ໄອເອັມເອັຟ ເຕືອນ ເສດຖະກິດໂລກກຳລັງຢູ່ພາວະຂາລົງ

15

ສຳນັກຂ່າວຕ່າງປະເທດລາຍງານວ່າ: ກອງທຶນການເງິນລະຫວ່າງປະເທດ ( IMF ) ອອກບົດລາຍງານຄາດການເສດຖະກິດໂລກ ໂດຍລະບຸວ່າ: ກິດຈະກຳດ້ານເສດຖະກິດໂລກ ກຳລັງຊະລໍຕົວລົງ ແລະ ແຜ່ອອກສູ່ວົງກວ້າງ ແລະ ຫຼາຍກວ່າທີ່ຄາດການໄວ້, ຂະນະທີ່ອັດຕາເງິນເຟີ້ຈຸລະດັບສູງສຸດໃນຮອບຫຼາຍທົດສະວັດ.

ລາຍງານທ່າອ່ຽງເສດຖະກິດໂລກ ປະຈຳເດືອນຕຸລາ 2022 ລະບຸວ່າ: ໃນພາກພື້ນອາຊີ – ປາຊີຟິກນັ້ນ ມີພຽງປະເທດໄທ ແລະ ປະເທດຈີນເທົ່ານັ້ນ ທີ່ມີລວມຍອດຜະລິດຕະພັນພາຍໃນທີ່ແທ້ຈິງ ( Real GDP ) ທີ່ຂະຫຍາຍຕົວທັງປີ 2022 ແລະ 2023 ແລະ ອາດຂະຫຍາຍຕົວເພີ່ມຂຶ້ນໃນປີໜ້າ.

No photo description available.

ໄອເອັມເອັຟ ລະບຸວ່າ: ວິກິດຄ່າຄອງຊີບ ແລະ ສະຖານະການການເງິນທີ່ຫຍຸ້ງຍາກໃນເກືອບທຸກພາກພື້ນ ບວກກັບ ຄວາມຂັດແຍ່ງລະຫວ່າງປະເທດມະຫາອຳນາດໂລກ ແລະ ການລະບາດຂອງພະຍາດໂຄວິດ – 19 ລ້ວນແຕ່ເປັນປັດໄຈສຳຄັນທີ່ຖ່ວງດຶງທ່າອ່ຽງການຂະຫຍາຍຕົວຂອງເສດຖະກິດໂລກ ໂດຍຄາດວ່າເສດຖະກິດໂລກຈະຂະຫຍາຍຕົວຊ້າລົງຢູ່ທີ່ 3,2% ໃນປີນີ້, ຈາກ 6% ເມື່ອປີຜ່ານມາ ແລະ ໃນປີ 2023 ອາດຈະຂະຫຍາຍຕົວພຽງ 2,7% ເທົ່ານັ້ນ.

ທ່ານ ນາງ ຄຣິສຕາລີນາ ຈໍເຈຍວາ ຜູ້ອຳນວຍການ ໄອເອັມເອັຟ ກ່າວຕໍ່ກອງປະຊຸມເອເປັກຈັດຂຶ້ນທີ່ປະເທດໄທ ວ່າ: ເສດຖະກິດຂອງບັນດາສະມາຊິກເອເປັກ ສ່ວນໃຫຍ່ຊະລໍຕົວລົງ ແລະ ຢ່າງໜ້ອຍ 1 ໃນ 3 ຂອງໂລກຈະກ້າວເຂົ້າສູ່ສະພາວະທົດຖອຍ ໂດຍສະຫະລັດອາເມຣິກາ, ສະຫະພາບເອີຣົບ ແລະ ສປ ຈີນ ກຳລັງປະເຊີນກັບສະພາວະເສດຖະກິດຊະລໍຕົວລົງພ້ອມກັນ ເຊິ່ງສົ່ງຜົນກະທົບຕໍ່ການສົ່ງອອກຂອງບັນດາປະເທດເສດຖະກິດໃໝ່ ໂດຍທັງສະຫະລັດ, ຈີນ ແລະ ເອີຣົບ ຖືວ່າເປັນຫົວຈັກຫຼັກໃນການຂັບເຄື່ອນເສດຖະກິດໂລກ.

No photo description available.

ແນວໃດກໍຕາມ, ສະຖານະການເສດຖະກິດບາງພາກພື້ນ ຍັງມີຄວາມສົດໃສ ໂດຍພາກພື້ນອາຊຽນເປັນໜຶ່ງໃນນັ້ນ ເຊັ່ນດຽວກັນກັບບາງປະເທດທີ່ໄດ້ຮັບຜົນປະໂຫຍດຈາກເງື່ອນໄຂການຄ້າທີ່ດີຂຶ້ນ ເຊັ່ນ: ກຸ່ມປະເທດອາຣັບ, ແນວໃດກໍຕາມ ໂດຍລວມແລ້ວເສດຖະກິດໂລກ ກຳລັງຢູ່ໃນພາວະຂາລົງ.