ສຳນັກຂ່າວຕ່າງປະເທດລາຍງານຈາກອິນໂດເນເຊຍ ເມື່ອວັນທີ 14 ພະຈິກ 2022 ວ່າ ທະນາຄານກາງ 5 ປະເທດສະມາຊິກອາຊຽນ ໄດ້ແກ່: ອິນໂດເນເຊຍ, ມາເລເຊຍ, ຟີລິບປິນ, ໄທ ແລະ ສິງກະໂປ ໄດ້ລົງນາມບົດບັນທຶກ ( MOU ) ວ່າດ້ວຍການເຮັດທຸລະກຳທາງການເງິນ ( ຊຳລະເງິນ ) ລະຫວ່າງປະເທດ ໂດຍນຳໃຊ້ນະວັດຕະກຳ ຄິວອາໂຄດ.
ທັງນີ້, ພິທີລົງນາມດັ່ງກ່າວເກີດຂຶ້ນນອກຮອບກອງປະຊຸມສຸດຍອດຜູ້ນຳ G20 ທີ່ອິນໂດເນເຊຍ ໂດຍຜູ້ວ່າການທະນາຄານກາງຂອງອິນໂດເນເຊຍ ກ່າວວ່າ ການລົງນາມບົດບັນທຶກຄັ້ງນີ້ ຈະເຮັດໃຫ້ການເຮັດທຸລະກຳທາງການເງິນລະຫວ່າງກັນ ໃຫ້ສຳເລັດຕາມເປົ້າໝາຍທີ່ວາງໄວ້ ໂດຍບໍ່ຈຳເປັນຕ້ອງແປງ ຫຼື ປ່ຽນເປັນສະກຸນເງິນໂດລາອີກຕໍ່ໄປ.
ທັງນີ້, ອິນໂດເນເຊຍ ແລະ ໄທ ເລີ່ມເຊື່ອມຕໍ່ດ້ວຍຄິວອາໂຄດ ຕັ້ງແຕ່ເດືອນສິງຫາ 2022 ເປັນຕົ້ນມາ ເຊິ່ງຫຼັງຈາກນີ້ ອິນໂດເນເຊຍ ມີແຜນຂະຫຍາຍການຮ່ວມມືແບບດຽວກັນນີ້ ກັບສິງກະໂປ ແລະ ມາເລເຊຍ ຕາມດ້ວຍຟີລິບປິນໃນປີໜ້າ, ການລົງນາມບົດບັນທຶກຄັ້ງນີ້ ຖືວ່າເປັນບາດກ້າວສຳຄັນຢ່າງຍິ່ງ ໃນການເຊື່ອມໂຍງລະບົບການຊຳລະເງິນ ລະຫວ່າງກຸ່ມປະເທດໃນອາຊີຕາເວັນອອກສ່ຽງໃຕ້ ( ອາຊຽນ ) ເພື່ອຍູ້ແຮງການພັດທະນາເສດຖະກິດ – ການເງິນໃນພາກພື້ນ.
