ການເປີດນຳໃຊ້ລົດໄຟ ລາວ-ຈີນ ຢ່າງເປັນທາງການແມ່ນເກືອບຄົບຮອບ 1 ປີ ແລ້ວ (ເປີດວັນທີ 3 ທັນວາ 2021). ສະນັ້ນ, ເພື່ອຮັບປະກັນການແລ່ນລົດໃຫ້ມີຄວາມປອດໄພ, ດ້ານປະລິມານ, ຄຸນນະພາບ ແລະ ປະສິດທິພາບຂອງການຂົນສົ່ງ.
ຕາມຂ່າວ ຊີອາໄອ ລາຍງານວ່າ: ວັນທີ 2 ພະຈິກ 2022 ຜ່ານມາ ບໍລິສັດລົດໄຟ ລາວ-ຈີນ ໄດ້ຈັດພິທີສ້ອມແປງວັດຖຸອຸປະກອນແບບລວມສູນ ແລະ ການບຳລຸງຮັກສາທາງລົດໄຟຄັ້ງທຳອິດຢູ່ເຂດສ້ອມແປງຄົບວົງຈອນນະຄອນຫຼວງວຽງຈັນ.
ການສ້ອມແປງອຸປະກອນແບບລວມສູນນີ້ແມ່ນວິທີທີ່ສຳຄັນເພື່ອເພີ່ມທະວີການຄຸ້ມຄອງອຸປະກອນຂັ້ນພື້ນຖານ ແລະ ຮັບປະກັນຄວາມປອດໄພໃນການຂົນສົ່ງ, ທັງເປັນວຽກງານທີ່ສຳຄັນໃນການຮັກສາ, ຮັບປະກັນຄຸນນະພາບອຸປະກອນ ແລະ ຍົກສູງປະສິດທິພາບ.
ເປົ້າໝາຍໃນການບຳລຸງຮັກສາ ແລະ ສ້ອມແປງວັດຖຸອຸປະກອນແບບລວມສູນຂອງບໍລິສັດທາງລົດໄຟລາວ-ຈີນ ໃນຄັ້ງນີ້ແມ່ນ “ສອງຫຼີກລ່ຽງ ແລະ ໜຶ່ງບັນລຸ” ຫຼີກລ່ຽງການບາດເຈັບເລັກນ້ອຍ ແລະ ອຸປະຕິເຫດຂະໜາດໃຫຍ່ຂອງພະນັກງານປະຕິບັດງານ ແລະ ຫຼີກລ່ຽງອຸບັດຕິເຫດການຂົນສົ່ງລົດໄຟປະເພດ D; ພ້ອມທັງບັນລຸຄຸນນະພາບອຸປະກອນ TQI<4.0mm ໃນພາກການດໍາເນີນງານ.
ໃນພິທີດັ່ງກ່າວ, ບໍລິສັດທາງລົດໄຟລາວ-ຈີນ ຍັງໄດ້ເນັ້ນເຖິງຄວາມຕ້ອງການປັບປຸງວຽກງານ, ການຈັດວາງຮອບດ້ານ, ການສະໜອງອຸປະກອນ, ບຸກຄະລາກອນ ແລະຊັບພະຍາກອນກໍ່ສ້າງອື່ນໆໃຫ້ພຽງພໍປະຕິບັດມາດຕະຖານທີ່ກຳນົດຢ່າງເຂັ້ມງວດ, ສ້າງເປົ້າໝາຍວຽກງານເປັນແຕ່ລະໄລຍະ, ປະຕິບັດໜ້າທີ່ຮັບຜິດຊອບຄຸ້ມຄອງພາກສະໜາມ, ເພີ່ມທະວີການຄວບຄຸມຄວາມສ່ຽງດ້ານຄວາມປອດໄພ, ຄຸ້ມຄອງຄຸນນະພາບຢ່າງເຂັ້ມງວດ, ດຳເນີນການກວດກາ ແລະ ຕິດຕາມກວດກາ ເພື່ອແກ້ໄຂບັນຫາທີ່ພົບເຫັນຢ່າງທັນການ, ຮັບປະກັນການການບຳລຸງຮັກສາ ແລະ ສ້ອມແປງວັດຖຸອຸປະກອນແບບລວມສູນໃຫ້ສຳເລັດຢ່າງປອດໄພ ແລະ ມີປະສິດທິຜົນສູງ.
ຈາກຂໍ້ມູນຍັງໃຫ້ຮູ້ຕື່ມອີກວ່າ, ໃນສິບເດືອນຫຼັງຈາກການເປີດທາງລົດໄຟຈີນ-ລາວ, ມາຮອດວັນທີ 3 ຕຸລານີ້, ຂົນສົ່ງຜູ້ໂດຍສານໄດ້ 7,39 ລ້ານເທື່ອຄົນ, ແລະ ຂົນສົ່ງສິນຄ້າໄດ້ 8,51 ລ້ານໂຕນ, ໃນນັ້ນ. ມີສິນຄ້າຂ້າມແດນ 1,54 ລ້ານໂຕນ.
