ປະສົບຜົນສຳເລັດຢ່າງໜ້າປະທັບໃຈ ສຳລັບໂຄງການລອຍຂ້າມນ້ຳຂອງ ຂອງ ໂຕໂນ່ ພາຄິນ, ນັກສະແດງ-ນັກຮ້ອງຂອງໄທ ໃນໂຄງການ One Man and The River ເພື່ອລະດົມທຶນຊ່ວຍເຫຼືອໂຮງຫມໍ ນະຄອນພະນົມ ແລະ ໂຮງຫມໍ ຢູ່ແຂວງຄຳມ່ວນຂອງ ສປປ ລາວ ທີ່ຂາດເຂີນອຸປະກອນການແພດ.
ການລອຍຂ້າມນ້ຳຂອງຂອງ ໂຕໂນ່ ຊ່ວງເຊົ້າມາຝັ່ງທ່າແຂກ ສປປ ລາວ ໄດ້ເລີ່ມໃນເວລາ 10:09 ໂມງ ວັນທີ 22 ຕຸລາ 2022, ຫຼັງ ໂຕໂນ່ ກາບຂໍພອນສິ່ງສັກສິດ, ຮ່າງກາຍ ໂຕໂນ່ ມີຄວາມຟິດສົມບູນ ລອຍນ້ຳດ້ວຍທ່າຟຣີສະຕາສ, ປະສົມປະສານກັບທ່າກົບ ໃຊ້ເວລາ 2 ຊົ່ວໂມງ ໄລຍະທາງ 6-7 ກິໂລແມັດ ຜ່ານກະແສນ້ຳຂອງທີ່ໄຫຼແຮງ ໂດຍມີເຈົ້າໜ້າທີ່ດູແລຄວາມປອດໄພທາງນ້ຳ ຮ່ວມລອຍນ້ຳ 4 ຄົນ, ມີທີມເຮືອຄາຍັກ 4 ລຳ.
ຈຸດທຳອິດລອຍອອກຈາກ ລານພະຍາສີສັດຕະນາຣາດ ໄປຂຶ້ນຝັ່ງຈຸດທີ 2 ໜ້າວັດກາງ ແຄມຂອງໃນເຂດເທດສະບານເມືອງນະຄອນພະນົມ, ລົງລອຍໄປຈຸດທີ 3 ເພື່ອຮ່ວມຮັບບໍລິຈາກ ຈາກພໍ່ແມ່ປະຊາຊົນທ້າຍເມືອງ ກ່ອນຈະລອຍຂ້າມມາຝັ່ງ ສປປ ລາວ ເພື່ອມຸ້ງໜ້າໄປວັດສີໂຄດຕະບອງ ເມືອງທ່າແຂກ ແຂວງຄຳມ່ວນ ໄລຍະທາງປະມານ 6-7 ກິໂລແມັດ ປະເວລາພຽງແຕ່ 2 ຊົ່ວໂມງ ຖືວ່າໄວເກີນຄາດໝາຍ ເນື່ອງຈາກບໍ່ມີກະແສນ້ຳວົນ ແລະ ບໍ່ມີອຸປະສັກ.
ເມື່ອມາຮອດຝັ່ງ ສປປ ລາວ ກໍມີພໍ່ແມ່ພີ່ນ້ອງປະຊາຊົນຊາວລາວ, ພ້ອມທັງແພດໝໍ ລໍຖ້າໃຫ້ການຕ້ອນຮັບຢ່າງໜ້າແໜ້ນ ແລະ ອົບອຸ່ນ, ມີການບໍລິຈາກ ແລະ ໂຕໂນ່ ໄດ້ຂຶ້ນໄປຮ່ວມພິທີບູຊາບວງສວງພຣະທາດສີໂຄດຕະບອງ ເຊິ່ງເປັນພະທາດຄູ່ບ້ານຄູ່ເມືອງທ່າແຂກ ເບື້ອງຝັ່ງ ສປປ ລາວ
ຈາກນັ້ນໃນເວລາ 15:00 ໂຕໂນ່ ກໍໄດ້ລອຍຂ້າມນໍ້າຂອງກັບໄປຍັງຝັ່ງ ນະຄອນພະນົມ ໂດຍລົງທີ່ທ່າບ້ານນາເມືອງ ເມືອທ່າແຂກ ທີ່ຢູ່ເໜືອຈາກຕົວເມືອງນະຄອນພະນົມ ເພື່ອເລີ່ມລົງລອຍກັບໄປຕາມກະແສນ້ຳ ມາ ຕົວເມືອງນະຄອນພະນົມ ໃນຊ່ວງຕອນແລງ ເພື່ອສະຫຼຸບຍອດບໍລິຈາກ ແລະ ຈົນຈົບກິດຈະກຳ, ໃນຂະນະທີ່ຍອດເງິນບໍລິຈາກ ເພຈ໌ຂ່າວ The Reporters ຫຼ້າສຸດປະມານເວລາ 19 ໂມງຍອດເງິນບໍລິຈາກ ທະລຸ 57 ລ້ານບາດ ຫຼື ປະມານ 26 ຕື້ກວ່າກີບ ເຊິ່ງຕາມ ໂຕໂນ່ ຄາດຫວັງເງິນບໍລິຈາກ ເບື້ອງຕົ້ນແມ່ນ 6 ລ້ານບາດ ເຊິ່ງເຫັນວ່າຍອດບໍລິຈາກເກີນຄາດ.
ໂຕໂນ່ ພາຄິນ ອາຍຸ 36 ປີ ເຜີຍຄວາມໃນໃຈກ່ອນລົງລອຍນ້ຳວ່າ: ຕົນເອງດີໃຈ ແລະ ມີຄວາມພາກພູມໃຈ, ມີຄວາມສຸກທີ່ໄດ້ຈັດກິດຈະກຳລອຍນໍ້າເພື່ອການກຸສົນ ຊ່ວຍເຫຼືອໂຮງຫມໍນະຄອນພະນົມ ແລະ ໂຮງຫມໍ ຢູ່ແຂວງຄຳມ່ວນ ສປປ ລາວ, ເຮັດໃຫ້ຕົນໄດ້ຮູ້ຈັກຄຳວ່າເສຍສະຫຼະ, ຮູ້ຈັກຄຳວ່າໃຫ້, ຮູ້ຈັກຄວາມຮັກສາມັກຄີລະຫວ່າງປະຊາຊົນຊາວໄທ ແລະ ຊາວລາວ ທີ່ເປັນປະໂຫຍດແກ່ສັງຄົມ, ເປັນການເຮັດແໜ້ນຄວາມຮ່ວມມືໃຫ້ຫຼາຍຂຶ້ນ ແລະ ຂ້ອຍຈະຈົດຈຳວັນນີ້ໄປຕະຫຼອດ ແລະ ຂໍຂອບໃຈທຸກຄົນທີ່ໃຫ້ການສະໜັບສະໜູນ
