ຊີໂນ-ອາກຣີ ໂປຕາສ ເຂົ້າຮ່ວມງານມະຫາກໍາສີມືຫັດຖະກໍາລາວ ຄັ້ງທີ 21

63

ວັນທີ 17 ຕຸລາ 2022, ທ່ານ ທົງ ຢົງເຮີງ ປະທານ ແລະ ອໍານວຍການບໍລິສັດ ຊີໂນ-ອາກຣີ ໂປຕາສ ຈໍາກັດ ໄດ້ຮັບການເຊື້ອເຊີນຈາກ ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກໍາ ແລະ ການຄ້າ ເພື່ອເຂົ້າຮ່ວມພິທີເປີດງານມະຫາກໍາສີມືຫັດຖະກໍາລາວ ຄັ້ງທີ 21 ຊຶ່ງໄດ້ຈັດຂຶ້ນທີ່ສູນການຄ້າລາວ-ໄອເຕັກ ແລະ ໄດ້ມອບເງິນສະໜັບສະໜູນດ້ານງົບປະມານໃຫ້ ສະມາຄົມຫັດຖະກໍາລາວ ທີ່ເປັນເຈົ້າພາບຈັດງານ ມູນຄ່າ 20.000.000 ກີບ.

ງານດັ່ງກ່າວ, ໄດ້ຮັບກຽດເຂົ້າຮ່ວມເປີດໂດຍ ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ, ທ່ານ ມະໄລທອງ ກົມມະສິດ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ, ທ່ານ ນາງ ສຸວິຕາ ປະເສີດ, ປະທານສະມາຄົມ ຫັດຖະກໍາລາວ, ພ້ອມດ້ວຍບັນດາທຸຕານຸທູດ ແລະ ເພື່ອນມິດຈາກພາກທຸລະກິດອຸດສາຫະກໍາ-ການຄ້າ ກໍໄດ້ເຂົ້າຮ່ວມ.

ງານມະຫາກໍາສີມືຫັດຖະກໍາລາວ ຈັດຂຶ້ນໂດຍສະມາຄົມຫັດຖະກໍາລາວປີລະຄັ້ງ ເພື່ອເປັນການລວບລວມສິນຄ້າຫັດຖະກໍາຜ້າໄໝລາວ, ຜະລິດຕະພັນເຮັດດ້ວຍໄມ້, ເຄື່ອງປະດັບ, ຜະລິດຕະພັນກະສິກໍາ ແລະ ອື່ນໆຕາມທິດທາງນະໂຍບາຍຂອງລັດຖະບານ “ໜຶ່ງເມືອງ ໜຶ່ງຜະລິດຕະພັນ” ເພື່ອເປັນການຊຸກຍູ້ຍົກລະດັບສີມືຫັດຖະກໍາລາວໃຫ້ມີຄຸນນະພາບຂຶ້ນເລື້ອຍໆ ເຊິ່ງໃນປີນີ້ ມີບັນດາຫົວໜ່ວຍທຸລະກິດຕ່າງໆເຂົ້າຮ່ວມວາງສະແດງ 230 ຮ້ານ, ຖ້າທຽບໃສ່ປີຜ່ານມາ ຖືວ່າມີການຍົກລະດັບຂຶ້ນຫຼາຍ. ທັງນີ້, ກໍເພື່ອເປັນການສົ່ງເສີມການສົ່ງອອກຜະລິດຕະພັນສີມືຫັດຖະກໍາລາວທີ່ມີຄຸນນະພາບ, ຊ່ວຍຂັບເຄື່ອນເສດຖະກິດພາຍໃນທ້ອງຖິ່ນ ກໍ່ຄືເສດຖະກິດຂອງ ສປປ ລາວ.

ພິທີເປີດ ໄດ້ເລີ່ມຕົ້ນດ້ວຍການສະແດງຂອງກອງສຸລິຍານຂອງຄະນະຊາວໜຸ່ມ, ຊົມການສະແດງສິນລະປະຈາກສະມາຄົມຫັດຖະກຳລາວ ແລະ ໃຫ້ກຽດເຂົ້າຮ່ວມກັນຕັດແຖບຜ້າ ແລະ ລັ່ນຄ້ອງ 9 ບາດ ໂດຍ ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ເພື່ອເປັນສີລິມຸງຄຸນ ເປີດງານມະຫາກໍາສີມືຫັດຖະກຳລາວ ຄັ້ງທີ 21 ຢ່າງເປັນທາງການ. ພ້ອມດຽວກັນນີ້, ທ່ານນາຍົກລັດຖະມົນຕີ ແຫ່ງ ສປປ ລາວ ກໍໄດ້ຢ້ຽມຊົມງານວາງສະແດງສິນຄ້າພາຍໃນງານ. ສ່ວນຢູ່ທີ່ຫ້ອງວາງສະແດງຂອງ ບໍລິສັດ ຊີໂນ-ອາກຣີ ໂປຕາສ, ທ່ານ ທົງ ຢົງເຮີງ ກໍໄດ້ລາຍງານໂດຍຫຍໍ້ສະພາບຄວາມຄືບໜ້າໂຄງການຂອງບໍລິສັດຕໍ່ ທ່ານນາຍົກໄດ້ຮັບຊາບ; ຊຶ່ງບໍລິສັດ ໄດ້ເຕີບໂຕກາຍເປັນວິສາຫະກິດຜະລິດຝຸ່ນໂປຕາສ ທີ່ໃຫຍ່ທີ່ສຸດຢູ່ ສປປ ລາວ ແລະ ໃນພາກພື້ນອາຊີຕາເວັນອອກສ່ຽງໃຕ້.

ພາຍຫຼັງໄດ້ຮັບຟັງ, ທ່ານນາຍົກ ກໍໄດ້ສະແດງຄວາມຊົມເຊີຍ ພ້ອມທັງເນັ້ນໜັກວ່າ: ບໍລິສັດຕ້ອງສືບຕໍ່ຮັກສາຄວາມໄວຂອງການພັດທະນາ ແລະ ພັດທະນາໂຄງການເກືອໂປຕາສຂອງລາວໃຫ້ດີຂຶ້ນຕື່ມອີກກ້າວໜຶ່ງ. ດ້ານ ທ່ານ ທົງ ຢົງເຮີງ ກໍໄດ້ສະແດງຄວາມຂອບໃຈທ່ານນາຍົກ ທີ່ໄດ້ໃຫ້ທິດຊີ້ນຳກ່ຽວກັບໂຄງການຝຸ່ນໂປຕາສ ແລະ ບໍລິສັດ ຊີໂນ-ອາກຣີ ໂປຕາສ ຈະໃຊ້ທຸກຄວາມພະຍາຍາມ ເພື່ອສ້າງໃຫ້ກາຍເປັນວິສາຫະກິດຜະລິດຝຸ່ນໂປຕາສ ທີ່ໃຫຍ່ທີ່ສຸດໃນອາຊີ. ຫຼັງຈາກນັ້ນ, ທ່ານ ທົງ ຢົງເຮີງ ຍັງໄດ້ໂອ້ລົມຮ່ວມກັບລັດຖະມົນຕີ ກະຊວງອຸດສະຫະກຳ ແລະ ການຄ້າ ແລະ ປະທານສະມາຄົມຫັດຖະກຳລາວ ຢ່າງໄມຕີຈິດມິດຕະພາບ ຊຶ່ງທ່ານໄດ້ສະແດງຄວາມຂອບໃຈບໍລິສັດ ຊີໂນ-ອາກຣີ ທີ່ເຂົ້າຮ່ວມໃນພິທີເປີດງານມະຫາກໍາສີມືຫັດຖະກໍາລາວຄັ້ງນີ້.

ຮູບປະກອບຂ່າວ

ທ່ານ ທົງ ຢົງເຮີງ ກ່າວຕື່ມວ່າ: ບໍລິສັດ ຊີໂນ-ອາກຣີ ໂປຕາສ ຕັ້ງໝັ້ນທີ່ຈະພັດທະນາເປັນເວລາຍາວນານຢູ່ ສປປ ລາວ, ຕ້ອງປະຕິບັດໜ້າທີ່ຮັບຜິດຊອບທາງສັງຄົມ ແລະ ບໍລິສັດ ບໍ່ພຽງແຕ່ຈະຊຸກຍູ້ການພັດທະນາເສດຖະກິດພາຍໃນທ້ອງຖິ່ນຂອງແຂວງຄຳມ່ວນເທົ່ານັ້ນ, ແຕ່ຍັງຫວັງທີ່ຈະປະກອບສ່ວນກຳລັງແຮງເຂົ້າໃນການພັດທະນາຂະແໜງອຸດສາຫະກໍາຕ່າງໆ ຊຶ່ງລວມທັງຂະແໜງຫັດຖະກຳ; ພ້ອມຈະປະຕິບັດຕາມທິດຊີ້ນຳຂອງລັດຖະມົນຕີກະຊວງອຸດສະຫະກຳ ແລະ ການຄ້າ, ສືບຕໍ່ປະສານສົມທົບກັບ ສະມາຄົມຫັດຖະກຳລາວ ເພື່ອພະຍາຍາມຊ່ວຍກັນໃຫ້ຜະລິດຕະພັນຫັດຖະກຳທີ່ມີຄຸນນະພາບຂອງລາວ ໄດ້ໄປຈຳໜ່າຍຢູ່ ສປ ຈີນ, ບັນດາປະເທດອາຊີ ແລະ ປະເທດອື່ນໆໃນຂອບເຂດທົ່ວໂລກ ເພື່ອໃຫ້ຫຼາຍປະເທດໄດ້ຮູ້ຈັກປະເທດລາວຫຼາຍຂຶ້ນ ໂດຍຜ່ານສິນຄ້າຫັດຖະກຳ. ຈາກສິ່ງດັ່ງກ່າວ, ກໍຈະດຶງດູດນັກລົງທຶນເຂົ້າມາລົງທຶນໃນຂະແໜງການຕ່າງໆຢູ່ລາວໄດ້ຫຼາຍຍິ່ງຂຶ້ນ ແລະ ຈະຊ່ວຍຂັບເຄື່ອນການພັດທະນາເສດຖະກິດຂອງ ສປປ ລາວ.