ສຳນັກຂ່າວຕ່າງປະເທດລາຍງານໃນວັນທີ 18 ຕຸລາ 2022 ວ່າ: ບໍລິສັດໄມໂຄຣ ຊ໊ອຟ ເດີນໜ້າປົດພະນັກງານອອກຈາກບໍລິສັດຫຼາຍຮ້ອຍຕຳແໜ່ງ ເພື່ອຮັບມືກັບບັນຫາເສດຖະກິດທີ່ກຳລັງຕົກຕ່ຳ ເຊິ່ງເປັນບໍລິສັດເຕັກໂນໂລຊີລາຍໃຫຍ່ຂອງໂລກລາຍຫຼ້າສຸດ ທີ່ຕັດສິນໃຈຫຼຸດພະນັກງານລົງ.
ໂຄສົກຂອງ ບໍລິສັດ ໄມໂຄຣຊ໊ອຟ ເປີດເຜີຍວ່າ: ບໍລິສັດໄດ້ປະເມີນ ແລະ ຈັດລຳດັບ ຄວາມສຳຄັນຂອງທຸລະກິດ ບົນພື້ນຖານດຽວກັນກັບບໍລິສັດອື່ນໆ ແລ້ວປັບໂຄງສ້າງຕາມຄວາມເໝາະສົມ ແຕ່ບໍລິສັດຍັງຈະມີການລົງທຶນເພີ່ມ ແລະ ຈະຈ້າງພະນັກງານໃນພະແນກທີ່ກຳລັງເຕີບໂຕ.
ແນວໃດກໍຕາມ, ບໍລິສັດໄມໂຄຣຊ໊ອຟ ບໍ່ໄດ້ລະບຸຢ່າງຊັດເຈນວ່າ ມີພະແນກໃດແດ່ທີ່ໄດ້ຮັບຜົນກະທົບ ຕະຫຼອດຮອດຈຳນວນພະນັກງານທີ່ຈະຕ້ອງຖືກປົດອອກຈາກບໍລິສັດ ແຕ່ຄາດວ່າອາດຈະມີເຖິງ 1 ພັນຄົນ ໂດຍນັກວິເຄາະຄາດການວ່າ ບຸກຄະລາກອນໃນພະແນກ Experiences & Devices ພະແນກ Xbox ແລະ ທີມກົດໝາຍ ໜ້າຈະໄດ້ຮັບຜົນກະທົບຫຼາຍທີ່ສຸດ ເຖິງແມ່ນວ່າບາງສ່ວນຈະເປັນພະນັກງານເກົ່າແກ່ກໍຕາມ ໂດຍຈະປົດຫຼາຍລະດັບທົ່ວໂລກ ແມ່ນແຕ່ພະນັກງານທີ່ເຮັດວຽກຢູ່ໃນສະຫະລັດອາເມຣິກາ ກໍມີໂອກາດຖືກປົດເຊັ່ນດຽວກັນ.
ກ່ອນໜ້ານີ້, ໄມໂຄຣຊ໊ອຟ ໄດ້ສົ່ງສັນຍານປັບໂຄງສ້າງບໍລິສັດ ດ້ວຍການຫຼຸດພະນັກງານລົງ ແລະ ເລີ່ມບໍ່ຮັບພະນັກງານໃໝ່ໃນພະແນກ Windows, Office ແລະ Teams ຈາກນັ້ນກໍເລີ່ມປົດພະນັກງານອອກໃນສັດສ່ວນຕ່ຳກວ່າ 1% ຂອງພະນັກງານທັງໝົດ 180.000 ຄົນທົ່ວໂລກ ໃນເດືອນກໍລະກົດຜ່ານມາ.
