ສູນສະຖິຕິແຫ່ງຊາດຂອງອິນໂດເນເຊຍ ເປີດເຜີຍວ່າ: ອັດຕາເງິນຟີ້ຂອງອິນໂດເນເຊຍ ໃນເດືອນກັນຍາເພີ່ມຂຶ້ນ 5,95% ເມື່ອທຽບປີຕໍ່ປີ ເຊິ່ງເປັນສະຖິຕິສູງສຸດໃນຮອບ 7 ປີ, ຂະນະທີ່ເດືອນສິງຫາ ເພີ່ມຂຶ້ນ 4,69% ໂດຍສະຖິຕິທັງສອງເດືອນຍັງສູງກວ່າເປົ້າໝາຍຂອງທະນາຄານກາງກຳນົດໄວ້ ເຊິ່ງກຳນົດຢູ່ທີ່ລະດັບ 2 – 4% ໃນປີ 2022.
ປັດໄຈຫຼັກໆມາຈາກການທີ່ລັດຖະບານອິນໂດເນເຊຍ ປະກາດປັບຂຶ້ນລາຄານ້ຳມັນເຊື້ອໄຟ 30% ໂດຍມີຜົນນັບແຕ່ເດືອນກັນຍາຜ່ານມາ ຫຼັງຈາກທີ່ຕ້ອງປະເຊີນກັບແຮງກົດດັນທາງການເງິນຈາກການໃຊ້ງົບປະມານມະຫາສານ ເພື່ອອຸດໜູນລາຄານ້ຳມັນເຊື້ອໄຟ ສົ່ງຜົນກະທົບຕໍ່ສະຖານະທາງການເງິນຂອງປະເທດ.
ຂະນະທີ່ທະນາຄານກາງອິນໂດເນເຊຍ ປັບຂຶ້ນອັດຕາດອກເບ້ຍນະໂຍບາຍ 0,50% ເປັນ 4,25% ສູງກວ່າທີ່ນັກວິເຄາະຄາດການໄວ້ທີ່ລະດັບ 0,25%, ພ້ອມທັງປະກາດຮັບຊື້ຄືນພັນທະບັດທີ່ມີສັນຍາຂາຍຄືນໄລຍະເວລາ 7 ວັນ.
ທັງນີ້, ທະນາຄານກາງຂອງອິນໂດເນເຊຍ ເຄີຍປະເມີນໄວ້ວ່າ ອັດຕາເງິນເຟີ້ຈະສູງກວ່າ 6% ໃນປີ 2022 ນີ້.
