ສຳນັກຂ່າວຕ່າງປະເທດລາຍງານວ່າ: ທ່ານ ມາກ ຊັກເກີເບີກ ( Mark Zuckerberg ) ຜູ້ບໍລິຫານ ບໍລິສັດເມຕາ ເຊິ່ງເປັນເຈົ້າຂອງເຟສບຸ໊ກ ໄດ້ປະກາດປົດພະນັກງານອອກຈາກບໍລິສັດ ຈຳນວນ 11 ພັນຄົນ ຫຼື ປະມານ 13% ຂອງຈຳນວນພະນັກງານທັງໝົດ ໂດຍໄດ້ແຈ້ງໃຫ້ພະນັກງານຮັບຮູ້ເຖິງຄວາມປ່ຽນແປງຄັ້ງໃຫຍ່ ແຕ່ວັນທີ 9 ພະຈິກ 2022.
ນອກຈາກນີ້, ຜູ້ບໍລິຫານຂອງເມຕາ ຍັງໄດ້ແຈ້ງວ່າ ບໍລິສັດຈະດຳເນີນມາດຕະການເພີ່ມຕື່ມ ເພື່ອໃຫ້ບໍລິສັດມີຄວາມຄ່ອງຕົວ ແລະ ມີປະສິດທິພາບຂຶ້ນ ດ້ວຍການຫຼຸດຄ່າໃຊ້ຈ່າຍທີ່ຟຸ່ມເຟືອຍລົງ ແລະ ຈະບໍ່ຮັບພະນັກງານໃໝ່ຈົນໝົດໄຕມາດທຳອິດຂອງປີ 2023.
ທັງນີ້ ບໍລິສັດເມຕາ ມີພະນັກງານທັງໝົດ ປະມານ 78 ພັນຄົນ ຈາກທົ່ວໂລກ ໂດຍການປະກາດເລີກຈ້າງຄັ້ງນີ້ ມີຂຶ້ນໃນທ່າມກາງທີ່ບໍລິສັດເມຕາ ແພຼັດຟອມ ອິ້ງ ເຊິ່ງເປັນບໍລິສັດແມ່ຂອງເຟສບຸ໊ກ ໄດ້ເຕືອນນັກລົງທຶນເມື່ອທ້າຍເດືອນຕຸລາຜ່ານມາວ່າ: ຜົນປະກອບການໃນໄຕມາດສຸດທ້າຍຂອງປີນີ້ ອາດຈະຕ່ຳກວ່າທີ່ຄາດການໄວ້, ຫຼັງຈາກມີຄຳເຕືອນອອກມາ ເຮັດໃຫ້ຫຸ້ນຂອງບໍລິສັດເມຕາ ຫຼຸດລົງເຖິງ 20% ຈົນນັກລົງທຶນກັງວົນກ່ຽວກັບຕົ້ນທຶນ ແລະ ຄ່າໃຊ້ຈ່າຍຂອງບໍລິສັດສູງຂຶ້ນ.
