ທ່ານ Rishi Sunak ຊະນະເລືອກຕັ້ງຫົວໜ້າພັກອະນຸລັກນິຍົມ ຂຶ້ນເປັນຜູ້ນຳອັງກິດ

20

ສຳນັກຂ່າວຕ່າງປະເທດລາຍງານໃນວັນທີ 24 ຕຸລາ 2022 ວ່າ: ຄະນະກຳມະການບໍລິຫານພັກອະນຸລັກນິຍົມຂອງອັງກິດ ໄດ້ຢັ່ງສຽງພາຍໃນພັກ ເພື່ອຄັດເລືອກເອົາບຸກຄົນທີ່ເໝາະສົມມາເປັນຫົວໜ້າພັກ ປາກົດວ່າ ທ່ານ ຣີຊີ ຊູນັກ ( Rishi Sunak ) ອະດີດລັດຖະມົນຕີກະຊວງການເງິນ ທີ່ເປັນເຊື້ອສາຍອິນເດຍ ໄດ້ສຽງສະໜັບສະໜູນເກືອບ 200 ສຽງ, ໃນຂະນະທີ່ຄູ່ແຂ່ງຄົນອື່ນໆປະກາດຖອນຕົວກ່ອນໜ້ານີ້ແລ້ວ.

May be an image of 1 person and standing

ທ່ານ ຣີຊີ ຊູນັກ ຈະຂຶ້ນເປັນນາຍົກລັດຖະມົນຕີອັງກິດແທນ ທ່ານ ນາງ ລີສ ທຣັສ ທີ່ປະກາດລາອອກຈາກຕຳແໜ່ງເມື່ອວັນທີ 20 ຕຸລາຜ່ານມາ, ຫຼັງຈາກທີ່ດຳລົງຕຳແໜ່ງເປັນນາຍົກລັດຖະມົນຕີອັງກິດໄດ້ພຽງ 45 ວັນ.

ທ່ານ ຊູນັກ ໄດ້ຖະແຫຼງໃນຖານະຫົວໜ້າພັກອະນຸລັກນິຍົມເປັນຄັ້ງທຳອິດ ໂດຍລະບຸວ່າ: ສະຫະຣາຊະອານາຈັກອັງກິດ ເປັນປະເທດຍິ່ງໃຫຍ່ ແຕ່ກຳລັງປະເຊີນກັບຄວາມທ້າທາຍດ້ານເສດຖະກິດຄັ້ງຮຸນແຮງ ໂດຍ ຊູນັກ ໄດ້ຮຽກຮ້ອງໃຫ້ມີສະຖຽນລະພາບ ແລະ ເປັນເອກະພາບພາຍໃນປະເທດ ພ້ອມທັງໃຫ້ຄຳໝັ້ນສັນຍາວ່າ ຈະຮັບໃຊ້ປະຊາຊົນດ້ວຍຄວາມສັດຊື່ ແລະ ຈະທຸ່ມເທສຸດຄວາມສາມາດ ເພື່ອຮັບໃຊ້ປະເທດຊາດ.

May be an image of 1 person

ທ່ານ ຊູນັກ ໄວ 42 ປີ ຈະເປັນນາຍົກລັດຖະມົນຕີເຊື້ອສາຍອິນເດຍ ຫຼື ເຊື້ອສາຍອາຊີຄົນທຳອິດຂອງອັງກິດ ແລະ ເປັນນາຍົກລັດຖະມົນຕີ ທີ່ມີອາຍຸນ້ອຍທີ່ສຸດໃນຮອບ 210 ປີ ລວມທັງເປັນນັກການເມືອງທີ່ກ້າວເຂົ້າສູ່ຕຳແໜ່ງນາຍົກລັດຖະມົນຕີໄວທີ່ສຸດໃນຍຸກສະໄໝໃໝ່ ໂດຍໃຊ້ເວລາພຽງ 7 ປີ ນັບແຕ່ໄດ້ຮັບການເລືອກຕັ້ງເປັນສະມາຊິກສະພາຂອງອັງກິດ.

ແນວໃດກໍຕາມ, ການດຳລົງຕຳແໜ່ງນາຍົກລັດຖະມົນຕີຂອງ ທ່ານ ຊູນັກ ຈະຕ້ອງປະເຊີນກັບຄວາມທ້າທາຍຫຼາຍປະການ ໂດຍສະເພາະແມ່ນ ຄວາມຜັນຜວນຂອງຕະຫຼາດ ແລະ ຕ້ອງບໍລິຫານດ້ານເສດຖະກິດໃຫ້ຫຼຸດພົ້ນອອກຈາກສະພາວະທົດຖອຍ.