ທ່ານ ສີ ຈິ້ນຜິງ ເລຂາທິການໃຫຍ່ ຄະນະກຳມະການສູນກາງພັກກອມມູນິດຈີນ ກ່າວບົດລາຍງານການເມືອງຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນວ່າ: ກອງປະຊຸມໃຫຍ່ຄັ້ງນີ້ ແມ່ນມີຄວາມໝາຍສໍາຄັນທີ່ສຸດ ໃນໂອກາດທີ່ທົ່ວພັກ ແລະ ປະຊາຊົນບັນດາເຜົ່າທົ່ວປະເທດຈີນ ພວມກ້າວເຂົ້າສູ່ຂະບວນການໃໝ່ ແຫ່ງການສ້າງສາປະເທດສັງຄົມນິຍົມທັນສະໄໝຢ່າງຮອບດ້ານ ແລະ ກ້າວໄປສູ່ເປົ້າໝາຍ ສູ້ຊົນ 100 ປີ ເຫດການທີສອງ.
ຫົວຂໍ້ຫຼັກຂອງກອງປະຊຸມຄັ້ງນີ້ ແມ່ນການຊູຄັນທຸງອັນຍິ່ງໃຫຍ່ ແຫ່ງສັງຄົມນິຍົມ ທີ່ມີສີສັນພິເສດຂອງຈີນ, ຜັນຂະຫຍາຍແນວຄິດສັງຄົມນິຍົມ ທີ່ມີສີສັນພິເສດຂອງຈີນ ໃນຍຸກໃໝ່ຢ່າງຮອບດ້ານ, ເສີມຂະຫຍາຍນ້ຳໃຈຂອງພັກອັນຍິ່ງໃຫຍ່, ໝັ້ນໃຈຕົນເອງ, ສ້າງຄວາມເຂັ້ມແຂງດ້ວຍຕົນເອງ, ຮັກສາທາດແທ້ ແລະ ປະດິດສ້າງ, ບຸກໜ້າບືນຕົວ, ກ້າວໄປຂ້າງໜ້າ ດ້ວຍຄວາມກ້າຫານ ແລະ ທໍລະຫົດອົດທົນ, ສາມັກຄີກັນ ບາກບັ່ນສູ້ຊົນ ເພື່ອສ້າງປະເທດສັງຄົມນິຍົມ ທັນສະໄໝ ຮອບດ້ານ ແລະ ຊຸກຍູ້ການຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງປະຊາຊາດຈີນ ຢ່າງຮອບດ້ານ.
ຕະຫຼອດໄລຍະ 5 ປີ ນັບແຕ່ໄຂກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIX ຂອງພັກເປັນຕົ້ນມາ ຖືເປັນ 5 ປີ ທີ່ພິເສດທີ່ສຸດ, ສູນກາງພັກ ໄດ້ປະສານສົມທົບພາກສ່ວນລວມແຫ່ງຍຸດທະສາດ ຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງປະຊາຊາດຈີນ ກັບ ສະພາບການຂອງໂລກທີ່ເກີດມີການປ່ຽນແປງຢ່າງໃຫຍ່ຫຼວງແບບບໍ່ເຄີຍມີມາກ່ອນ ໃນຮອບຮ້ອຍປີຜ່ານມານີ້, ໄດ້ວາງແຜນຍຸດທະສາດສຳຄັນ ກ່ຽວກັບການພັດທະນາພາລະກິດຂອງພັກ ແລະ ປະເທດຊາດ, ສາມັກຄີ ແລະ ນຳພາທົ່ວພັກ ທົ່ວກອງທັບ ແລະ ປະຊາຊົນບັນດາເຜົ່າໃນທົ່ວປະເທດ ຮັບມືກັບສະພາບການສາກົນ ທີ່ສັບສົນ ແລະ ຂ້ຽວຂາດ ກໍຄື ຄວາມສ່ຽງ ແລະ ສິ່ງທ້າທາຍອັນໃຫຍ່ຫຼວງທີ່ເກີດຂຶ້ນຕາມມາ, ໄດ້ຊຸກຍູ້ພາລະກິດສັງຄົມນິຍົມ ທີ່ມີສີສັນພິເສດຂອງຈີນ ໃນຍຸກໃໝ່ໃຫ້ຂະຫຍາຍຕົວກ້າວໄປຂ້າງໜ້າຢ່າງບໍ່ຢຸດຢັ້ງ ດ້ວຍນ້ຳໃຈບຸກບືນສູ້ຊົນແບບມີຜົນງານພົ້ນເດັ່ນ.
