ມະຫາວິທະຍາໄລຈາກຈີນ 7 ແຫ່ງ ຕິດອັນດັບ 100 ຂອງໂລກ

37

ວາລະສານ ທາມ ໄຮເອີ ເອດູເຄເຊິນ ( THE ) ຂອງສະຫະຣາຊະອານາຈັກ ໄດ້ເປີດເຜີຍຜົນການຈັດອັນດັບຂອງມະຫາວິທະຍາໄລທົ່ວໂລກ ປະຈຳປີ 2023 ( World University Rankings 2023 ) ພົບວ່າມະຫາວິທະຍາໄລຈາກ ສປ ຈີນ 7 ແຫ່ງ ຕິດອັນດັບໜຶ່ງໃນ 100 ຂອງມະຫາວິທະຍາໄລທີ່ມີຄຸນນະພາບສູງສຸດທົ່ວໂລກ, ເພີ່ມຂຶ້ນຈາກ 6 ແຫ່ງເມື່ອປີຜ່ານມາ.

ທັງນີ້, ມະຫາວິທະຍາໄລຊິງຫົວ ແລະ ປັກກິ່ງ ຕິດອັນດັບທີ 16 ແລະ 17 ຂອງໂລກຕາມລຳດັບ, ຂະນະທີ່ອີກ 5 ແຫ່ງ ໄດ້ແກ່: ມະຫາວິທະຍາໄລຝູ່ຕັ້ນ, ມະຫາວິທະຍາໄລ ຊຽງໄຮຈ້ຽວຖົງ, ມະຫາວິທະຍາໄລເຈີຈ້ຽງ, ມະຫາວິທະຍາໄລວິທະຍາສາດ ແລະ ເຕັກໂນໂລຊີ ແຫ່ງ ສປ ຈີນ ແລະ ມະຫາວິທະຍາໄລໜານຈິ່ງ.

May be an image of 2 people and people standing

ລາຍງານລະບຸວ່າ: ເຖິງແມ່ນວ່າກຸ່ມມະຫາວິທະຍາໄລຈາກປະເທດຕາເວັນຕົກ ຍັງຄອງອັນດັບຕົ້ນໆຂອງໂລກ ແຕ່ມະຫາວິທະຍາໄລໃນພາກພື້ນອາຊີຕາເວັນອອກ ແລະ ຕາເວັນອອກກາງ ຕ່າງກໍກຳລັງໄຕ່ອັນດັບຂຶ້ນມາ ເຊິ່ງນັບວ່າເປັນຂ່າວດີທີ່ຈະເຮັດໃຫ້ຜູ້ຄົນໄດ້ເຂົ້າເຖິງການສຶກສາທີ່ມີຄຸນນະພາບສູງ ກຳລັງເປີດກວ້າງທົ່ວໂລກ ແລະ ຈະຊ່ວຍຫຼຸດຜ່ອນການເກີດສະໝອງໄຫຼ ( Brain Drain ) ຫຼື ການຍ້າຍຖິ່ນຖານຂອງບັນດາຫົວກະທິຈາກບັນດາປະເທດກຳລັງພັດທະນາລົງໄດ້.

ທັງນີ້, ການຈັດອັນດັບມະຫາວິທະຍາໄລດັ່ງກ່າວ ຄວບຄຸມເຖິງມະຫາວິທະຍາໄລ 1.779 ແຫ່ງຈາກ 104 ປະເທດ ແລະ ພາກພື້ນ ໂດຍປະເມີນຈາກການປະຕິບັດງານ 5 ດ້ານ ໄດ້ແກ່: ການສອນ, ການວິໄຈ, ຜົນງານທາງວິຊາການທີ່ໄດ້ຮັບການອ້າງອີງ, ຄວາມເປັນສາກົນ ແລະ ລາຍໄດ້.

May be an image of one or more people and outdoors

ໃນຂະນະທີ່ 2 ອັນດັບທຳອິດ ໄດ້ແກ່: ມະຫາວິທະຍາໄລ ອັອກຟອດ ແລະ ມະຫາວິທະຍາໄລ ຮາເວິດ ຕາມລຳດັບ, ສ່ວນມະຫາວິທະຍາໄລ ເຄມບຣິສ ແລະ ມະຫາວິທະຍາໄລ ສະແຕນຟອດ ຄອງອັນດັບ 3 ຮ່ວມກັນ.