ແຈ້ງການປັບລາຄານ້ຳມັນເຊື້ອໄຟທຸກຊະນິດ. ໃນນີ້, ມີທັງປັບຂຶ້ນ ແລະ ປັບລົງ ເຊິ່ງລາຄານໍ້າມັນແອັດຊັງພິເສດ ປັບຂຶ້ນ 220 ກີບຕໍ່ລິດ, ແອັດຊັງທຳມະດາ ປັບລົງ 220 ກີບຕໍ່ລິດ ແລະ ກາຊວນ ປັບລົງ 330 ກີບຕໍ່ລິດ ເລີ່ມປະຕິບັດ 27 ຕຸລານີ້ ເວລາ 6:00 ໂມງ ຖືເປັນການປັບລາຄານໍ້າມັນຄັ້ງທີ 4 ຂອງເດືອນຕຸລາ.
ກະຊວງອຸດສາຫະກຳ ແລະ ການຄ້າ ອອກແຈ້ງ ເລກທີ 1506/ອຄ, ລົງວັນທີ 26 ຕຸລາ 2022 ເລື່ອງແຈ້ງປັບລາຄາຂາຍຍ່ອຍນໍ້າມັນເຊື້ອໄຟ ໃນຂອບເຂດທົ່ວປະເທດ ໂດຍແຈ້ງເຖິງສະມາຄົມນໍ້າມັນເຊື້ອໄຟ ແລະ ອາຍແກັດລາວ, ບັນດາບໍລິສັດນໍ້າມັນເຊື້ອໄຟ ແລະ ປໍ້າຂາຍຍ່ອຍນໍ້າມັນເຊື້ອໄຟ ຊາບ ແລະ ປະຕິບັດ ດັ່ງນີ້:
1. ປັບລາຄາຂາຍຍ່ອຍນໍ້າມັນເຊື້ອໄຟທຸກຊະນິດ ຄື: ນໍ້າມັນແອັດຊັງພິເສດ ປັບຂຶ້ນ 220 ກີບ/ລິດ ແລະ ນ້ຳມັນແອັດຊັງທຳມະດາ ປັບລົງ 220 ກິບ/ລິດ, ສ່ວນນໍ້າມັນກາຊວນ ປັບລົງ 330 ກີບ/ລິດ.
ລາຄາຕາມຕາຕະລາງລຸ່ມນີ້ ແມ່ນຈຸດນະຄອນຫຼວງວຽງຈັນ:
ທັງນີ້, ລາຄາໃໝ່ນີ້ ແມ່ນໃຫ້ເລີ່ມປະຕິບັດວັນທີ 27 ຕຸລາ 2022, ເວລາ 06:00 ໂມງ ໃນຂອບເຂດທົ່ວປະເທດ, ການຄິດໄລ່ພັນທະ ແລະ ຄ່າທຳນຽມຕ່າງໆ ແມ່ນໃຫ້ພາກສ່ວນກ່ຽວຂ້ອງ ຄິດໄລ່ເກັບຕາມທີ່ໄດ້ກໍານົດໄວ້ ໃນໂຄງສ້າງລາຄານໍ້າມັນເຊື້ອໄຟ ສະບັບເລກທີ 1044/ກຄພນ, ລົງວັນທີ 26 ຕຸລາ 2022 ຈົນກວ່າຈະມີການປ່ຽນແປງ ແລະ ໃຫ້ບັນດາບໍລິສັດນໍ້າມັນເຊື້ອໄຟ ປະຕິບັດຕາມເນື້ອໃນຂ້າງເທິງນີ້ຢ່າງເຂັ້ມງວດ ແລະ ຄຸ້ມຄອງປ້ຳຂາຍຍ່ອຍຂອງຕົນໃຫ້ບໍລິການຢ່າງເປັນປົກກະຕິ.
ແຈ້ງການສະບັບນີ້ ປ່ຽນແທນແຈ້ງການ ສະບັບເລກທີ 1461/ອຄ, ລົງວັນທີ 19 ຕຸລາ 2022. ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ຈັດຕັ້ງປະຕິບັດ.
