10 ກວ່າປີ ສະຕາໂທລະຄົມ ຂະຫຍາຍເຄືອຂ່າຍໄດ້ 9.000 ສູນສະຖານີ ມີຜູ້ໃຊ້ບໍລິການ 3,5 ລ້ານເລກໝາຍ

35

ໃນໂອກາດທີ່ແຫ່ງການຕ້ອນຮັບທ່ານ ພົ.ທ ຫວູ້ ຫາຍ ສານ ຮອງລັດຖະມົນຕີ ກະຊວງປ້ອງກັນປະເທດແຫ່ງ ສສ ຫວຽດນາມ ເຂົ້າຢ້ຽມຢາມ; ບໍລິສັດ ສະຕາໂທລະຄົມ ໄດ້ເຜີຍເຖິງຜົນປະກອບການ 10 ກວ່າປີໃນລາວ ຜົນຕອບຮັບເປັນທີ່ພໍໃຈ ປັດຈຸບັນ ມີເຄືອຂ່າຍພື້ນຖານໂຄງລ່າງ 9.000 ສູນສະຖານີ BTS; ມີສ່ວນແບ່ງຕະຫຼາດ 3,5 ລ້ານເລກໝາຍ ສ້າງວຽກເຮັດງານທໍາ 20 ພັນກວ່າຕໍາແໜ່ງງານ.

ໃນວັນທີ 2 ພະຈິກ ປີ 2022 ທີ່ສໍານັກງານໃຫຍ່ ບໍລິສັດ ສະຕາ ໂທລະຄົມ (ຢູນີເທວ) ໄດ້ຈັດຕັ້ງພິທີຕ້ອນຮັບ ທ່ານ ພົ.ທ ຫວູ້ ຫາຍ ສານ, ຮອງລັດຖະມົນຕີ ກະຊວງປ້ອງກັນປະເທດແຫ່ງ ສສ ຫວຽດນາມ, ທ່ານ ດາວ ຊວັນ ຫວູ້ ຮອງຜູ້ອຳນວຍການກຸ່ມບໍລິສັດຫວຽດເທວ ພ້ອມດ້ວຍຄະນະຜູ້ແທນຂັ້ນສູງ ທີ່ມາຢ້ຽມຢາມ ແລະ ເຮັດວຽກ ຢູ່ ບໍລິສັດ ສະຕາ ໂທລະຄົມ ເປັນກຽດເຂົ້າຮ່ວມງານໂດຍ ທ່ານ ພົ.ຕ ວົງຄຳ ພົມມະກອນ, ຮອງລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ຕະຫຼອດຮອດພະນັກງານບໍລິສັດ ສະຕາໂທລະຄົມຮ່ວມຕ້ອນຮັບ.

ໃນງານດັ່ງກ່າວ, ຜູ້ອໍານວຍການໃຫຍ່ ບໍລິສັດ ສະຕາໂທລະຄົມ ໄດ້ລາຍງານໂດຍຫຍໍ້ ກ່ຽວກັບບັນດາຜົນງານທີ່ໄດ້ບັນລຸໃນ 14 ປີຜ່ານມາວ່າ: ຫຼັງຈາກ 14 ປີດຳເນີນທຸລະກິດ, ຢູນີເທວ ໄດ້ກາຍເປັນເຄືອຂ່າຍທີ່ໃຫຍ່ທີ່ສຸດ, ເປັນໜຶ່ງໃນບໍລິສັດ ທີ່ປະກອບສ່ວນງົບປະມານໃຫ້ລັດຫຼາຍທີ່ສຸດ ພ້ອມທັງສ້າງຄວາມໄວ້ເນື້ອເຊື່ອໃຈຕໍ່ລັດຖະບານ ແລະ ປະຊາຊົນລາວ, ເປັນທີ່ຍອມຮັບຂອງພັກ – ລັດຖະບານຂອງສອງຝ່າຍ, ສອງປະເທດ ທີ່ເປັນແບບຢ່າງ ໃນວຽກງານການຮ່ວມມືທາງດ້ານເສດຖະກິດ.

ໃນປັດຈຸບັນ, ຢູນີເທວ ມີເຄືອຂ່າຍພື້ນຖານໂຄງລ່າງໃຫຍ່ທີ່ສຸດໃນລາວ ມີ 9.000 ສູນສະຖານີ BTS (ໃນນັ້ນ, ມີເຖິງ 4.000 ສູນສະຖານີ 4G) ແລະ ລະບົບສາຍສົ່ງແກ້ວໃຍແສງຫຼາຍກວ່າ 37.500 KM; ມີສ່ວນແບ່ງຕະຫຼາດ ນໍາໜ້າໃນລາວ ໂດຍມີ 3,5 ລ້ານເລກໝາຍ ກວມ 58% ສ່ວນແບ່ງຕະຫຼາດຂະແໜງໂທລະຄົມ ສ້າງວຽກເຮັດງານທໍາໃຫ້ພະນັກງານທົ່ວປະເທດຫຼາຍກວ່າ 27.000 ຄົນ

ເຖິງແມ່ນວ່າ ຈະດໍາເນີນທຸລະກິດ ແຕ່ກໍບໍ່ເຄີຍລືມໜ້າທີ່ຮັບຜິດຊອບຕໍ່ສັງຄົມ, ຢູນີເທວໄດ້ເອົາໃຈ ໃສ່ສະໜັບສະໜູນແກ່ລັດຖະບານລາວໃນການຫັນເປັນດີຈີຕອນ ແລະ ກໍ່ສ້າງໂຄງລ່າງ ລັດຖະບານເອເລັກໂຕຣນິກ ລວມມູນຄ່າຫຼາຍກວ່າ 3,3 ລ້ານໂດລາສະຫະລັດ ຈັດຕັ້ງປະຕິບັດຫຼາກຫຼາຍບັນດາກິດຈະກໍາຊ່ວຍເຫຼືອສັງຄົມ ລວມມູນຄ່າການສະໜັບສະໜູນຫຼາຍກວ່າ 31 ລ້ານໂດລາສະຫະລັດ ເຊັ່ນ: ຟຣີອິນເຕີເນັດໃຫ້ແກ່ບັນດາໂຮງຮຽນ, ຝຶກອົບຮົມໃຫ້ແກ່ບຸກຄະລາກອນທາງດ້ານເຕັກໂນໂລຊີໂທລະຄົມມະນາຄົມລາວ ຫຼາຍກວ່າ 100 ຄົນ, ສະໜັບສະໜູນການກໍ່ສ້າງໂຮງຮຽນ, ຊ່ວຍເຫຼືອທຶນການສຶກສາໃຫ້ແກ່ນັກຮຽນເກັ່ງທີ່ທຸກຍາກ, ສາທາລະນະສຸກ, ຊ່ວຍເຫຼຶອຜູ້ປະສົບໄພນໍ້າຖ້ວມຈາກທໍາມະຊາດ

ໂອກາດດັ່ງກ່າວ ທ່ານ ພົ.ທ ຫວູ້ ຫາຍ ສານ ກໍໄດ້ກ່າວໂອ້ລົມໃຫ້ທິດເຍືອງທາງຕໍ່ ບໍລິສັດໂດຍເນັ້ນໃຫ້ສືບຕໍ່ຮັກສາສາຍພົວພັນ ສາມັກຄີ – ມິດຕະພາບ ລະຫວ່າງພະນັກງານທັງຄົນລາວ ແລະ ຄົນຫວຽດນາມ, ເອົາໃຈໃສ່ດູແລ, ຍົກສູງໜ້າທີ່ ແລະ ຊີວິດການເປັນຢູ່ຂອງພະນັກງານຢ່າງໝັ້ນຄົງ; ສືບຕໍ່ປະຕິບັດ ບັນດາໜ້າທີ່ຂອງກະຊວງປ້ອງກັນປະເທດທີ່ທັງສອງຊາດໄດ້ວາງອອກໃຫ້ດີທີ່ສຸດ; ເປັນຜູ້ບຸກເປີກທາງດ້ານການຫັນເປັນດີຈິຕອນໃນລາວ, ສະໜອງບັນດາບໍລິການໃຫ້ແກ່ຂະບວນການຫັນເປັນດີຈິຕອນ ແລະ ສືບຕໍ່ປະຕິບັດບັນດາກິດຈະກໍາຊ່ວຍເຫຼືອສັງຄົມ, ປະກອບສ່ວນເຂົ້າໃນບັນດາຄຸນທາດວັດທະນະທຳ ໃຫ້ແກ່ບັນດາກຸ່ມທຸລະກິດໃນລາວ ໂດຍສະເພາະແມ່ນບັນດາກຸ່ມທຸລະກິດຫວຽດນາມທີ່ເຂົ້າມາລົງທຶນໃນປະເທດລາວ.