ສຳນັກຂ່າວຕ່າງປະເທດລາຍງານວ່າ ສຳນັກງານຈັດອັນດັບ “ ຮູ່ຣຸ່ນ ຣິຊ ” ໄດ້ຈັດອັນດັບຄົນທີ່ຮັ່ງມີ ( ຄວາມລ້ຳລວຍ ) ທີ່ສຸດຂອງຈີນ ທີ່ມີຊັບສິນຕ່ຳສຸດ 5 ຕື້ຢວນ ໂດຍພົບວ່າປີ 2022 ນີ້ ມີມະຫາເສດຖີຕິດຢູ່ໃນອັນດັບພຽງ 1.035 ຄົນ ຫຼຸດລົງ 11% ເມື່ອທຽບໃສ່ປີຜ່ານມາ, ຂະນະທີ່ ຄວາມມັ່ງຄັ່ງລວມຂອງພວກເຂົາຢູ່ທີ່ 3,5 ພັນຕື້ໂດລາສະຫະລັດ ຫຼຸດລົງ 18% ເນື່ອງຈາກເສດຖະກິດໂລກໄດ້ຮັບຜົນກະທົບຈາກ ຄວາມຂັດແຍ່ງລະຫວ່າງ ຣັດເຊຍ ແລະ ອູແກຣນ, ໃນຂະນະດຽວກັນເສດຖະກິດຈີນ ກໍຂະຫຍາຍຕົວຊ້າລົງ.
ທັງນີ້, ທ່ານ ຈົງ ຊານຊ່ານ ເຈົ້າຂອງບໍລິສັດນ້ຳດື່ມ “ ໜົງຝູ ສະປຣິງ ” ແລະ ບໍລິສັດຜູ້ພັດທະນາວັກຊີນ “ ປັກກິ່ງ ວ່ານໄທ່ ໄບໂອໂລຈີຄອລ ຟາມາຊີ ເອັນເຕີໄພຣ ” ຄອງອັນດັບໜຶ່ງມະຫາເສດຖີຂອງຈີນ ເປັນປີທີ 2 ຕິດຕໍ່ກັນ ໂດຍມີຊັບສິນເພີ່ມຂຶ້ນ 17% ມູນຄ່າ 65 ຕື້ໂດລາສະຫະລັດ. ຂະນະທີ່ ທ່ານ ຈາງ ອີໝິ້ງ ຜູ້ສ້າງຕັ້ງບໍລິສັດ ໄບແດນ ເຊິ່ງເປັນເຈົ້າຂອງແພຼັດຟອມ “ ຕິກຕ໊ອກ ” ຈະເປັນມະຫາເສດຖີອັນດັບ 2 ແຕ່ ຄວາມມັ່ງຄັ່ງຂອງລາວ ຫຼຸດລົງ 28% ຢູ່ທີ່ລະດັບ 35 ຕື້ໂດລາສະຫະລັດ ເນື່ອງຈາກການປະເມີນມູນຄ່າຂອງບໍລິສັດຫຼຸດລົງ.
