໍາເນີນທຸລະກິດ ແລະ ບໍາລຸງຮັກສາ ເສັ້ນທາງລົດໄຟ, ເປັນການຫວ່ານແນວພັນທີ່ດີໃຫ້ແກ່ການຫັນເປັນອຸດສາຫະກໍາທັນສະໄໝ ຂອງ ສປປ ລາວ.