ປະທານສະພາແຫ່ງຊາດ ແຫ່ງ ສປປ ລາວ ພົບປະກັບ ປະທານລັດຖະສະພາສິງກະໂປ

34

ໃນຕອນບ່າຍຂອງວັນທີ 22 ພະຈິກ 2022 ທີ່ພະນົມເປັນ ຣາຊະອະນາຈັກກໍາປູເຈຍ ໄດ້ມີການພົບປະສອງຝ່າຍລະຫວ່າງຄະນະຜູ້ແທນສະພາແຫ່ງຊາດ ແຫ່ງ ສປປ ລາວ ກັບ ຄະນະຜູ້ແທນລັດຖະສະພາສິງກະໂປ ຂຶ້ນຝ່າຍລາວນໍາໂດຍ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ແລະ ຝ່າຍສິງກະໂປນໍາໂດຍ ທ່ານ ຕັນ ສວນ ຈິນ (Tan Chuan Jin), ປະທານລັດຖະສະພາ, ຫົວໜ້າຄະນະຜູ້ແທນລັດຖະສະພາສິງກະໂປ, ມີບັນດາທ່ານຄະນະຜູ້ແທນຈາກສະພາສອງປະເທດເຂົ້າຮ່ວມ

ໃນພິທີພົບປະ ທ່ານ ໄຊສົມພອນ ພົມວິຫານ ໄດ້ກ່າວສະແດງຄວາມດີໃຈ ທີ່ໄດ້ມີໂອກາດພົບປະເຮັດວຽກຮ່ວມກັບທ່ານ ຕັນ ສວນ ຈິນ ເຊິ່ງເປັນໂອກາດດີທີ່ໄດ້ປຶກສາຫາລື ແລະ ແລກປ່ຽນຄໍາຄິດຄໍາເຫັນນໍາກັນ ກ່ຽວກັບການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີງາມ ລະຫວ່າງ ສອງປະເທດ ສປປ ລາວ-ສິງກະໂປ ກໍຄື ລະຫວ່າງ ສອງອົງການນິຕິບັດຍັດ ຂອງສອງປະເທດໃຫ້ເກີດດອກອອກຜົນຍິ່ງໆຂຶ້ນ ແລະ ຕີລາຄາສູງຕີລາຄາສູງຕໍ່ການພົວພັນຮ່ວມມື ລະຫວ່າງ ສອງປະເທດ

ສປປ ລາວ ແລະ  ສິງກະໂປ ມີສາຍພົວພັນມິດຕະພາບ ແລະ ການຮ່ວມມື ທີ່ດີນຳກັນມາຕະຫຼອດມາ ໄດ້ຮັບການພັດທະນາ ແລະ ຂະຫຍາຍຕົວເປັນກ້າວໆ, ເຫັນໄດ້ຈາກ ສອງປະເທດໄດ້ມີການແລກປ່ຽນການຢ້ຽມຢາມ ຢ່າງເປັນປົກກະຕິ ລະຫວ່າງ ການນຳຂັ້ນສູງໃນລະດັບຕ່າງໆ ເພື່ອສົ່ງເສີມ ແລະຮັດແໜ້ນສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ເປັນຕົ້ນແມ່ນທາງດ້ານການເມືອງ, ເສດຖະກິດ, ການສຶກສາ ແລະອື່ນໆອັນນຳເອົາຜົນປະໂຫຍດມາໃຫ້ປະຊາຊົນສອງຊາດພ້ອມທັງແຈ້ງໃຫ້ຮູ້ກ່ຽວກັບກົງຈັກສະພາບການເຄື່ອນໄຫວຂອງສະພາແຫ່ງຊາດ ແຫ່ງ ສປປ ລາວ ຊຸດທີ IX, ການຮ່ວມມືຂອງສອງອົງການນິຕິບັນຍັດໂດຍຫຍໍ້ ແລະ ເພື່ອເປັນການສືບຕໍ່ສາຍພົວພັນລະຫວ່າງສອງສະພາທ່ານປະທານສະພາແຫ່ງຊາດລາວ ຍັງໄດ້ສະເໜີ ຕໍ່ທ່ານ ຕັນ ສວນ ຈິນ ຄື:

ສະເຫນີໃຫ້ມີການແລກປ່ຽນຄະນະຜູ້ແທນໃນລະດັບຕ່າງໆນຳກັນ ເປັນຕົ້ນ ຄະນະປະທານສະພາ ແຫ່ງຊາດ, ຄະນະປະທານກຳມາທິການ, ຄະນະມິດຕະພາບລາວ-ສິງກະໂປ, ແລະຄະນະ ອື່ນໆ ຢ່າງເປັນປົກກະຕິ; ສະເໜີໃຫ້ການຮ່ວມມືທາງວິຊາການ, ໂດຍຮູບການຈັດສຳມະນາ, ຝຶກອົບຮົມ, ທັດສະນະສຶກສາ ແລະ ແລກ ປ່ຽນບົດຮຽນທີ່ດິຮ່ວມກັນ ເພື່ອຍົກສູງຂີດຄວາມສາມາດ ແກ່ພະນັກງານພາຍໃນສະພາແຫ່ງຊາດ ແລະ ສະພາປະຊາຊົນ ຂັ້ນແຂວງ ຂອງ ສປປ ລາວ; ສະເໜີໃຫ້ສອງອົງການນິຕິບັນຍັດຊຸກຍູ້ໃຫ້ສອງລັດຖະບານລາວ-ສິງກະໂປ ເອົາໃຈໃສ່ໃນການຈັດຕັ້ງປະຕິບັດ ບັນດາສັນຍາ, ສົນທິສັນຍາ ແລະ ນິຕິກຳອື່ນໆ ທີ່ສອງຝ່າຍໄດ້ລົງນາມຮ່ວມກັນໃຫ້ເປັນຮູບປະທໍາເພື່ອນຳເອົາຜົນປະໂຫຍດມາສູ່ປະຊາຊົນຂອງສອງປະເທດພວກເຮົາ ແລະ ສືບຕໍ່ຮ່ວມມື ແລະ ສະໜັບສະໜູນ ເຊິ່ງກັນ ແລະກັນ ໃນເວທີລັດຖະສະພາພາກພື້ນ ແລະ ສາກົນ ເພື່ອປະກອບສ່ວນໃນພາລະກິດປົກປັກຮັກສາສັນຕິພາບ, ສະຖຽນລະພາບ, ມິດຕະພາບ ແລະ ການຮ່ວມມື ເພື່ອການພັດທະນາແບບຍືນຍົງ ໃນພາກພື້ນ ແລະ ສາກົນ, ເຊິ່ງໃນປີ 2024 ສະພາແຫ່ງຊາດລາວ ຈະເປັນເຈົ້າພາບຈັດກອງປະຊຸມໃຫຍ່ໄອປາ ຄັ້ງທີ່ 45, ຫວັງຢ່າງຍິ່ງຈະໄດ້ຮັບການຮ່ວມມື ແລະ ສະໜັບສະໜຸນຈາກລັດຖະສະພາສິງກະໂປ ແລະ ເຊື້ອເຊີນ ທ່ານ ຕັນ ສວນ ຈິນ, ຫົວໜ້າຄະນະຜູ້ແທນລັດຖະສະພາ ສິງກະໂປ ພ້ອມດ້ວຍຄະນະ ມາຢ້ຽມຢາມ ສປປ ລາວ ຢ່າງເປັນທາງການ ຕາມວັນເວລາທີ່ທ່ານມີຄວາມສະດວກ.

ທ່ານ ຕວນ ສັນ ຈິນ ກໍໄດ້ກ່າວສະແດງຄວາມຂອບໃຈ ແລະ ເຫັນດີຕໍ່ຂໍ້ສະເໜີທີ່ຝ່າຍລາວສະເໜີ ເປັນຕົ້ນແມ່ນເຫັນດີທີ່ສຸດຈະຕອບສະໜອງໃຫ້ນັ້ນແມ່ນການຊອກທຶນໃຫ້ພະນັກງານວິຊາການໄປຮຽນພາສາອັງກິດໃນການກະກຽມຮັບໃຊ້ກອງປະຊຸມ AIPA ທີ່ ສປປລາວ ຈະເປັນເຈົ້າພາບໃນປີ 2024 ນີ້ ແລະ ໄດ້ເຊື້ອເຊີນໃຫ້ຄະນະຜູ້ແທນລາວສືບຕໍ່ຢ້ຽມຢາມ ສ.ສິງກະໂປ ເພື່ອສືບຕໍ່ຮັດແໜ້ນຄວາມສາມັກຄີຮ່ວມມືກັນໃຫ້ດີຍິ່ງຂຶ້ນກວ່າເກົ່າ.