ເປີດຢ່າງເປັນທາງການ ງານບຸນນະມັດສະການພະທາດຫຼວງ ປະຈຳປີ 2022 ຄົບງັນລະຫວ່າງ 4-8 ພະຈິກນີ້

282

ງານບຸນນະມັດສະການພະທາດຫລວງວຽງຈັນ ແລະ ງານຕະຫລາດນັດ ປະຈຳປີ 2022, ໄດ້ເປີດຂຶ້ນຢ່າງເປັນທາງການ ໃນລະຫວ່າງວັນທີ 4-8 ພະຈິກ 2022 ນີ້, ເຊິ່ງຄະນະຮັບຜິດຊອບຈັດງານ ໄດ້ຈັດຂຶ້ນຢ່າງຍິ່ງໃຫຍ່ ທັງຢູ່ເດີນທາດຫລວງ, ເດີນສະໜາມຫລວງ ແລະ ຢູ່ ສູນການຄ້າລາວ-ໄອເຕັກ, ໂດຍໄດ້ຈັດໃຫ້ມີຫລາກຫລາຍກິດຈະກຳ ທີ່ສອດຄ່ອງກັບ ຮີດຄອງປະເພນີ ແລະ ວັດທະນະທຳອັນດີງາມ ຂອງຊາດລາວ, ໃຫ້ກຽດເຂົ້າຮ່ວມ ເປີດງານດັ່ງກ່າວ ມີທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ, ມີບັນດາການນໍາພັກ, ລັດ ພ້ອມດ້ວຍແຂກຖືກເຊີນ ທັງພາຍໃນ ແລະ ຕ່າງປະເທດ ເຂົ້າຮ່ວມ.

ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ, ຫົວໜ້າຄະນະຊີ້ນຳຈັດງານບຸນ ລາຍງານໃຫ້ຮູ້ວ່າ: ງານບຸນນະມັດສະການພະທາດຫລວງປີນີ້, ສະເພາະຢູ່ພາຍໃນເດີ່ນທາດຫລວງ ແລະ ເດີ່ນສະໜາມຫລວງ ຈະມີງານວາງສະແດງສິນຄ້າປະເພດຕ່າງໆ ໃນນັ້ນ, ມີ ສິນຄ້າໂອດັອບ, ສິນຄ້າຄອບຄົວຕົວແບບ, ສິນຄ້າອຸດສາຫະກຳ, ກະສິກຳ ແລະ ບໍລິການ ທີ່ນຳມາຈາກນະຄອນຫລວງວຽງຈັນ, ຈາກ 16 ແຂວງທົ່ວປະເທດ, ຈາກນະຄອນ, ແຂວງມິດຕະພາບ ກໍຄື: ນະຄອນຫລວງຮ່າໂນ້ຍ ສສ ຫວຽດນາມ,

ນະຄອນຄຸນໝິງ ແຂວງຫູໜານ, ແຂວງຢຸນໜານ ສປ ຈີນ, ແຂວງໜອງຄາຍ ລາດຊະອານາຈັກໄທ ລວມທັງໝົດ 536 ຫ້ອງ; ນອກນັ້ນ, ຍັງມີການວາງສະແດງການທ່ອງ ທ່ຽວ, ເຂດທ່ອງທ່ຽວເຮືອນລາວ, ສະແດງນະວັດຕະກຳໃໝ່ ທາງລົດໄຟຄວາມໄວສູງ ແລະ ສິນຄ້າທົ່ວໄປອື່ນໆ ຈາກພາຍໃນ ແລະ ຕ່າງປະເທດ 669 ຫ້ອງ. ນອກນັ້ນ ຍັງມີປະເພດອາຫານ ເຄື່ອງດື່ມ, ເຂົ້າຫລາມ ປີ້ງໄກ່ ຢູ່ຂອບເຂດຮອບນອກ 146 ກວ່າຫ້ອງ ລວມທັງໝົດ 1.351 ກວ່າຫ້ອງ. ພ້ອມດຽວກັນນັ້ນ, ເພື່ອບໍ່ໃຫ້ມີການແອ້ອັດ ຄະນະຮັບຜິດຊອບຈັດງານບຸນ ໄດ້ກໍານົດການຈັດງານ ຢູ່ສູນການຄ້າ ລາວ-ໄອເຕັກ ໂດຍມີຈຳນວນຫ້ອງວາງສະແດງ ໄວ້ຮອງຮັບ ທັງໝົດ 480 ກວ່າຫ້ອງ.

ໃນງານຍັງມີການສະແດງສິລະປະວັນນະຄະດີ ຢູ່ເວທີກາງ ເຊິ່ງມີບົດຟ້ອນ, ຂັບລຳຈາກກອງສິລະປະກອນສູນກາງ, ກອງສິລະປະກອນກອງທັບ, ໜ່ວຍສິລະປະກອນຈາກ 9 ເມືອງ ພາຍໃນນະຄອນຫລວງວຽງຈັນ, ສູນວັດທະນະທຳເດັກ ແລະ ສະໂມສອນດ່ານຊ້າງ ມາເຂົ້າຮ່ວມສະແດງໃນແຕ່ລະວັນ.

ພາຍໃນງານບຸນ ສະເພາະ ວັນທີ 6 ພະຈິກ, ເວລາ 16:00 ໂມງ ຈະມີພິທີສູດປະລິຕະມຸງຄຸນທີ່ພະທາດຫລວງ, ວັນທີ 7 ພະຈິກ ເວລາ 13:30 ໂມງ ພິທີແຫ່ຜາສາດເຜິ້ງ ແລະ ໃນວັນທີ 8 ພະຈິກ ເວລາ 7:00 ໂມງ ຈະມີພິທີໃສ່ບາດຖວາຍສັງກະທານ, ຮອດເວລາ 13:00 ໂມງ ຈະມີພິທີແຫ່ລູກຄີ ແລະ ແຂ່ງຂັນກິລາພື້ນບ້ານຕີຄີ, ຫລັງຈາກນັ້ນ, ເວລາ 19:00 ໂມງ ຈະມີພິທີວຽນທຽນ ແລະ ຈູດທູບທຽນ, ບັ້ງໄຟ ສັກກະລະບູຊາອົງພະທາດ.

ການຈັດງານບຸນໃນຄັ້ງນີ້, ເພື່ອເປັນການອະນຸລັກຮັກສາ ແລະ ສົ່ງເສີມວັດທະນະທຳ, ຮີດຄອງປະເພນີ ອັນດີງາມ ຂອງບຸນນະມັດສະການພຣະທາດຫລວງ ຂອງຊາວລາວ ກໍຄື ຊາວນະຄອນຫລວງວຽງຈັນ ທີ່ເຄີຍສືບທອດກັນມາແຕ່ບູຮານນະການ ໃຫ້ມີຄວາມໂດດເດັ່ນ ແລະ ເປັນທີ່ຮັບຮູ້ໃນເວທີສາກົນ, ພ້ອມນັ້ນ, ທັງເປັນການ ສ້າງໂອກາດໃນການຈັດຕັ້ງປະຕິບັດ 2 ວາລະແຫ່ງຊາດ

ກໍຄື ການຟື້ນຟູເສດຖະກິດ ດ້ວຍຮູບການຊຸກຍູ້ສົ່ງເສີມການທ່ອງທ່ຽວ, ການຄ້າ, ສິນຄ້າຄອບຄົວຕົວແບບ ທີ່ຈະກ້າວເປັນສິນຄ້າໂອດ໋ອບ ທີ່ໄດ້ກາໝາຍແຫ່ງຊາດ ແລະ ສິນຄ້າຂອງບັນດາວິສາຫະກິດຂະໜາດນ້ອຍ ແລະ ກາງ ໄດ້ມາວາງສະແດງ ແລະ ຈຳໜ່າຍສິນຄ້າທັງພາຍໃນ ແລະ ຕ່າງປະເທດ ໃຫ້ປະຊາຊົນຊາວນະຄອນຫລວງວຽງຈັນ ຕະຫລອດຮອດແຂກທັງພາຍໃນ ແລະ ຕ່າງປະເທດ ໄດ້ເຫັນ ແລະ ໄດ້ຊົມໃຊ້ສິນຄ້າ, ພ້ອມທັງເປັນການແລກປ່ຽນບົດຮຽນ ປະສົບການຕ່າງໆຂອງບັນດາຫົວໜ່ວຍທຸລະກິດດ້ວຍກັນ.