ຈຳປາສັກ ທີມຍິງ-ຊາຍ ມາແຮງຄວ້າແຊັມບານເຕະນັກຮຽນລາຍການ Copa Coca-Cola Lao

120

ທີມບານເຕະນັກຮຽນແຂວງຈໍາປາສັກ ທັງທີມຍິງ ແລະ ທີມຊາຍ ຄວ້າແຊັມການແຂ່ງຂັນກີລາບານເຕະນັກຮຽນທົ່ວປະເທດ ຊິງຂັນທ່ານລັດຖະມົນຕີກະຊວງສຶກສາທິການ ແລະ ກີລາ Copa Coca-Cola Lao ຄັ້ງທີ V ປະຈຳປີ 2022 ຫຼັງເອົາຊະນະຄູ່ແຂ່ງໃນຮອບຊີງຊະນະເລີດ ປະຈໍາວັນທີ 24 ພະຈິກ 2022 ທີ່ສະໜາມລ້ານຊ້າງ ສະເຕດ້ຽມ ບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ.

ວັນສຸດທ້າຍຂອງການແຂ່ງຂັນລາຍການດັ່ງກ່າວ ເລີ່ມຂຶ້ນແຕ່ເວລາ 14:00 ໂມງເປັນນັດຊີງທັງທີມຍິງ ແລະ ທີມຊາຍ ກ່ອນຈະມີພິທີປິດການແຂ່ງຂັນຢ່າງເປັນທາງການ ໃຫ້ກຽດເຂົ້າຮ່ວມ ແລະ ເປັນປະທານຈັດການແຂ່ງຂັນໂດຍ ທ່ານ ນາງ ຂັນທະລີ ສີລິພົງພັນ ຮອງລັດທະມົນຕີກະຊວງສຶກສາທິການ ແລະ ກີລາ ພ້ອມດ້ວຍຕົວແທນຈາກ ບໍລິສັດ ລາວ ໂຄຄາ-ໂຄລາ ບ໊ອຕຕລີງ ຈຳກັດ ແລະ ຜູ້ສະໜັບສະໜູນອື່ນໆ ລວມເຖິງຄູູຝຶກ ແລະ ນັກກີລາ ເຂົ້າຮ່ວມເກືອບເຕັມສະໜາມ.

ໂອກາດັ່ງກ່າວ ທ່ານ ວິລະວັນ ບຸນສຸກໄທ ຫົວຫນ້າກົມກິລາມວນຊົນ, ພະລະ ແລະ ສິລະປະສຶກສາ ລາຍການວ່າ: ການແຂ່ງຂັນລາຍການດັ່ງກ່າວ ຈັດຂຶ້ນໃນທົ່ວປະເທດຄັດເອົາ 2 ທີມຈາກພາກເໜືອ, 4 ທີມຈາກນະຄອນຫຼວງວຽງຈັນ ແລະ 2 ທີມຈາກພາກໃຕ້ ເຂົ້າຮ່ວມມາແຂ່ງຂັນໃນຮອບ 4 ທີມສຸດທ້າຍ ໂດຍທີມບານເຕະນັກຮຽນຈໍາປາສັກ ທັງທີມຍິງ ແລະ ທີມຊາຍ ຜ່ານເຂົ້າຮອບສຸດທ້າຍໃນລາຍການດັ່ງກ່າວ ໃນຖານະແຊັມຮອບຄັດເລືອກໂຊກພາກໃຕ້ ຂຶ້ນມາແຂ່ງຂັນລາຍການ Copa Coca-Cola Lao ຄັ້ງທີ V ປະຈຳປີ 2022 ໃນຕົ້ນອາທິດທີ່ຜ່ານມາ ເພື່ອຂຶ້ນມາແຂ່ງຂັນໃນຮອບ 4 ທີມປະກອບມີ: ທີມຊາຍມີ ມສ ສາລາຄໍາ ກັບ ມສ ຫງຽນຢູ ຈາກນະຄອນຫຼວງ, ໄຊຍະບູລີ ແລະ ຈໍາປາສັກ, ສ່ວນ ທີມຍິງມີ ມສ ສົມສະຫວາດ ກັບ ມສ ໂຄກສີວິໄລ ຈາກນະຄອນຫຼວງຫຼວງ, ຫຼວງພະບາງ ແລະ ຈໍາປາສັກ.

ຜ່ານການແຂ່ງຂັນປາກົດວ່າ: ທີມຍິງ ແຂວງຈໍາປາສັກ ເອົາຊະນະ ມສ ໂຄກສີວິໄລ ໃນຮອບ 4 ທີມສຸດທ້າຍ ກ່ອນຜ່ານເຂົ້າຊີງຊະນະເລີດສາມາດເອົາຊະນະ ແຂວງຫຼວງພະບາງ 2-0 ຄວ້າແຊັມປະເພດທີມຍິງໄປຄອງ, ສ່ວນ ທີມຊາຍແຂວງຈໍາປາສັກ ດວນຈຸດໂທດເອົາຊະນະ ມສ ສາລະຄໍາ 4-2 ຫຼັງສະເໝີກັນ 1-1 ໃນຮອບ 4 ທີມສຸດທ້າຍ ກ່ອນຜ່ານການເຂົ້າຮອບຊີງຊະນະເລີດ ກໍສາມາດບຽດເອົາຊະນະ ມສ ຫງວຽນຢູ 1-0 ຄວ້າແຊັມປະເພດທີມຊາຍໄປຄອງ.
ບົດສະຫຼຸບການແຂ່ງຂັນບານເຕະ Copa Coca-Cola Lao ຄັ້ງທີ V ປະຈຳປີ 2022 ມີດັ່ງນີ້:

+ປະເພດທີມຊາຍ:
-ແຊັມ: ຈໍາປາສັກ
-ຮອງແຊັມ: ມສ ຫວງຽນຢູ
-ລາງວັນດີເດັ່ນ: ລາງວັນຜູ້ຮັກສາປະຕູດີເດັ່ນ ທ້າວ ທິດສາຄອນ ສາລີວົງຮັດ, ລາງວັນດາວຍິງສູງສຸດ ກິຕາ ເຮືອງວິໄລ ຈາກມສ ຫງວຽນຢູ ແລະ ລາງວັນນັກເຕະດີເດັ່ນ ວັນທະສັກ ອິນທິລາດ
-ອັນດັບ 3: ມສ ສາລະຄໍາ ຕົວແທນຈາກນະຄອນຫຼວງວຽງຈັນ

+ປະເພດທີມຍິງ:
-ແຊັມ: ຈໍາປາສັກ
-ຮອງແຊັມ: ແຂວງຫຼວງພະບາງ
-ອັນດັບ 3: ມສ ໂຄກສີວິໄລ
-ລາງວັນດີເດັ່ນ: ລາງວັນຜູ້ຮັກສາປະຕູດີເດັ່ນ ນາງ ປານິດາ ລາດສະວົງ ຈາກແຂວງຈໍາປາສັກ, ລາງວັນ ດາວຍິງສູງສຸດ ນາງ ເຮມາ ແສງປະເສີດ ຈາກແຂວງຈໍາປາສັກ ແລະ ລາງວັນນັກເຕະດີເດັ່ນ ນາງ ຟ້າ ພົມມາ ຈາກແຂວງຫຼວງພະບາງ.
ຂ່າວ-ຮູບ: Larh Creators