ສຳນັກຂ່າວຕ່າງປະເທດລາຍງານວ່າ: ລັດຖະບານຍີ່ປຸ່ນ ເປີດເຜີຍວ່າ ລວມຍອດຜະລິດຕະພັນພາຍໃນ ( GDP ) ຂອງຍີ່ປຸ່ນໃນໄຕມາດ 3 ຂອງປີ 2022 ຫົດຕົວ 1,2% ເມື່ອທຽບປີຕໍ່ປີ ເນື່ອງຈາກການອຸປະໂພກ – ບໍລິໂພກຊະລໍຕົວລົງ, ຂະນະທີ່ການນຳເຂົ້າສູງກວ່າການສົ່ງອອກ ເຮັດໃຫ້ຍີ່ປຸ່ນຂາດດຸນການຄ້າ.
ລາຍງານລະບຸວ່າ: ການອຸປະໂພກ – ບໍລິໂພກ ເຊິ່ງຄິດເປັນສັດສ່ວນກວມເອົາກວ່າເຄິ່ງໜຶ່ງຂອງລະບົບເສດຖະກິດຍີ່ປຸ່ນ ເພີ່ມຂຶ້ນພຽງແຕ່ 0,3% ເມື່ອທຽບໃສ່ໄລຍະດຽວກັນຂອງປີຜ່ານມາ ເຊິ່ງດີກວ່າທີ່ຄາດການໄວ້ ວ່າຈະເພີ່ມຂຶ້ນ 0,2% ແຕ່ເມື່ອທຽບໃສ່ໄຕມາດ 2 ຖືວ່າຫົດຕົວລົງຫຼາຍ ໂດຍໄຕມາດ 2 ເພີ່ມຂຶ້ນ 1,2%.
ນອກຈາກນີ້, ເສດຖະກິດຍີ່ປຸ່ນ ໄດ້ຮັບແຮງກົດດັນຈາກອັດຕາເງິນເຟີ້ເພີ່ມສູງຂຶ້ນ ບວກກັບການອ່ອນຄ່າລົງຢ່າງຕໍ່ເນື່ອງຂອງເງິນເຢນ ເຮັດໃຫ້ຕົ້ນທຶນການນຳເຂົ້າສິນຄ້າເພີ່ມສູງຂຶ້ນ ໂດຍສະເພາະຕົ້ນທຶນລາຄາພະລັງງານ ແລະ ວັດຖຸດິບ ເຮັດໃຫ້ຕົ້ນທຶນການຜະລິດເພີ່ມສູງຂຶ້ນ ແລະ ເມື່ອຕົ້ນທຶນການຜະລິດສູງຂຶ້ນ ກໍບີບໃຫ້ລາຄາສິນຄ້າ ແລະ ບໍລິການເພີ່ມສູງຂຶ້ນ ຈຶ່ງເປັນທີ່ມາຂອງອັດຕາເງິນເຟີ້.
ນອກຈາກນີ້, ຕົ້ນທຶນສູງຂຶ້ນ ຍັງເຮັດໃຫ້ບັນດາ ບໍລິສັດ ຜູ້ປະກອບການຕ່າງກໍພະຍາຍາມຫຼຸດຄ່າໃຊ້ຈ່າຍລົງ ໂດຍຂໍ້ມູນບົ່ງຊີ້ວ່າ ການໃຊ້ຈ່າຍຂອງບໍລິສັດໃນຍີ່ປຸ່ນ ເພີ່ມຂຶ້ນພຽງແຕ່ 1,5% ໃນໄຕມາດ 3 ເຊິ່ງໜ້ອຍກວ່າຕະຫຼາດຄາດການໄວ້ວ່າ ຈະເພີ່ມຂຶ້ນ 2,1% ແລະ ຊະລໍຕົວລົງຫຼາຍ ເມື່ອທຽບກັບໄຕມາດ 2 ທີ່ຂະຫຍາຍຕົວ 2,4%.