ໄດ້ຄົບແລ້ວຮອບ 4 ທີມຍິງ ແລະ 4 ທີມຊາຍສຸດທ້າຍ ລຸ້ນແຊັມບານເຕະນັກຮຽນ ໂຄປາ ໂຄຄາ-ໂຄລາ

24

ການແຂ່ງຂັນກີລາບານເຕະນັກຮຽນທົ່ວປະເທດ ຊິງຂັນທ່ານລັດຖະມົນຕີກະຊວງສຶກສາທິການ ແລະ ກີລາ Copa Coca-Cola Lao ຄັ້ງທີ V ປະຈຳປີ 2022 ຮອບຄັດເລືອກ ໂຊນພາກໃຕ້ ທີ່ສະໜາມກີລາແຂວງຈຳປາສັກ ສໍາເລັດເປັນທີ່ຮຽນຮ້ອຍປາກົດວ່າ: ທີມແຂວງຈໍາປາສັກ ທັງທີມຍິງ ແລະ ທີມຊາຍ ຄວ້າແຊັມໄປຄອງ ພ້ອມກັບຄວ້າສິດເຂົ້າຮ່ວມການແຂ່ງຂັນຮອບສຸດທ້າຍທີ່ນະຄອນຫຼວງວຽງຈັນ ໃນທ້າຍເດືອນນີ້.

ເມື່ອທ້າຍອາທິດທີ່ຜ່ານມາ ທີ່ສະໜາມບານເຕະແຂວງຈໍາປາສັກ ໄດ້ມີການແຂ່ງຂັນບານເຕະນັກຮຽນທົ່ວປະເທດ ຊີງຂັນທ່ານລັດຖະມົນຕີກະຊວງສຶກສາທິການ ແລະ ກີລາ Copa Coca-Cola Lao ຄັ້ງທີ V ປະຈຳປີ 2022 ຮອບຄັດເລືອກ ໂຊນໃຕ.

ຜ່ານການແຂ່ງຂັນປາກົດວ່າ: ແຂວງຈໍາປາສັກ ສາມາດເອົາຊະນະ ແຂວງສະຫວັນນະເຂດ 3-1 ແລະ ແຂວງຄໍາມ່ວນ ດວນຈຸດໂທດເອົາຊະນະ ອັດຕະປື 4-3 ຫຼັງສະເໝີກັນ 1-1 ເຮັດໃຫ້ ແຂວງຈໍາປາສັກ ຜ່ານເຂົ້າຮອບຊີງຊະນະເລີດພົບກັບ ແຂວງຄໍາມ່ວນ ໂດຍໃນຮອບຊີງແຂ່ງຂັນໃນວັນທີ 14 ພະຈິກ 2022 ປາກົດວ່າ: ແຂວງຈໍາປາສັກ ເອົາຊະນະ ຄໍາມ່ວນ 3-0 ຄວ້າແຊັມຮອບຄັດເລືອກໂຊນພາກໃຕ້.

ສ່ວນ ທີມຍິງຂອງ ຈໍາປາສັກ ກໍສາມາດບຽດເອົາຊະນະ ບໍລິຄໍາໄຊ 1-0 ຄວ້າແຊັມຮອບຄັດເລືອກ ໂຊນພາກໃຕ້ໄປຄອງເຊັ່ນດຽວກັນ ເຮັດໃຫ້ ທີມບານເຕະນັກຮຽນຈໍາປາສັກ ທັງທີມຍິງ ແລະ ທີມຊາຍ ຄວ້າແຊັມຮອບຄັດເລືອກ ພ້ອມສິດໄປແຂ່ງຂັນໃນຮອບສຸດທ້າຍຂອງລາຍການ Copa Coca-Cola Lao ຄັ້ງທີ V ປະຈຳປີ 2022 ທີ່ຈະຈັດຂຶ້ນໃນທ້າຍເດືອນພະຈິກ 2022 ທີ່ສະໜາມບານເຕະຫຍ້າທຽມ ລ້ານຊ້າງ ສະເຕດ້ຽມ ບານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ.

ຂະນະທີ່ ທີມແຊັມຮອບຄັດເລືອກພາກເໜືອ ທີມຊາຍແມ່ນ ໄຊຍະບູລີ ແລະ ແຊັມທີມຍິງແມ່ນ ຫຼວງພະບາງ ໂດຍທີມແຊັມຈາກພາກເໜືອ ແລະ ພາກໃຕ້ ຈະເດີນທາງມາແຂ່ງຂັນທີ່ນະຄອນຫຼວງວຽງຈັນ ເພື່ອເຂົ້າຮ່ວມແຂ່ງຂັນກັບທີມຕົວແທນຈາກນະຄອນຫຼວງວຽງຈັນ ທີ່ຢືນລໍຖ້າຢູ່ໃນຮອບ 4 ທີມປະກອບມີ: ທີມຊາຍມີ ມສ ສາລາຄໍາ ກັບ ມສ ຫງຽນຢູ ຈາກນະຄອນຫຼວງ, ໄຊຍະບູລີ ແລະ ຈໍາປາສັກ, ສ່ວນ ທີມຍິງມີ ມສ ສົມສະຫວາດ ກັບ ມສ ໂຄກສີວິໄລ ຈາກນະຄອນຫຼວງຫຼວງ, ຫຼວງພະບາງ ແລະ ຈໍາປາສັກ.

ຂ່າວ: Larh Creators; ຮູບຈາກ: COPA Coca-Cola Laos