ສຳນັກຂ່າວຊິນຫົວ ລາຍງານວ່າ ຄະນະບໍລິຫານ ອັງກໍ ເອນເທີຣໄພຣ ( Angkor Enterprise ) ເປີດເຜີຍວ່າ ໃນໄລຍະ 9 ເດືອນທຳອິດຂອງປີ 2022, ອຸທິຍານບູຮານຄະດີອັງກໍ ຫຼື ໝູ່ປຣາສາດ ນະຄອນວັດ ເຊິ່ງເປັນແຫຼ່ງທ່ອງທ່ຽວທີ່ມີຊື່ສຽງຂອງ ກຳປູເຈຍ ໄດ້ຕ້ອນຮັບນັກທ່ອງທ່ຽວຕ່າງປະເທດ ບັນລຸ 134.152 ເທື່ອຄົນ ເພີ່ມຂຶ້ນ 20 ເທົ່າ ເມື່ອທຽບໃສ່ໄລຍະດຽວກັນຂອງປີຜ່ານມາ, ສ້າງລາຍໄດ້ເຖິງ 5,36 ລ້ານໂດລາສະະລັດ ຈາກການຈຳໜ່າຍປີ້ເຂົ້າຊົມ ລະຫວ່າງ ເດືອນມັງກອນ – ເດືອນກັນຍາ.
ທັງນີ້ ອຸທິຍານດັ່ງກ່າວມີເນື້ອທີ່ປະມານ 401 ກິໂລຕາແມັດ ເຊິ່ງຕັ້ງຢູ່ແຂວງສຽມຖານ ທາງພາກຕາເວັນຕົກສ່ຽງເໜືອຂອງກຳປູເຈຍ ໄດ້ຮັບການຂຶ້ນທະບຽນເປັນແຫຼ່ງມໍລະດົກໂລກ ຂອງອົງການອຸຍເນສໂກ ໃນປີ 1992 ແລະ ຖືເປັນຈຸດໝາຍປາຍທາງໃນການທ່ອງທ່ຽວຍອດນິຍົມທີ່ສຸດຂອງ ກຳປູເຈຍ.
ທ່ານ ຮຸນເຊນ ນາຍົກ ລັດຖະມົນຕີ ກຳປູເຈຍ ກ່າວວ່າ: ແຫຼ່ງມໍລະດົກແຫ່ງນີ້ ເປັນສະຖານທີ່ສຳຄັນໃນການດຶງດູດເອົານັກທ່ອງທ່ຽວ, ສ້າງວຽກເຮັດງານທຳ ແລະ ສ້າງລາຍໄດ້ໃຫ້ແກ່ປະຊາຊົນກຳປູເຈຍໂດຍທາງກົງ ແລະ ທາງອ້ອມເປັນຈຳນວນຫຼວງຫຼາຍ.