ເຫດໂສກອະນາດຕະກຳຢຽບກັນ ທີ່ ສ.ເກົາຫຼີ ຖືເປັນເຫດການໃຫຍ່ທີ່ມີຜູ້ເສຍຊີວິດຈຳນວນຫຼາຍ, ຈາກຂໍ້ມູນຫຼ້າສຸດ ວັນທີ 31 ຕຸລາ ມີຜູ້ເສຍຊີວິດລວມ 154 ຄົນ ແລະ ບາດເຈັບ 149 ຄົນ.
ເຫດການດັ່ງກ່າວເກີດຂຶ້ນໃນຕອນຄໍ່າຂອງວັນທີ 29 ຕຸລາ 2022 ໄດ້ເກີດເຫດການຢຽບກັນຢູ່ບໍລິເວນອ້ອມແອ້ມ ເຂດອິໄທວອນ ເມືອງ ຢອງຊັນ ນະຄອນຫຼວງ ເຊອຸນ ສ.ເກົາຫຼີ ເນື່ອງໄດ້ມີປະຊາຊົນ, ນັກທ່ອງທ່ຽວ ຈຳນວນຫຼາຍປະມານ 1 ແສນຄົນ ມາເຕົ້າໂຮມກັນຢູ່ບໍລິເວນອ້ອມແອ້ມ ເຂດອິໄທວອນ ເພື່ອຮ່ວມງານສະຫຼອງວັນຮະໂລວິນ ທີ່ບໍ່ໄດ້ຈັດງານມານານ 3 ປີ ເນື່ອງຈາກການລະບາດຂອງພະບາດໂຄວິດ-19. ເຫດບຽດຢຽບກັນດັ່ງກ່າວໄດ້ສົ່ງຜົນເຮັດໃຫ້ຢ່າງໜ້ອຍ 149 ຄົນເສຍຊີວິດ ແລະ 76 ຄົນບາດເຈັບ ຈາກການລາຍງານໂຕເລກໃນຂະນະນັ້ນ.
ພາຍຫຼັງເກີດເຫດ, ທ່ານ ຢູນຊອກໂຢ້ ປະທານາທິບໍດີ ສ. ເກົາຫຼີ ໄດ້ອອກຄໍາສັ່ງດ່ວນ ໂດຍໄດ້ຮຽກຮ້ອງໃຫ້ພາກສ່ວນທີ່ກ່ຽວຂ້ອງພະຍາຍາມຈົນສຸດຄວາມສາມາດເພື່ອກອບກູ້ປິ່ນປົວຜູ້ບາດເຈັບໂດຍໄວ. ທ່ານຍັງໄດ້ຮຽກຮ້ອງໃຫ້ກະຊວງສະຫວັດດີການ ແລະສາທາລະນະສຸກ ປະຕິບັດກົນໄກປິ່ນປົວສຸກເສີນໂດຍໄວ, ແລະແຕ່ງຕັ້ງໜ່ວຍປິ່ນປົວສຸກເສີນໂດຍໄວເທົ່າທີ່ຈະໄວໄດ້, ແລະຮັບປະກັນໂຮງໝໍທີ່ຢູ່ໃກ້ສະຖານທີ່ເກີດເຫດກຽມຕຽງນອນສຸກເສີນໃຫ້ພຽບພ້ອມ.
ມາຕອນເຊົ້າຂອງວັນທີ 30 ຕຸລາ, ເຈົ້າໜ້າທີ່ດັບເພີງຂອງ ສ. ເກົາຫຼີ ໄດ້ລາຍງານໃນກອງປະຊຸມຖະແຫຼງຂ່າວວ່າ: ໃນຈໍານວນຜູ້ເສຍຊີວິດ ແລະ ບາດເຈັບແມ່ນມີຊາວໜຸ່ມອາຍຸ 20 ປາຍປີເປັນຫຼັກ
ດ້ານຂໍ້ມູນຫຼ້າສຸດວັນທີ 31 ຕຸລາ ໄດ້ແຈ້ງເພີ່ມສຳລັບຍອດຜູ້ເສຍຊີວິດແມ່ນເພີ່ມຂຶ້ນເປັນ 154 ຄົນ (ຕ່າງປະເທດ 26 ຄົນ) ບາດເຈັບ 149 ຄົນ, ແຈ້ງຜູ້ສູນຫາຍ 355 ຄົນ.
